2
Kalata gwa Jesu kʉ kɨpanga kya Kyala ɨkya mu Efesi
1 “Kʉ gwandʉmi ʉgwa kɨpanga kya Kyala ɨkya mu Efesi, ʉnsimbɨle ʉtɨ:
Amasyʉ aga gikʉfuma kwa Jesu, ʉjʉ akolile ɨndondwa ihaano na ibɨlɨ nkɨboko kyake, na ʉjʉ ikwenda pakatɨ pa fikolela nyaale ɨfya sahabʉ fihaano na fibɨlɨ, ikʉtɨ: 2 Nsimeenye ɨmbombo syɨnu, nʉ kʉtɨ mwijʉʉlile fiijo, nʉ kʉtɨ mʉʉmɨɨliile mu ngʉbɨlo. Kangɨ mmeenye ʉkʉtɨ mutikʉpɨlɨkɨsania na babomba mbiibi, kangɨ mubagelile aba bikwijoba ʉkʉtɨ batʉmigwa* 2:2 Abatʉmigwa Bala kʉ Ɨsyakʉlɨngaania. baa Kyala, looli mma. Musyageenie ʉkʉtɨ baa bʉtʉngʉlʉ. 3 Kangɨ mʉʉmɨɨliile mu ngʉbɨlo akabalɨlo akatali kɨsita kʉkatala, kʉnongwa jaa ngamu jangʉ.
4 Looli ndɨ nalyo iisyʉ lɨmo na nuumwe. Mulʉlekile ʉlʉgano ʉlʉ mwalɨ nalo kʉbwandɨlo. 5 Po namupakʉmbʉke apa mwalipo bo mukaalɨ ʉkʉgwa. Mupɨndʉke, mubombege ɨmbombo ɨsi mwabombaga kʉbwandɨlo. Looli lɨnga aamutikʉsibomba ɨsyo, lɨnga mutikʉpɨndʉka, angwisa kʉmyɨnu nʉ kʉkɨsoosyapo ɨkɨkolela nyaale pabʉjo bwake. 6 Looli kalipo kamo aka mubombile kanunu. Musibengile ɨsi bikʉbomba aBanikolaiti,† 2:6 ABanikolaiti baalɨ Bakɨlɨsiti aba bendelelaga ʉkʉsibomba ɨnyiiho simo ɨsya bandʉ aba bakaja Bakɨlɨsiti. ɨsi na niine nsibengile.
7 Ʉjʉ alɨ nɨ mbʉlʉkʉtʉ, jo apɨlɨkege ɨsi Mbepo Mwikemo ikʉfibʉʉla ɨfipanga fya Kyala. Ʉjʉ ikʉsitola ɨngelo angʉmpapo ɨseke ɨsya mpiki ʉgʉ gukʉpa ʉbʉʉmi, ʉgʉ gʉliko kʉmwanya, mu ngʉnda gwa Kyala.”‡ 2:7 Bala kalata gwa Ʉbwandɨlo 2:9.
Kalata gwa Jesu kʉ kɨpanga kya Kyala ɨkya mu Similina
8 “Kʉ gwandʉmi ʉgwa kɨpanga kya Kyala ɨkya mu Similina, ʉnsimbɨle ʉtɨ:
Amasyʉ aga gikʉfuma kwa Jesu, ʉjʉ jo gwa kwanda kangɨ gwa kʉmmalɨɨkɨsyo, ʉjʉ aafwile kangɨ aasyʉkile, ikʉtɨ:§ 2:8 Bala kalata gwa Ʉbʉsetʉli 1:17, 18. 9 Mmeenye ʉkʉtɨ mukabile ɨngʉbɨlo fiijo nʉ kʉtɨ mulɨ balondo. Looli nalooli ʉmwe mulɨ bakabi. Kangɨ ngameenye amaheelu aga bikʉbatʉka ʉmwe, aba bikwijoba ʉkʉtɨ bandʉ baa Kyala,* 2:9 Abandʉ baa Kyala NKɨgiliki bikʉtɨ ABajuuta. looli bakaja bo ʉlo, abeene bandʉ baa Seetano. 10 Mulɨngatiilaga ɨngʉbɨlo ɨsi aasikʉbaaga. Pɨlɨkɨsya! Seetano aikʉbapinya abiinɨɨnu bamo mu nnyololo ʉkʉtɨ abagele, po aamukʉkaba ɨngʉbɨlo amasikʉ kalongo. Mujege bagolofu nalɨnga ko kʉfwa, po ʉne ngwisa kʉbapapo ʉbʉʉmi, ʉkʉja ngɨga jɨɨnu ɨjaa bʉtoli.
