4
Abiitɨki baa Jesu balɨ kandʉ kamokeene
1 Po leelo ʉne ne mpinyigwa kʉnongwa jaa kʉmmbombela ʉNtwa Jesu, ngʉbapyelesya ʉkʉtɨ mujege nkajɨɨlo aka kafwene na muno Kyala aababɨlɨkiile. 2 Mujege nʉ lwijiisyo fiijo, kangɨ mujege booloolo ndɨ syosa. Amupaakɨsaniege kʉ lʉgano. 3 Mwijʉʉlege ʉkʉbʉlɨndɨlɨla ʉbʉlɨɨlanisi bwɨnu, ʉbʉ mupeeliigwe na Mbepo Mwikemo, kʉ njɨla jaa lʉtengaano ʉlʉ lʉbalʉngeenie. 4 Gʉliko ʉmbɨlɨ gʉmogwene, na Mbepo jʉmojwene, bo ʉlwa lʉsʉʉbɨlo ʉlʉ tʉbɨlɨkɨliigwe na Kyala lʉlɨ lʉmolwene. 5 Aliko ʉNtwa jʉmojwene, ʉlwitɨko lʉmolwene, ʉloosyo lʉmolwene. 6 Kangɨ aliko Kyala jʉmojwene, ʉjʉ jo Taata gwa boosa, alɨ pamwanya palɨ boosa, ikʉbomba ndɨ boosa, alɨ nkatɨ ndɨ boosa.
7 Looli kʉkʉtɨ mundʉ akabile ɨliipyana, ʉkʉkongana nɨ kɨpɨmɨlo kya kɨkʉngɨlwa, ɨkɨ atʉpeele Kɨlɨsiti. 8 Po apa Kalata ʉMwikemo ikʉtɨ,
“Bo ikʉfyʉka kʉmwanya fiijo,
aafyʉkile nabo abapinyigwa bingi,
aabapeele abandʉ ɨfikʉngɨlwa fyake.”* 4:8 Bala kalata gwa Ɨsabʉli 68:18.
9 Po ʉlʉ iisyʉ likʉtɨ, “Aafyʉkile kʉmwanya,” kokʉtɨ fiki? Kokʉtɨ, kʉbwandɨlo aasulwike paasi fiijo pakiisʉ. 10 Po ʉjʉ aasulwike pakiisʉ apa, jo ʉjʉ aafyʉkile ʉkʉkɨnda kʉmwanya koosa, ʉkʉtɨ ajege pabʉjo boosa. 11 Ʉmwene jo ʉjʉ aababɨɨkile bamo ʉkʉja batʉmigwa, bamo ʉkʉja bakunguluka, bamo ʉkʉja balʉmbɨlɨli, abangɨ ʉkʉja batiimi, na bangɨ ʉkʉja bamanyisi. 12 Aabombile bo ʉlo ʉkʉbatendekesya abiikemo ʉkʉbomba ɨmbombo jaa Kɨlɨsiti, ʉkʉtɨ ɨkɨpanga kya Kyala, ʉgʉ go mbɨlɨ gwa Kɨlɨsiti, kɨjengigwe. 13 Kikʉjengigwaga mpaka ʉswe twesa tʉbʉfikɨle ʉbʉlɨɨlanisi ʉbwa lwitɨko, nʉ kʉmmanya fiijo ʉMwana gwa Kyala, kangɨ tʉjege bandʉ aba bakomile, nʉ kʉbʉfikɨla ʉbʉsita kwagɨlwa ʉbwa Kɨlɨsiti. 14 Po tʉlɨngajaga bo ʉlwa baana abafyele, aba bikʉgutigwa nʉ mbelo ʉgwa lʉko nʉ lʉko, ʉgwa manyisyo ɨsi abandʉ bikwagʉla, ʉkʉtɨ babasofye abandʉ kʉ bʉkomu. 15 Looli tʉbʉʉlanege ʉbwanalooli ndʉgano, ʉkʉtɨ tʉkʉle nʉ kʉmfikɨla Kɨlɨsiti ndɨ syosa, ʉjʉ jo ntʉ. 16 Mmyake, ʉtʉmbakaasya toosa ʉtwa mu mbɨlɨ tʉtʉʉleene nʉ kʉlʉngana pamopeene. Lɨnga kʉkʉtɨ kambakaasya kikʉbomba ɨmbombo jaake, po ʉmbɨlɨ goosa gukʉkʉla nʉ kwijenga ndʉgano.
