1 Hein meǥurang en si Samuel, mibpilì din is menge anak din he egkehimu he pengulu te Israel. 2 Si Joel is kakey, ne si Abia is hazi. Iyan sikandan nehimu he menge pengulu ziyà te Beersheba. 3 Piru wazè dan sunuza is ulaula te amey zan. Edhuna ziyà te gehinawa zan is selapì, edawat dan te sipsip, wey edtuisen dan is hustu he kukuman.

4 Umbe, midtiǥum is langun he pengulu te Israel, ne midhendiyè dan te ki Samuel ziyà te Rama. 5 Ke sikandan te, “Meǥurang ke en; ne is menge anak nu ne wazè dan meiringi is meupiya he menge vaal nu. Guntaan, beǥayi key te hadì he ed-uwit kenami, iring te zuma he nasyun he zuen dan hadì.” 6 Dutun midmezaat is gehinawa ni Samuel te ebuyuen dan, ne zutun nengemuyù sikandin diyà te Nengazen. 7 Midtavak is Nengazen te pengemuyù din, ke sikandin te, “Tumana nu is egkeǥiyen dan kenikew; su kenè ka iyan mid-iniyuǥan dan, kekenà, siak. 8 Puun pa te kebpeǥewasa ku kandan diyà te Ehipto taman guntaan, ed-iniyuǥan e zan su iyan midsilbiyan dan is duma he menge ed-ezapen. Ne ǥuntaan iyan ded ebeelan dan kenikew. 9 Uya, pezumazuma kad te ebuyuen dan, piru petizeeni nu zà sikandan ke hengkey is ebeelan te hadì he edumala kandan.”

10 Midtudtul ni Samuel ziyà te menge etew he ebuyù te hadì diyà te kandin is langun he migkaǥi kandin te Nengazen. 11 Ke sikandin te, “Iyan heini ebeelan te hadì he ed-uwit keniyu: egkuwaan din is menge anak niw he maama ne edsunderuwen din. Is duma edhimuwen din he menge pereuntud te kerwahi, is duma ne iyan pereuntud te kudà, ne is duma ne iyan edhuna zutun te menge kerwahi. 12 Is duma kandan edhimuwen din he menge upisyal he edumala te tig-1,000 he sundaru, ne is duma 50 he sundaru. Ne is duma ne ibpeeradu te pemuleey zin wey ibpeeǥani te sebpet din, ne is duma ne ibpepandey zin te menge ǥumaan para te tebek wey zuma pa he menge gelemiten para te kerwahi. 13 Ne is menge anak niw he menge vahi, ne egkuwaan din he para perevaal te pehemut wey ibpepenlutù. 14 Egkuwaan din is pinekemeupiya he vevesukè niw, menge pemuleey niw te paras, wey is menge pemuleey niw te ulibu, ne ibeǥey zin heini te menge suluǥuen din. 15 Egkuwaan din is ikepulù te egkeraǥun niw he trigu wey menge paras, ne ibeǥey zin heini te menge upisyal zin wey te zuma pa he menge suluǥuen din. 16 Egkuwaan din daan is menge suluǥuen niw he menge maama wey menge vahi wey is pinekemeupiya he vaka niw wey menge asnu ne ziyè din egemita te kandin he terebahu. 17 Egkuwaan din pa is ikepulù te menge uyaǥen, ne egkehimu kew he menge uripen din. 18 Emun egkehitavù en heini, ebpekevuyù kew en maan te tavang te Nengazen tenged te kebpeǥesa keniyu te hadì he mibpilì niw. Ne zutun kenè kew edtevaken te Nengazen.”

19 Piru wazè dan pemineǥa is menge sambag ni Samuel. Ke sikandan te, “Kenà egkehimu! Egkesuatan dey he zuen hadì he ed-uwit kenami. 20 Para egkeiringan dey is duma he menge nasyun he zuen dan hadì su wey zuen ebmandù wey ebpengulu kenami te kebpekidtebek.” 21 Dutun te kegkezineǥa ni Samuel te langun he migkaǥi te menge etew, migkaǥi zin heini ziyà te Nengazen. 22 Ne midtavak is Nengazen kandin te, “Pezumdumahi nu is egkesuatan dan; beǥayi sikandan te hadì.” Ne migkeǥiyan ni Samuel is menge Israilihanen te, “Uya, iyan egketuman is egkesuatan niw; ulì kew en diyan te inged niw.”