10
Kutumidwa kwa ateweri makumi manomwe na awiri
1 Pomwe adamala bzimwebzo, Mbuya adasankula pomwe ateweri winango makumi manomwe na awiri aciwatuma kuti abakatsogole awiri-awiri, kumizinda na mii yentse yomwe iye angadadzayenda. 2 Ndipo iye adawauza kuti:
“M'bvuno nguzinji. Tsono anyakubvuna mban'gonon'gono. Ndipo kumbirani Mbuya mwenekaciro mindayo kuti akutumizireni wanthu kuti akabvune. 3 Ndokoni! Tsono dziwani kuti, ndiri kukutumizani ninga mabira pakati pa pamphumphi. 4 Lekani kutakula bzikhwama, ayai budu, ayai xango. Ndipo lekani kumusana na wanthu munjira.
5 Mukafika panyumba iri yentse, cakuyamba muwauze kuti: “Ntendere mbaukhale pano!” 6 Panyumba imweyo pakakhala pana munthu omwe an'funa ntendere, ndipo ntendereyo un'khala na iye. Tsono pakakhala palibe munthu omwe aniufuna, iwo un'bwerera pomwe kuna imwepo. 7 Na tenepo khalani panyumba imweyo, ndipo mucidya na kumwa bzomwe an'kupasanibzo. Thangwe munthu ali wentse omwe am'phata basa bzinfunika kuti atambire malipiro yace. Lekani kucoka panyumba yomwe mwafukirayo muciyenda nyumba inango. 8 Mukafika munzinda uli wentse, mucitambiridwa bwino, dyani bzomwe an'kupasanibzo. 9 Limbisani atenda omwe ali m'mwemo, muciwauza kuti: “Umambo bwa Mulungu bwakufikirani.”
10 Tsono mukafika mumzinda mucisaya kutambiridwa bwino, phatani njira muyende muciwawuza kuti: 11 “Napo pfumbi lentse lomwe latisvipiza mumzinda mwanu muno, tiri kukukutumulirani. Na tenepo dziwani kuti Umambo bwa Mulungu bwafika.” 12 Ndiri kukuwuzani pomwe kuti pantsiku yakutongeduwa nyathwa ya Sodoma in'dzakhala in'gono kuposa ya mzinda umweyo.
Nyathuwa kuna mizinda yakusaya kukhumbula
13 Nandi iwe Korazi! Na iwembo Betsaida! Yangadakhala kuti matsenga yomwe yacitika kumwekoyo, yacitikira kumzinda wa Tiru na Sidoni, wanthu wa m'mwemo angadabvala mausakala acibvumbvulika padotha kuti cikhale cizindikirokuti iwo aleka kucita bzakuipa. 14 Ndipo kuna Tiru na Sidoni, nyathwa yawo in'dzakhala ing'ono kuposa yanu pantsiku yakutongedwa. 15 Na iwembo Kafarnau, kodi un'kumbuka kuti un'dzabzikwiza mpaka kudzulu? Tsono iwepo un'dzathusidwa m'cidindi ca moto!
16 Na tenepo ule omwe an'kutetekeraniyo, na inembo wanditetekera. Na ule omwe an'kulambaniyo, na ine wandilambambo. Ndipo ule omwe andilambayo, walambambo ule omwe adandituma.
Kubwerera kwa anyakutumidwa makumi manomwe na awiri
17 Pomwe ateweri makumi manomwe na awiri adabwerera akhadakomeduwa acimuwuza kuti: “Mbuya, na bziwanda kubodzi bzikhatibvera mudzina lanu.” 18 Ndipo Jezu adawatawira aciti:
''Ine-pano ndamuwona Sathani acigwa ninga mpheni iri kucokera kudzulu. 19 Tsono ndidakupasani kale mphambvu zakuphata nazo nyoka na anyankalize na manja. Ndipo mucikunda mphambvu zetnse za nyamadulanthaka. Ndipo palibe cinthu comwe cin'dzakucitani kuipa. 20 Na tenepo lekani kukondwa nakuti bziwanda bzikhakubverani. Tsono kondwani thangwe madzina yanu yadanembedwa kudzulu.”
Jezu adakondwera Babace
21 Panthawe imweyo, Jezu adakondwa kwene-kwene na thangwe ra Mzimu Wakucena acilewa kuti:
''Ndiri kukupasani mbiri imwe Baba Mulungu, Mbuya wakutonga kudzulu na pantsi. Nakuti imwepo mudabisira bzinthu bzimwebzi wanthu waluso na wakupfundza. Ndipo mucibzilatiza kuna tuwana tung'ono-tung'ono. Na tenepo mudabzicita na thangwe ra cifundo canu.