Akajɨɨlo akapya akaa biitɨki baa Jesu
17 Po mu ngamu ɨjaa Ntwa, ngʉbasoka nʉ kʉbasisimɨkɨsya, ʉkwandɨla akabalɨlo aka, akajɨɨlo kɨɨnu kalɨngajaga bo ʉlwa bandʉ aba bakammanya Kyala, abeene ɨnyiinogono syabo sya mwalo. 18 Amahala gaabo galɨ mu ngiisi. Bakakaba ʉbʉʉmi ʉbʉ bukʉfuma kwa Kyala, kʉnongwa jaa bʉkonyofu bwabo, nʉ bʉkafu ʉbwa ndumbula syabo. 19 Basobile, kangɨ bakaja nɨ soni, biibɨɨkile mbʉnyali ʉbwa lʉko loosa, bikʉnyonywa ʉkʉkɨndapo ʉkʉbomba ɨsyo.
20 Leelo ʉmwe mukaamanyiile bo ʉlo ɨsya Kɨlɨsiti. 21 Nalooli mwapɨliike kanunu ɨndʉmi nɨ manyisyo syake, ʉkʉkongana nʉ bwanalooli ʉbʉ bʉlimo mmyake. 22 Mwamanyisiigwe ʉkʉbʉleka ʉbʉndʉ bwɨnu ʉbwa ijolo, aka ko kajɨɨlo kɨɨnu akabiibi. Akabalɨlo kala moonangɨkaga kʉnongwa jaa finyonyo fyɨnu ɨfi fikʉbasyoba. 23 Mwamanyisiigwe ʉkwandʉla ɨnyiinogono syɨnu, 24 nʉ kʉfwala ʉbʉndʉ ʉbʉpya, bo ʉlʉ Kyala aabapelile ʉkʉfwana nagwe, mbʉgolofu na mbwikemo ʉbwa nalooli.
25 Po namuleke ʉbʉtʉngʉlʉ! Kʉkʉtɨ mundʉ ajobege ʉbwanalooli kʉ nnine,† 4:25 Bala kalata gwa Sakalija 8:16. paapo kʉkʉtɨ mundʉ kambakaasya akaa mbɨlɨ gʉmogwene. 26 “Lɨnga mukaleele, mulɨngabombaga ʉbʉtʉlanongwa.”‡ 4:26 Bala kalata gwa Ɨsabʉli 4:4. Ɨliisʉba lɨlɨngajongaga bo mukaalɨ mulɨ nɨ ngalalɨsi. 27 Mulɨngampaga Seetano ʉbʉjo. 28 Ʉnhɨɨji aleke ʉkʉhɨɨja, abombege ɨmbombo jaa bwanalooli na maboko gaake, ʉkʉtɨ akabege ʉtʉndʉ ʉtwa kʉbajabɨlapo abangɨ aba balɨ nʉ bʉtolwe.
29 Mulɨngajobaga amasyʉ agaa loonangɨko, mujobege amasyʉ agaa kʉbajenga nʉ kʉbatʉʉla abiinɨɨnu, ʉkʉtɨ bakabɨlengemo aba bikʉgapɨlɨkɨsya. 30 Mulɨngampelelaga ʉbʉsulumanie Mbepo Mwikemo, paapo Mbepo ʉjo kɨmanyilo kya Kyala kʉmyɨnu ʉkʉtɨ mulɨ bandʉ baake, nʉ kʉtɨ lɨliko iisikʉ ɨlɨ Kyala aikwisa kʉbapoka. 31 Po namuleke ʉkʉbabenga abandʉ, ɨngimbʉko, ɨngalalɨsi, ʉnjwego na maheelu, pamopeene nʉ bʉbiibi ʉbwa lʉko loosa. 32 Looli mujege nɨ kɨbabɨɨlɨsi, mubombelanilege ɨnunu. Kʉkʉtɨ mundʉ anhobokelege ʉnnine, bo ʉlʉ Kyala aabahobokiile ʉkwendela mwa Kɨlɨsiti.