1 “Maan is wazà teleena te Mekeǥeǥehem he Megbevayà is timpu te kedhukumi zin te lalung he menge etew? Maan is wazà mekaahà is menge migkilala kandin dutun te timpu te kedhukum? 2 Ebpenakew te tanà is lalung he menge etew pinaaǥi te kedhelina zan te simintu. Ebpenakew zan te menge uyaǥen ne idtampu zan heini ziyà te kandan he menge uyaǥen. 3 Edtekawen dan is asnu te menge ilu, wey egkuwaan dan is baka te valu he vahi su ibpesendaan dan is utang din. 4 Edèdaaǥen dan is menge pubri, umbe nepeǥes is menge pubri te ked-eles. 5 Iring dan te leew he asnu he ebpen-ahà te egkeenen dan diyà te sibsivayan. Ne wazè en duma he inged he egkepengahaan dan te ibpekaan dan te menge anak dan. 6 Ebpekirarew zan te menge abut te pinemula, ragkes en is diyà te menge pemuleey te paras te lalung he menge etew. 7 Egkeǥenew sikandan emun edlipezeng dan ke mezukilem, su wazè dan malung wey visti. 8 Egkahames dan te uzan he edtanà diyà te menge vuvungan, ne egkeenget dan diyà te sihung te menge vatu su wazà duma he egkehelungan dan.

9 “Emun ebpekeutang is balu wey pubri he vahi, anak din is ibpevayad kandin te lalung he menge etew. 10 Edhipanew is menge pubri he wazè dan bisti; ibpepeniang sikandan te rinaǥun he trigu, piru wazà kandan he egkekaan. 11 Ibpekeres sikandan te ulibu wey paras piru egkengemezahan dan. 12 Egkezineg diyà te inged is dag-es te menge edserupatey wey is kebuyù te tavang te negerebiyan te palì, piru wazà belesi te Megbevayà is mibaal te mezaat diyà te kandan.

13 “Duen menge etew he ebpekigkuntada te kerayag. Wazè dan medhipanew ziyà te kerayag wey wazè dan mesavut heini. 14 Is memumunù edsayu ed-enew su edhimetayan din is pubri, ne emun mezukilem ebpenakew sikandin. 15 Is ebpengumpadi te zuen din esawa edtaǥad he ebmerusirem su para kenà maahà. Edtembunan din is buked din su wey kenà mekilala. 16 Emun mezukilem edseled is menge tekawen diyà te menge valey, piru emun maandew ed-eles sikandan, su edlikayan dan is kerayag. 17 Ed-isipen dan he merayag is merusirem, su iyan dan utew egkesuati is mekahahandek he kerusireman.

18 “Piru kenà egkeuǥet is lalung he menge etew, iring sikandan te dìdì te wahig. Is tanà he ǥaked dan edrewakan te Megbevayà. Umbe wazà edhendutun minsan diyà te pemuleey zan te paras. 19 Iring te egkereney is ayis ne egkahanew emun meinit wey ǥulavung, is menge mekesesalà, egkahanew zaan kayi te kelibutan. 20 Kenè en sikandan egketenuzan, kekenà, egkelipatan en sikandan minsan te iney zan. Egkeenen sikandan te tagkey, ne edezeetan sikandan iring te kayu he midtamped. 21 Su wazè dan purungi is menge vahi he kenà ebpekaanak. Wey wazè dan kegkehizu te valu he menge vahi.

22 “Pinaaǥi te ǥehem te Megbevayà edezeetan din is gehemanen he menge etew. Minsan melig-en sikandan, piru kenà siguradu he layun meupiya is ked-ubpè dan. 23 Egkehimu he idtuǥut te Megbevayà he dezeyaan is ked-ubpè dan, piru ebentayan te Megbevayà is langun he waleng dan. 24 Ed-uswag sikandan seled te mevavà he timpu, ne kenà egkeuǥet egkahanew sikandan iring te vulak he egkeǥangu etawa pungu he edlegtayen. 25 Emun kenà hustu heini is egkeǥiyen ku, hentei is ebpekepengintutuu he midtarùtarù a? Hentei is ebpekekaǥi he sayep a?”