22 Bzensenebzi adandipasa ni Babangu. Ndipo palibe munthu winango omwe an'dziwa Mwana kuposa Baba. Ndipo palibe pomwe munthu omwe an'dziwa kuti Baba mbani kuposa Mwana, mphambo wale omwe Mwanayo angafune kuwalatiza.”
23 Na tenepo Jezu adaceuka kuna ateweri wace aciwauuza kumphundzu aciti: “Yakusimbidwa ni maso yomwe yali kuwona bzomwe imwepo muli kuwonabzi! 24 Na tenepo dziwani kuti apolofeta na azimambo azinji akhafunambo kuwona bzomwe muli kuwonabzi. Tsono iwo alibe kubziwona. Ndipo na kubva bzomwe muli kubvabzi. Tsono iwo alibe kubzibva.”
Kutsika matere m'Samaliya wabwino
25 Pantsiku ibodzi adamuka munthu mwinango omwe akhali mpfundzisi wa mtemo. Na tenepo iye akhafuna kuyezera Jezu. Ndipo iye adam'bvundza kuti: “Misiri! Kodi ningacite tani kuti ndidzakhale na moyo wa kusaya kumala?” 26 Na tenepo Jezu adamutawira aciti: “Kodi ntemo udanemba ciani? Umbauwerenga tani?” 27 Ndipo iye adatawira aciti: “Udzacitire lufoi Mbuya Mulungu wako, na mtima wako wentse, na moyo wako wentse, na mphambvu zako zentse, na ndzeru zako zentse. Ndipo udzacitirembo lufoi mwandzako ninga momwe umbabzicitira iwepo.” 28 Na tenepo Jezu adamuwuza kuti: “Watawira bwino. Cita bzimwebzo na tenepo un'dzakhala na moyo wa kusaya kumala.” 29 Tsono iye nakuti akhafuna kubziyesa munthu wabwino. Ndipo iye adabvundza Jezu kuti: “Kodi mwandzanguyo mbani?” 30 Na tenepo Jezu adamutawira aciti: “Pakhana munthu m'bodzi omwe akhabuluka kucokera kuJeruzalema acimbayenda kuJerikoo. Ndipo iye adagumana na akapondo. Na tenepo iwo adam'khundula bzakubvala, acim'menya. Ndipo iwo adamusiya wafumphira. 31 Tsono baba wa ntsembe mwinango akhandobzipitirambo na njira, pomwe adamuwona, ndipo iye adamutsembera. 32 Ninga bzibodzi-bodzibzo adapitambo na pamwepo m'Levi, nyabasa wa nyumba ya Mulungu acimuwonambo. Ndipo iye adamutsemberambo pomwe. 33 Tsono m'Samaliya m'bodzi nyakudza omwe akhayendambo ulendo bwace, pomwe adafika pakhana iyepo acimuwona ndipo adam'bvera ntsisi. 34 Na tenepo adamutsuka bzirondabzo na mafuta na vinyu acimumanga. Pomwe adamala adam'pakiza pabulu. Ndipo adayenda naye kunyumba ya alendo acikamucengeta bwino. 35 Pomwe iye adaguduka mangwana yandzace adacosa kobiri ziwiri zandzaya acipasa nyakutambira alendo, acimuwuza kuti: “Ndicengeterenimbo munthuyu. Ndipo bzentse bzomwe imwe mun'cosabzo ine ndin'dzakulipirani pakubwerera.” 36 Kodi paatatuwa, mwandzace nguponi kuna ule omwe adamenyedwa na akapondo ule?” 37 Ndipo mpfundzisi wa mtemoyo adatawira aciti: “Mwandzce ngule omwe adamubvera ntsisi ule.” Na tenepo Jezu adamuwuza kuti: “Kacitembo bzibodzi-bodzibzo.”
Jezu adayenda kukawona Marta na Maliya
38 Pantsiku ibodzi Jezu na ateweri wace akhayenda na njira, ndipo adafika mui winango, m'mwemo mukhana mkazi m'bodzi dzina lace Marta omwe adamutambira panyumba pace. 39 Ndipo m'bale wace wacikazi Maliya adadzakhalambo na Jezupo acimbabva mafala yace. 40 Tsono Marta akhadedema yekha na basa. Ndipo iye adakamuwuza Jezu kuti: “Mbuya! Kodi imwepo muli kuwona lini kuti m'bale wanguyu ali kundilekerera basa ndekha-ndekha? Muwuzeni adzandithandizembo.” 41 Ndipo Mbuya adamutawira aciti: ''Marta, Marta! Una ciberefuwa nakucita bzinthu bzizinji. 42 Tsono, cinthu cibodzi cin'funika. Na tenepo Maliya wasankhula cinthu cabwino. Ndipo palibe munthu omwe angadzamutengere.”