1 Migkaǥi is Nengazen kayi te kedì te, “Pemasa ka te umuy ziyà te mendiziyun. Ne zumaha nu is menge edumala te menge etew wey menge edumala te menge memumuhat, 2 ne hendiyè kew te Suǥud-suǥud he Ben Hinom, he uvey te Pultahan te Ibpehendiyà te Timbaǥà te Egkengeǥevà he menge Ziniyun. Ne tudtula nu zutun is migkaǥi ku ziyà te kenikew. 3 Kaǥi ka te, ‘He menge hadì te Juda wey menge etew ziyà te Jerusalem, pemineǥa niw is menge lalag te Nengazen he Mekeǥeǥehem, he Megbevayà te Israel. Iyan heini migkaǥi zin: Ebpeeǥiyan ku te kezeetan heini he lugar he igketingkemed te minsan hentei he ebpekezineg duen. 4 Umbe ebeelan ku heini, su inselikwey a te menge etew ku, ne heini he suǥud-suǥud midhimu zan he pemuhatà te menge pemuhat he edtutungen he para te zuma he menge ed-ezapen. Menge ed-ezapen he wazè dan ganì mekilala wey minsan is menge kepuun dan wey is menge hadì diyà te Juda ne wazà mekekilala. Ne ebpenhimatey pa sikandan te wazè pa hanew he menge vatà kayi he lugar. 5 Mibpetukud pa sikandan te menge simbahan he para ki Baal, ne zutun dan ibpemuhat is menge anak dan he pemuhat he edtutungen para kandin. Wazè ku heini isuǥù kandan; wazè ku ganì meisip heini. 6 Umbe, pengandam kew, su iyan a, is Nengazen migkaǥi te egkeuma is timpu he heini he lugar kenè en maan egngezanan te menge etew te Tofet etawa Suǥud-suǥud he Ben Hinom, kekenà, egngezanan dan te Suǥud-suǥud he Lepeey. 7 Kayi he lugar edezeetan ku is pelanu te menge tig-Juda wey menge tig-Jerusalem. Ibpehimetayan ku sikandan te menge kuntada zan pinaaǥi te tebek, ne ibpekaan ku is menge lawa zan te menge tagbis wey zumezaas he menge langgam. 8 Ibpezezeetan ku heini he inged ne egkehimu heini he edsudien. Egkeinuinu is langun he edsaǥad ne ebpekepenerektek sikandan tenged te kegkezeeti kayi. 9 Edliǥuyan heini he inged su edhimetayan is meǥinged kayi te menge kuntada zan. Egkeeminan is menge meǥinged duen te keenen. Umbe, egkeenen dan en is duma zan he etew, minsan is menge anak dan.’ ” 10 Ne migkaǥi is Nengazen kayi te kedì te, “Rupeta nu is umuy ziyà te etuvangan te menge etew he eduma kenikew. 11 Ne keǥiyi nu sikandan te, iyan a, is Nengazen he Mekeǥeǥehem migkaǥi te, ‘Ebpurungan ku edezeeti is Juda wey is Jerusalem iring te kegkerupet kayi te umuy he kenè en egkehimu he ebpurungan. Ibpenleveng is utew mahabet he ebpematey ziyà te Tofet taman te wazè en lugar he egkelevengan. 12 Iyan heini ebeelan ku ziyà te Jerusalem wey te menge meǥinged kayi. Ed-isipen heini he meremerik iring te Tofet. 13 Uya, is langun he ubpeey ziyà te Jerusalem, ragkes en is turuǥan te menge hadì te Juda, ed-isipen he meremerik iring te Tofet. Diyà te atep kayi he menge valey, edtutung is menge etew te menge veyewà he para te ed-ezapen dan he menge vituen, wey ebpemuhat dan kayi te pemuhat he inumen he para te zuma he menge ed-ezapen.’ ”

14 Ne mid-awà si Jeremias diyà te Tofet, he zutun din keǥiya is menge lalag te Nengazen, ne midhendiyà te lama zuen te valey te Nengazen ne migkeǥiyan din is menge etew te, 15 “Pemineg kew, su iyan heini migkaǥi te Nengazen he Mekeǥeǥehem, he Megbevayà te Israel: Ibpaaǥi ku kayi he inged wey ziyà te menge inged he nekeelingkus kayi is kezeetan he nekaǥi ku he idezaat kandan, geina te utew sikandan mesinupaken ne wazè dan mebpemineg te menge lalag ku.”