3
Kupaliza kwa Juwau M'batizi
(Luka 3:1-20) 1 Pakupita magole khumi na maxanu ya mambo mkulu Tiberiyo, Pontsiyo Pirato akhali mtongi wa kuJudeya. Erodi akhali mtongi mkulu wa kuGalileya ndipo m'bale wacembo Firipi akhali mtongi mkulu wa kuItuleya na kuTalakoniti. Ndipo Lizanya akhali mtongimbo mkulu wa kuAbilenya. 2 Yanasi na Khefasi akhali akulu-akulumbo wa azibaba wa ntsembe. Panthawe imweyo, Mulungu adalelewa na Juwau, mwana wa Zakaliya mudambo. 3 Ndipo Juwau adayenda kukapaliza batizo lakuti akhumbule bzakuipa bzawo kumadziko yomwe yakhali m'phepete mwa m'kulo wa Jordau, 4 ninga momwe lidanembera bukhu la m'polofeta Zaiya liciti:
“Fala liri kulewa kuti kondzani njira ya Mbuya, fungulani miseu ya kulungama”. 5 Bzigwa bzentse bzindzakhala na tumitunthu. Mapiri na tumapiri bzindzayalazidwa. Njira zentse zakugonyoka zindzalungamizidwa. Na zentse za mapoli-kata zin'dzayalasidwa. 6 Wanthu wentse an'dzawona mpulumusi wa Mulungu.
7 Ndipo Juwau akhawauza wanthu wale omwe akhafuna kubatizidwa aciti:
Nandi wana wa nyokamwe! Kodi mbani wakuuzani kuti muthawe nyathuwa yomwe iri kubwerayo? 8 Citani bzinthu kuti bzilatize kuti mwaleka bzakuipa bzanu cadidi! Lekani kunamizana kuti ndimwe wana wa Abramuau. Tsono ine ndiri kukuwuzani kuti Mulungu angasanduse minyalayi kuti ikhale wana wa Abramu. 9 Nakuti mbadzo idakondzekera kale kuti igwate mizi ya miti, thangwe muti uli wentse omwe un'bala lini bzisapo bzabwino, un'dzagwatidwa uciyeseredwa pamoto.
10 Ndipo wanthu azinji akham'bvundza aciti: “Kodi tsono ticite tani?”
11 Ndipo iye adawatawira aciti: “Ule omwe ana bzakubvala bziwiri mbaapasembo cibodzi omwe alibe, na ule omwe ana cakudya mbaacitembo bzibodzi-bodzibzo.”
12 Adabwerambo anyakupimisa mtsonkho kuti adzabatizidwembo, ndipo iwo adam'bvundza kuti: “Misiri, kodi ife-panombo tin'cite tani?” 13 Iye adawatawira aciti: “Lekani kupimisa bzizinji kuposa bzomwe mwauzidwa.”
14 Na acikunda adam'bvundzambo kuti: “Kodi ife-panombo ticite tani?”
Iye adawatawira aciti: “Lekani kutengera bzinthu wanthu na mpembe, ayai kuwanamizira mulandu. Kondwani na kobiri zomwe mumtambira pamwezi.”
15 Tsono wanthu akhana cikhulupiro cikulu ndipo akhakumbuka kuti Juwauyo akhali Krixtu. 16 Ndipo Juwau adawatawira wentse aciti:
N'cadidi kuti ine-pano ndiri kukubatizani na madzi. Tsono, ali kubwera mkulu kuposa ine-pano, omwe ndin'kwanisa lini kutsudzula nthambo za xango zace, omweyo andzakubatizani na Mzimu wa Kucena na moto.” 17 Iye ana cisero m'manja kuti awungule mapira na mungu. Mapira andzakaikha m'gwanga ndipo acikatentha mungu na moto wa kusaya kuthima.
18 Ndipo iye adapalizira wanthu fala la Mulungu na njira zakusiyana-siyana.
19 Na tenepo iye adatsimula Erodi mtongi mkulu, thangwe ra kutenga Erodiya, mkazi wa m'bale wace, na bzinthu bzinango bzakuipa bzomwe Erodiyo adacita. 20 Ndipo adaphonyeratu kwene-kwene pakupindza Juwau mkaoko.
Kubatizidwa [and Temptation na kuyedwa kwa Jezu
(Luka 3:21-4:13)
21 Wanthu wentse akhabatizidwa, ndipo Jezu adabatizidwambo. Pomwe iye akhapemba, kudzulu kudafunguka. 22 Na tenepo Mzimu Wakucena udabuluka ninga nkhangaiwa. Ndipo fala lidabveka kudzulu liciti: “Iwepo ndiwe Mwanangu wapamtima. Ndimbakomedwa nawe kwene-kwene.”
Dzindza la Jezu from the time of the exiles
(1 Cron 3:17-24)
23 Akhadziwika kuti akhali mwana wa Zuze, Eri, 24 Matati, Levi, Mereki, Janaya, Zuze, 25 Matatiasi, Amosi, Naumi, Esiri, Nagai, 26 Maati, Matatiasi, Simei, Zuzeki, Jodaa, 27 Juwana, Leza, Zolobaberi, Salatiyeri,
Dzindza la Jezu panthawe ya Mambo Davide
(1 Cron. 3:1-16)
Neri, 28 Meleki, Adi, Kozami, Erimadami, Eri, 29 Joxuwa, Eriyezeri, Jolimi, Matati, Levi, 30 Simioni, Juda, Zuze, Jonami, Eriyakimi, 31 Mereya, Minani, Matati, Natani, Davide,
Dzindza la Jezu panthawe ya Mkulu Abramu
(Gen. 17:5)
32 Jesi, Obedi, Bwazi, Sala, Nasomi, 33 Aminadabi, Dimimi, Alini, Ijiromi, Perezi, Juda, 34 Jakobi, Izaki, Abramu,
Dzindza la Jezu panthawe ya Mkulu Wakuyamba Adamu
(Gen. 5:1-32, 11:10-13)
Tale, Nakoli, 35 Saluki, Lagau, Faleki, Ibero, Sala, 36 Kainani, Alufaxadi, Semi, Nowe, Lameki 37 Matusala, Inoki, Jaledi, Malalero, Kainani, 38 Inosi, Seti, Adamu.
Ndipo Adamu akhali mwana wa Mulungu.