4
Iri lau ta Kindrei kasahan kamwenen
1 Jo Pol, jo udu bolo asiu lulik, ta amekes gok ta Laban dah. Eme ma, jo batanau aha boto-on. Bwena mene, iri atiye sahou mwasin ewek taha, ma aha atehei budon handru in ta Jises. Eme ma, aha ka-en hamon ta kandriyen amwenen ta kohan handru. 2 Aha winiyan batebelese bala tiri mwan ma badih rayah ja bwe. Aha kanuhun sahou tiri ma aha kado le. Ndrine aha sato-ou suwi ta losen sala tiri lau nane amekes ndra-in ewek taha. Aha kaso-ok iri lau ta Kindrei rayah ja, ma sandrek iri ta a-en hamon ta kandriyen aha amekes. 3 Malawin Ndrabun aseben taha ado mwasin, ma lakou doh iy amekes, i buku malou tabuwi taha ahis are le se. Eme ma aha kabadok ta ateu lakou doh kihis. 4 Taha lau ta Kindrei i buku bada taha ari le, ma Malawin Ndrabun ari le udu aliy. Ma udu aliy ale lakou ari laba tinan taha marakon atondrok ta akohok udu kandrah. Lakou doh, Kindrei aloh taha ta akohok hawe iri mwan ma badih tan. 5 Ma Laban ari le laba tinan badeh, Krais. Ma sahou mwasin ari ale taha atehei budon handru in tan le. Ma nyaran badeh, ari le ale mene anyu taha na aliy. 6 Ma Kindrei ari le, iy le ari tama taha marakon. Iy le ari udu bwele-en labai tiri mwan ma badih, ma iy ibo gok ndrokowa iri mwan ma badih, ma iy udu bolo iri mwan ma badih marakon, iri atehei budon tiri handru in tan le ari.
7 Handru, bada taha marakon ari le ta Krais. Arile, iy anyohan taha ari, ari na ndramas laba tinan labai ta i le winiya taha ari, ari ta amekes gok tan, 8 i buku le buk ndrabun asehek:
“Krais andrei iri mwan ma badih solo-an labai are bolo asiu lulik, ma iy tiyani iri ala loken. Ma iy edeu ndramas ili tiri mwan ma badih ado bwele-e munyak.” Wari 68:18
9 Ya sahou dah, “Iy ili loken,” saba moson ta aliy doh? Iy ndra-au ndrala loken le? Bwe, moso sahou tan i buku doh: Ma mwena iy iu ili andri bolo kon tiri lau ndramak ndra-au ndrasu-u.* Ndrahu kon tiri lau mene ndramak ndra-au badeh, iri Hiburu aloh se-ol, ma taha Nyindrou aloh su-u. Ou anyolom in ta Tarou ta Mak kalan 12:27, ma hawe 1 Pita kalan 3:19. 10 Ya, ndramak doh ma mwena iy iu ili andri, ano ja iy iu ili loken ale. Iy iu ili loken kon handru ta Kindrei udu aliy ta iri lakou marakon winiyan idih na le Krais. 11 Ndramak doh, iy amwenen edeu ndramas ili tiri mwan ma badih. Ma iy edeu ndramas i buku doh: Iy edeu ndramas ili tiri rayah ta amekes gok aposel. Rayah ta amekes gok propet, rayah ta atiye sahou tan ili kon rakon, rakon. Ma rayah iy edeu ndramas ta atondrok iri lau ta Kindrei, o lau ta leheya. 12 Krais edeu iri ndramas doh ta aseben taha mwan ma badih ta Kindrei winiyan amekes gok tan amwenen. Ma gok tan doh ta amekes taha mwan ma badih solo-an ja kasahan kabadok kahis hawen buku badan amwenen. 13 Ma gok dah kameh ili, ili winiyan le taha marakon atehei budon handru, ma budon tataha randra le kudu aliy, ma taha katanan Nadu Kindrei ale. Eme ma, taha kameh asahan lau awas handru winiyan i buku le Krais. 14 Buku taha asahan i buku doh, badeh, taha winiyan bado buku nadu nah bwisik ja, ta budon taha ateu bwe. Ma iri sahou wasai marakon tiri lau ta tamar winiyan batoroyani budon tataha bwe, ma taha winiyan asahan buku ndron udu bolo bayau. Ma idoh ale winiyan baruwi taha buku jor aluhi ndron bwe, ma taha winiyan bateheh laleyah bwe, ma mani budon handru.
15 Taha kaso-ok iri mwan ma badih, ma kasehek le sahou handru. Buku taha amekes i buku doh, taha kameh asahan boto-on handru, ma ahis handru hawe Krais, iy udu bwele-e taha mwan ma badih. 16 Krais badeh, udu bwele-e taha, iy amekes taha marakon, i buku mine taha, kati taha, mada taha, ma lakou badu badan. Iy aseken taha kabo gok ki-in hamon ta tanan ma nyamun, iy le edeu eme tataha ari, ari. Ma taha badeh, badan ranah ai, taha aseben taha ari, ari, eme ma taha marakon ahis le hawen. Na kandriyen doh, bada taha apar i tinan, ma i boto-on handru. Tasah, kandriyen ta aso-ok Kindrei, ma Kindrei aso-ok taha kasahan ki tinan mara-ei.
