7
Kulimbisidwa kwa nyabasa wa m'tsogoleri wa acikunda
1 Pomwe Jezu adamala kuuza wanthu bzimwebzo iye adayenda kuKafarnau. 2 Pakhana ntsogoleri m'bodzi wa dzana la acikunda. Ndipo iye akhana nyabasa wace omwe akhaduwala kwakuti penu-penu. 3 Pomwe iye adabva mbiri ya Jezu, adatumiza akulu-akulu wa ajudeu kuti akamukumbire abwere kudzamulimbisa nyabasa waceyo. 4 Pomwe iwo adafika kuna Jezuyo, adamukumbira na kuphata minyendo, aciti: “Iye an'themera kuti mumucitire bzimwebzi. 5 Nakuti iye ana lufoi kwene-kwene na wanthu wa m'dziko lathu lino. Ndipo iye watikonzera pomwe nyumba ya kupembera.” 6 Na tenepo Jezu adayenda nawo. Pomwe adafika pafupi na pamuipo, ntsogoleriyo adatuma axamwali wace kuti akamutambire na kukamuuza kuti: “Mbuya, lekani kubzidedemesa thangwe ine-pano ndiribe kuthemera kuti ndikucemereni mubere pantsaka pangu pano. 7 Na tenepo ndikhalibe kuthemera kudzakucemerani. Napo mucirewa na kuno bzomwe bzinfunikabzo nyabasa wanguyu an'limbe. 8 Napo ine ndine munthu omwe nimbatongedwambo na akulu wangu. Na tenepo ine ndina acikunda omwe ndiri kutongambo. Ndikauza m'bodzi kuti: “Ndoko!” Ndipo iye ambayenda. Ndikauza winango kuiti “Bwera!” Ndipo iye ambabwera. Mpaka nyabasa wangu ndikamuuza kuti, “Cita ici!” Ndipo iye ambacita. 9 Pomwe Jezu adabva mafala yamweyale adadabwa naye. Ndipo iye adaceuka kuna wanthu omwe akhamutewerawo aciti: “Ndiri kukuuzani kuti kucokera pham'pha na pham'pha la Jirayeri ndikanati kuwona munthu ninga omweyu.' 10 Pomwe wanthu akhadatumidwawo adabwerera kumui adakagumana nyabasayo walimba kale.
Kumuka paimpfa kwa mwana wa mansiwa wa kuNaimu
11 Pakupita ntsiku zing'ono-ng'ono, Jezu adayenda na ateweri wace kumzinda wa Naimu. Ndipo nthithi wa wanthu azinji ukhamutewerambo. 12 Pomwe adafika pafupi na cipata ca mzindayo ndipo adaguma wanthu omwe akhayenda kukapendesa mwana wa mansiwa omwe akhali iye yekha. Ndipo nthithi wa wanthu azinji ukhamuperekeza. 13 Pomwe Mbuya adawona mansiwayo adamubvera ntsisi kwene-kwene, acimuuza kuti: “Leka kulira!” 14 Ndipo iye adafendera pakhana baulupo, acirikhuya. Na tenepo wanthu omwe akhadanyamula adaima. Ndipo iye adalewa kuti: “Mulumbwana, lamuka! “ 15 Pamwepo mulumbwanayo adalamuka aciyamba kulewa-lewa. Na tenepo Jezu adamupereka kuna mai wace. 16 Ndipo wanthu wentse adabva mantha; acimbatumbiza Mulungu, aciti: “ Mpolofeta nkulu wabwera pakati panthu pano! Mulungu wabwera kudzathandiza wanthu wace lero!” 17 Ndipo nkhaniyo idabveka kuJudeya kwentse, na madziko ya pafupi.
Juwau M'batizi adatuma ateweri wace kuna Jezu
18 Ndipo ateweri wace Juwau adamuza bzentsenebzi. 19 Ndipo Juwau adacemera ateweri wace awiri, aciwatuma kuna Mbuya kuti akamubvundze kuti: “Kodi ndiwepo omwe tiri kudikhirayo? Ayai an'dzabwera pomwe winango?” 20 Pomwe iwo adafika kuna Jezu adalewa kuti: “Juwau M'batizi watituma kuti tidzakubvundzeni kuti, ' Ndimwepo omwe tiri kudikhirayo? Ayai an'dzabwera pomwe winango?” 21 Panthawe imweyo Jezu adalimbisa wanthu matenda yakusiyana-siyana. Ndipo adacosa wanthu mizimu yakuipa. Ndipo dapenyesa pomwe maso azimola azinji. 22 Ndipo Jezu adawatawira aciti: “Ndokoni mukamuuze Juwauyo bzentse bzomwe mwabva na kuwaona kuti: Azimola ali kuona, anyakulemala ali kufamba, anyamapere ali kupozedwa, ndipo anyakusauka ali kupalizidwa nkhani ya bwino. 23 Wakusimbidwa ngule omwe anisaya kuipidwa na ine.
