1 Kangʼoosi alɨnkwabʉla ɨkɨkolekelo ɨkya bʉhaano na bʉbɨlɨ. Kʉmwanya kwamyekile akabalɨlo akapimba.* 8:1 Akabalɨlo akapimba NKɨgiliki bikʉtɨ Ɨnuusu ɨjaa sala jɨmo bʉno. 2 Po ndɨnkʉbabona abandʉmi bahaano na babɨlɨ aba bikwɨma nkyeni mwa Kyala, balɨnkʉpeeligwa ɨngangabwite ihaano na ibɨlɨ.

3 Joope ʉgwandʉmi ʉjʉngɨ alɨnkwisa, alɨnkwɨma nkyeni nkɨgemo, aakolile ʉlwangabya ʉlwa sahabʉ ʉlwa kʉfuukɨsya. Alɨnkʉpeeligwa ɨfya kʉfuukɨsya fingi, ʉkʉtɨ abɨɨke pamopeene nɨ nyiipuuto sya bandʉ baa Kyala boosa pa kɨgemo ɨkya sahabʉ, ɨkɨ kɨlɨ nkyeni nkɨkota ɨkya bʉtwa. 4 Ɨlyosi ɨlya tʉndʉ ʉtʉ tukʉfuuka, lɨlɨnkʉfuuka nkyeni mwa Kyala pamopeene nɨ nyiipuuto ɨsya bandʉ baa Kyala, ʉkʉfuma nkɨboko ɨkya gwandʉmi.

5 Po ʉgwandʉmi ʉjo alɨnkwega ʉlwangabya lʉla ʉlwa kʉfuukɨsya, alɨnkʉbɨɨkamo ʉmooto ʉgwa pa kɨgemo, alɨnkoonela nkiisʉ. Kʉlɨnkʉja nɨ fimweku ɨfya njasi nʉ kʉtajanika kwa njasi na kasenyenda.

6 Po abandʉmi bala bahaano na babɨlɨ aba baalɨ nɨ ngangabwite ihaano na ibɨlɨ, balɨnkwitendekesya ʉkʉtɨ basikʉbe.

7 Po ʉgwandʉmi ʉgwa kwanda alɨnkʉkʉba ɨngangabwite jaake. Nakalɨnga kʉlɨnkʉja nɨ fula ɨjaa mabwe nʉ mooto ʉgʉ gongeene ni ilopa, filɨnkʉtaagigwa nkiisʉ. Po ɨkɨjabo kɨmo ɨkya kiisʉ gɨlɨnkʉpya ɨmipiki nɨ liisʉ iibɨsi lyosa.

8 Joope ʉgwandʉmi ʉgwa bʉbɨlɨ alɨnkʉkʉba ɨngangabwite jaake. Akandʉ aka kalɨ bo ɨkyamba ɨkɨnywamu ɨkɨ kyakaga ʉmooto, kalɨnkʉtaagigwa mu nyanja. Po ɨkɨjabo kɨmo ɨkya nyanja kɨlɨnkʉja ilopa, 9 ɨfipeligwa ɨfyʉmi ɨfi filimo mu nyanja ɨkɨjabo kɨmo filɨnkʉfwa, ɨkɨjabo kɨmo ɨkya sitima kɨlɨnkoonangɨka.

10 Joope ʉgwandʉmi ʉgwa bʉtatʉ alɨnkʉkʉba ɨngangabwite jaake. Ʉlʉtondwa ʉlʉnywamu lʉlɨnkʉsatʉka ʉkʉfuma kʉmwanya, ʉlʉ lwakaga bo ʉlwa nyaale, lʉlɨnkʉgwɨla ɨkɨjabo kɨmo ɨkya nyɨɨsi, nɨ kɨjabo kɨmo ɨkya nyiibʉko ɨsya mɨɨsi. 11 Ɨngamu jaa lʉtondwa ʉlo baatɨgɨ Bʉkalɨ. Po ɨkɨjabo kɨmo ɨkya mɨɨsi galɨnkʉja makalɨ. Abandʉ bingi balɨnkʉfwa kʉ mɨɨsi ago, paapo amɨɨsi gaajile makalɨ fiijo.

12 Joope ʉgwandʉmi ʉgwa bʉna alɨnkʉkʉba ɨngangabwite jaake. Kʉkabalɨlo iisʉba, ʉmwesi nɨ ndondwa filɨnkʉkomigwa, ʉkʉtɨ fije nɨ ngiisi kʉkabalɨlo. Po kʉkabalɨlo ako fikaamulɨkaga pamuusi na pakɨlo.

13 Ndɨnkʉkeeta kʉmwanya. Ndɨnkʉpɨlɨka iisyʉ ɨlya ipʉʉla lɨmo ɨlɨ likʉpululuka mmwanya, lɨlɨnkʉlaata ʉkʉjoba lɨlɨnkʉtɨ, “Ahɨɨli! Ahɨɨli! Ahɨɨli! Kʉlɨ aba balɨ pakiisʉ! Kʉnongwa jaa isyʉ lya ngangabwite ɨsi sisyele ɨsya bandʉmi batatʉ, aba biitendekiisye ʉkʉsikʉba.”