Lau ta Kindrei badeh, ka-en hamon ta kandriyen ha-un
17 Ta nyara Laban, jo anya kabatanau aha ki buku doh: Aha sa-en hamon ja, ta kandriyen tiri mwan ma badih badu kon munyak, iri tanan Kindrei bwe. Budon tiri badeh, ari katin bwe. 18 Budon ma ndrine iri badeh, ari tanan ta lakou ta Kindrei badeh, bado se aliy bwai. Iri a buku iri lau adek na lulik, ma iri bateu sun ta lomada san tiri bwe. Ya, ari tanan mwasin bwai, ndrine iri ihis, ma iri baso-ok sahou ta Kindrei bwe. Eme ma, iri are len labai ta kohan mwasin, Kindrei edeu ili tiri lau. 19 Bwili iri bama ja bwai. Eme ma, iri ndra-en hamon ta kandriyen ndra-in, ma ndrine iri ato-ou suwi ta amekes kandriyen solo-an ta karei, ma iri tikisiy labai ta amekes.
20 Arile, kandriyen ta Krais, iri lau mene awek leheya aha ta aliy, badeh, bala buku lakou doh bwe. 21 Jo tanan, aha ndranuhun sahou handru ta Krais, ma iri ndraleheya aha ta iri kandriyen iy aso-ok taha ka-en hamon ta aliy. 22 Sahou ta Krais dah badeh, i buku doh: Bwena mene, aha a-en hamon ta so-ok ta bada aha le amwenen. Iy aso-ok labai, iri kandriyen ta wasai, ma madalakis laleyah, ma hawe kandriyen doh badeh, bokoro-ei iy le. Eme ma, aha karuwi kandriyen malen doh udu ndrine aha keme len. 23 Ya, budon taha kaleu, ma kasahan ha-un. 24 Aha kasahan ha-un ja. Kindrei le amwenen amekes kohan ha-un doh, ma asahan buku Kindrei amwenen. Kandriyen ta kohan ha-un doh, ta amekes taha asahan ndrabun ma mwasin labai ta mada Kindrei.
25 Eme ya, aha sasehek sahou wasai ja ai. Aha kasehek le sahou handru kili tiri mwan ma badih, tasah aha ado bada ndramak ari le. 26 Ma ale, buku aha andra-i ta lakou, ya, bale aha kudu aliy!
“Kora-on aha kandra-i ma amekes kandriyen ndra-in.” Wari 4:4
Kora-on losen taha udu aliy, winiya le an amai iu ili andri na beyeh, ma aha tawi losen doh udu le gwek kahis. 27 Kandriyen ta losen doh, sihi kou ili le ta balik, ta iy eme bolo koha aha, ma aliu aha ta amekes kandriyen ndra-in. 28 Ya, sahou randra ja udu aliy. Iri lau ta bahana, winiyan babahana ja bwe. Na dah, iri kamekes gok. Iri kamekes gok mwasin na le mine iri amwenen, ma tiri lakou kudu aliy, ta adeu kili tiri lau lakou bwe. 29 Aha samukuni boho aha ta asehek iri sahou luhe. Sahou mwasin le kameh winiyan aseben iri mwan ma badih badeh, asahan mwasin. Iri sahou mwasin doh winiyan ta atadau iri mwan ma badih anya kataku, ma ta adeu seben ta Kindrei ili tiri mwan ma badih nane anuhun sahou taha. 30 Aha samekes ndrine Malawin Ndrabun ta Kindrei sandra-i, ta kandriyen aha a-en hamon ta aliy. Aha kabudon kamwenen. Kindrei ndratehei Malawin Ndrabun buku kalem ndrawek taha ta aha katondrok len ta Kindrei eme akohok taha ame hamon ja. 31 Eme ma, taha karuwani iri kandriyen ta ndrine taha ndra-in, losen, ndrinem ato-ou, sahou tebelese, sahou sondrokonya. Ma aha samekes bahun laleyah sala tiri lau. 32 Aha kamekes kandriyen mwasin kili tiri lau rayah, ma ndrine aha kamunum kili tiri. Aha kamani kandriyen ndra-in tiri, i buku le Kindrei mani taha in ta bwele-e nyara Krais.
*4:9: Ndrahu kon tiri lau mene ndramak ndra-au badeh, iri Hiburu aloh se-ol, ma taha Nyindrou aloh su-u. Ou anyolom in ta Tarou ta Mak kalan 12:27, ma hawe 1 Pita kalan 3:19.