Jezu adalewa bza Juwau M'batizi
24 Pomwe ateweri wa Juwau adayenda, Jezu adauwbvundza wanthu bza Juwau kuti:
“Mwakaonanyi mudambo? Mtete wakuvungika na condzi?” 25 Kodi mudakaona ciani kumweko? Munthu wakubvala bwino? Nakuti wanthu wakubvala bwino ambatumikira m'nyumba za azimambo. 26 Tsono mwakawonanyi? Mpolofetapolofeta? Inde, ndiri kukuuzani kuti iye amposa mpolofeta. 27 Nakuti omweyu ngule omwe adanembedwa kuti: “Ndin'dzabakatsogoza mtumiki kuti adzakukondzerere njira.
28 Tetekerani! Juwau ni mkulu kuposa wanthu wentse wa pantsi pano.Tsono ule omwe ni ng'ono mu Umambo bwa Mulungu ni mkulu kuposa Juwauyo.”
29 Na tenepo pomwe wanthu na anyakupimisa m'tsonko adabva mafala ya Jezu adadziwisisa kuti njira ya Mulungu njakulungama. Nndipo tenepo iwo adabatizidwa na Juwau. 30 Tsono afalizeu na apfundzisi wa mtemo adalamba kubatizidwa na Juwau. Na tenepo iwo adalambambo cifundo ca Mulungu.
31 Ndipo Jezu adabvundza Kuti: “Kodi mtundu omweyu wa wanthu, ningaundendemeze na ciani? Iwo ali ninga ciani? 32 Ndipo iwo adandemera na wana ang'ono omwe ambakhala munjira acimbauza andzawo kutii:
“Taimba mulumbwi, mulibe kubzina.
Ndipo cimbo ca ulombo, mulibe kulira.”
33 Pomwe adabwera Juwau M'batizi acimbasaya kudya mkate na kumwa vinyu, imwepo mudamulewa kuti iye ana cikwangwali. 34 Tsono Mwana wa Munthu wabwera omwe ali kudya na kumwa, imwepo mwati: “Onani ule ni mgopola, kaswa mkombo, xamwali wa anyakupimisa m'tsonkho na anyaphonya.” 35 Tsono nzeru za Mulungu zimbadziwika na wana Mulungu.”
Mkazi nyakuphonya adadzoza minyendo ya Jezu
36 Ndipo m'falizeu mbodzi adacemera Jezu kuti akadye naye kumui kwace. Pomwe Jezu adafika kumweko adapita acikakhala patsansali la kudyera. 37 Ndipo mkazi mbodzi nyakuphonya wa mumzindamo, pomwe adabva kuti Jezu akhadya m'nyumba mwa m'falizeu adabwera na ntsupa ya mafuta yakununchira. 38 Ndipo iye adadzaima m'mbuyo mwa Jezu acimbalira. Na tenepo misozi yace ikhagogera m'minyendo mwa Jezu.Ndipo mkaziyo akhambamupukuta na tsisi lace litali na kumbamumpsompsona m'minyendo. Na tenepo. iye akhambamudzoza na mafuta ya kununchira. 39 Pomwe m'falizeuyo adawona bzimwebzire adakumbuka muntima mwace kuti: “Munthuyu angadakhala ambavima, iye angadadziwa kuti mkazi ali kumukhuyayu ni nyakuphonya. 40 Ndipo Jezu adamutawira kuti: “Simau, ndin'funa kukuuza mafala.” Ndipo iye adatawira aciti: “Lewani Misiri.” 41 “Akhalipo amuna awiri omwe akhana mangawa na munthu winango. Mbodzi akhanaye mangawa makuku kwene-kwene ya bzulu bzixanu bza kobiri za safuli. Mwinangoyo akhanaye mangawa pang'ono ya makumi maxanu. 42 Tsono pa paawiriwo pakhalibe omwe akhana kobiri za kuti amubwezere. Ndipo iye adawalekera awiriwo. Kodi nguponi pa paawiriwo an'dzamutenda kwene-kwene mwenekaciro kobiri ule.” 43 Ndipo Simau adatawira kuti: “Ninkumbuka kuti ngule omwe walekeredwa mangawa ya kobiri zizinji.” Pamwepo Jezu adamutawira kuti: “Walewa bwino.” 44 Na tenepo Jezu adaceuka kuna mkazi ule acim'bvundza Simau kuti: “Kodi uli kuwona mkaziyu? Ndapita m'nyumba mwako muno iwepo ulibe kundipasa madzi ya kusamba m'minyendo. Tsono iye, wanditotesa na misozi acindipukutiratu na tsisi race. 45 Iwepo ulibe kundimpsompsona, tsono ine ndandoti piteni pezi iye alibe kulekeza kundimpompsona m'minyendo. 46 Iwepo ulibe kundidzoza mafuta munsolomu, koma iye ndiye wandidzoza mafuta yanunchira m'minyendo mwangumu. 47 Na tenepo dziwa kuti, kuphonya kwace kwalekeredwa thangwe walatiza lufoi likulu. Tsono ule omwe anilekeredwa pang'ono thangwe iye ana lufoimbo pang'onombo.” 48 Ndipo Jezu adamuuza mkaziyo aciti: “Kuphonya kwako kwalekeredwa.” 49 Panthawe imweyo alendo anango winango wale akhabvundzana aciti: “Kodi omweyu mbani ali kulekera bzakuipayu?”
50 Na tenepo Jezu adamuuza mkaziyo kuti: “Cikhulupiro cako cakupulumusa. Ndoko na ufulu.”