1 Is bahi he uluwanen, ebpurungan din is pemilya zin, iyan, is tulebung mulà he vahi edezeetan din is kandin he pemilya.

2 Is kedtinazeng, ne paaǥi te kedtehuza te Nengazen, piru is kenà kebpengungubpaan te hustu, ne paaǥi te kedsudia kandin.

3 Is menge ebpengeǥiyen te tulebung he etew, iyan ebpekezezaat kandin, piru is ebpengeǥiyen te uluwanen, iyan egkehimu he pengalang din.

4 Emun wazà ayam he igkeeradu ne wazè daan taǥù te budiga su pinaaǥi te zesen te ayam ebmeluag is terebahu ta ne zekelà is egkeraǥun ta.

5 Is kenà teruen he tistiǥus kenà edlimbung, iyan, is tarù he tistiǥus, ebpengaǥi zaan te tarù.

6 Is etew he sumpalit, kenà egkehimu he uluwanen, iyan, is etew he uluwanen, melemu zà mulà egketau.

7 Likayi nu is etew he tulebung su kenà ebpekeveǥey te ketau is menge lalag din.

8 Is ketau te etew he metau he ed-isip-isip te ed-ul-ulahan din ke hendei is hustu wey kenà, ne iyan ebeǥey kandin te keuluwanen ke hengkey is ebeelan din, piru is ketutulebungi te menge tulebung, ne ebpekelimbung kandin.

9 Kenè en ebeliyen te menge tulebung is salè dan, iyan, is menge metazeng he etew, ne meupiya mulà is kebpengungubpaan dan; egkesuatan dan he ebpekepenunuat sikandan te Megbevayà.

10 Iyan ke zà nesayud te utew nu kegkelipey etawa kegkeseeng.

11 Edezeetan is pemilya te etew he mezaat is menge ulaula zin, piru ipeuswag is pemilya te ebpengungubpaan te hustu.

12 Duen dalan he kunaan te etew ke iyan hustu he zalan, iyan, is egkepengkusan dutun ne iyan is kemetayen.

13 Egkehimu he id-eles ta is mezaat he ǥehinawa ta pinaaǥi te ked-engit, iyan, emun ebpekepasad ka he ed-engit mesakit gihapun is gehinawa nu.

14 Is etew, ne egkezawat din is bales te mibeelan din, meupiya etawa mezaat.

15 Is etew he wazè din utew hanew, edtuu te minsan hengkey zà duen; is etew he metau, ne ed-is-isipen din ke hendei is meupiya etawa mezaat ne ebentayan din is kedlangkad din.

16 Is etew he uluwanen, ne ed-empingan din is keugelingen din ne edlikey sikandin te samuk, piru is tulebung, melemu egkepauk ne ebeyveyanan din is hustu.

17 Is etew he melemu egkepauk ebpekevaal te tinulebung. Is etew he metau te kebpekelimbung din, ne egkukuntedahan te menge zuma zin.

18 Is etew he wazè din utew pereg, egkezawat din is rimeǥas te ketutulebungi zin, ne is etew he layun din ebpekeventayi is ed-ul-ulahan din, egkevantug sikandin tenged te ketau zin.

19 Ebpekezunghuy wey ebpekepehizuhizu ziyà te menge metazeng is menge etew he mezaat is menge ulaula zan.

20 Is etew he egkeey-eyuwan, minsan is siringan din, ne kenà edsegseǥipà kandin, iyan, mahabet mulà is emiǥu te sepian he etew.

21 Is etew he edsudì te zuma zin, ne ebpekesalà, iyan, utew zeyzey is etew he metinevangen te kinahanglan he edtevangan.

22 Is etew he ebpelanu te mezaat, ebpekevaal te sayep, iyan, is etew he meupiya is ebpelenuwen din, ebmahalen wey ebpezumdumahan sikandin te zuma he menge etew.

23 Emun edterebahu ki ne layun ta egkekuwa is rimeǥas te kedhaǥù ta, iyan, emun bà ki zà ebembentaan ne iyan dà egkepengkusan ta is kegkeayuayu.

24 Is menge uluwanen, ne iyan suhul zan is dekelà he ketiǥeyunan dan, iyan, is tinulebung he vaal te menge tulebung, ne iyan dà rimeǥas din is ketutulebungi.

25 Is kenà teruen he tistiǥus, ebpekelibri te menge etew wey zan kenà mehimetayi, iyan, is tarù he tistiǥus ne utew limbungan.

26 Is kedtehuza te Nengazen, ne iyan ebpekeveǥey te kelig-en wey kenà kegkekeizi te etew wey te menge anak din.

27 Is kedtehuza te Nengazen iring te kedtudà te wahig he ebpekeveǥey te untung, su pinaaǥi zutun egkelikayan ta is ebpekepevavà te umur ta.

28 Is kegkemekeǥeǥehem te hadì ne pinaaǥi te kahabet te menge sakup din; emun wazè din menge sakup ne wazè din daan gehem.

29 Is etew he uluwanen, ne mepelevayen sikandin, ne egketuusan ta is tulebung su melemu sikandin egkepauk.

30 Is melinew he isip, ibmeupiya te lawa, iyan, is kegkesina, iring te zaru he kansir su ebpekezezaat.

31 Is kedèdaaǥa te menge pubri, paaǥi te kedsupaka te Megbevayà, iyan, is kedtevangi te etew he kinahanglan he edtevangan, paaǥi te kebentuǥa te Megbevayà.

32 Edezeetan te Megbevayà is menge mekesesalà tenged te mezat he ulaula zan, piru ebpengelangan din is metazeng minsan ke ebpatey, ne zuen din mulà egkeeputan.

33 Ke và dà etew is ketau ne midlipezeng sikandin diyà te isip te etew he pereudseb, ne ebpekilala sikandin minsan diyà te menge tulebung.

34 Emun metazeng is menge meǥinged egkevantug is inged, iyan, is salà mulà ebpekeveǥey te keelezan.

35 Igkelipey te hadì is sineriǥan din he uluwanen, iyan egkeepesan din mulà is sineriǥan din he mekeeled-eled is baal zin.