11 Ʉjʉ alɨ nɨ mbʉlʉkʉtʉ, jo apɨlɨkege ɨsi Mbepo Mwikemo ikʉfibʉʉla ɨfipanga fya Kyala. Ʉjʉ ikʉsitola ɨngelo atiisakʉfwa ʉbʉfwe ʉbwa bʉbɨlɨ.”† 2:11 Ʉbʉfwe ʉbwa bʉbɨlɨ Kokʉtɨ Ʉbʉfwe ʉbʉ bukwendelela bwila na bwila. Bala kalata gwa Ʉbʉsetʉli 20:14.
Kalata gwa Jesu kʉ kɨpanga kya Kyala ɨkya mu Peligamo
12 “Kʉ gwandʉmi ʉgwa kɨpanga kya Kyala ɨkya mu Peligamo, ʉnsimbɨle ʉtɨ:
Ʉjʉ alɨ nʉ lʉʉbo ʉlʉʉgi koosakoosa ikʉtɨ:‡ 2:12 Bala kalata gwa Ʉbʉsetʉli 1:16. 13 Mpameenye apa mukʉtʉʉgala, po pa kɨkota ɨkya bʉtwa ʉbwa Seetano. Looli poope mujɨkolile ɨngamu jangʉ, kangɨ mukaleka ʉkʉʉnyiitɨka, na nkabalɨlo akaa nkeeti gwangʉ, ʉngolofu Antipa. Jʉla jo ʉjʉ baalɨnngogile ʉko kʉmyɨnu, pabʉjo ʉbʉ Seetano ikʉtʉʉgala.
14 Looli ndɨ nasyo simo na nuumwe. Bamo pakatɨ pamyɨnu bikʉkonga ɨmanyisyo sya Balaamu. Jʉla jo ʉjʉ aalɨmmanyiisye Balaki ʉkʉbasobesya aBanyaisilaɨli, ʉkʉtɨ balyege ɨnyama ɨsi sisoosiigwe kʉ figemo ɨfya fifwani, kangɨ baalogwaga.§ 2:14 Bala kalata gwa Ɨmbalɨlo 22:4-35; 31:16. 15 Po bo ʉlwa bala, bamo pakatɨ pamyɨnu bikʉsikonga ɨmanyisyo ɨsya Banikolaiti. 16 Looli ʉlʉ, pɨndʉka! Lɨnga mutikʉpɨndʉka, ngwisa kʉmyɨnu nakalɨnga, nʉ kʉlwa nabo abandʉ bala kʉ lʉʉbo ʉlʉ lukʉfuma nkanwa mmyangʉ.
17 Ʉjʉ alɨ nɨ mbʉlʉkʉtʉ, jo apɨlɨkege ɨsi Mbepo Mwikemo ikʉfibʉʉla ɨfipanga fya Kyala. Ʉjʉ ikʉsitola ɨngelo angwisa kʉmpapo ɨmana* 2:17 Ɨmana fyalɨ findʉ ɨfi aBanyaisilaɨli baaliile bo balɨ ndʉngalangala. Bala kalata gwa Ʉkʉsooka 16. ɨjɨ jɨfisiigwe. Kangɨ angwisa kʉmpapo iibwe ɨlyelu ɨlɨ lɨsimbiigwe ɨngamu ɨmbya ɨjɨ najʉmo akajɨmanya. Ʉmundʉ ʉjʉ ikwisa kwambɨlɨla iibwe ɨlyo, mwene jo ikwisa kʉjɨmanya ɨngamu jɨla.”
Kalata gwa Jesu kʉ kɨpanga kya Kyala ɨkya mu Tyatila
18 “Kʉ gwandʉmi ʉgwa kɨpanga kya Kyala ɨkya mu Tyatila, ʉnsimbɨle ʉtɨ:
ɄMwana gwa Kyala,† 2:18 ɄMwana gwa Kyala Bala kʉ Ɨsyakʉlɨngaania. ʉjʉ amaaso gaake gikʉlangala bo ʉlwa mooto, kangɨ amalʉndɨ gaake galɨ bo ɨkɨbʉngʉ ɨkya ntengo fiijo,‡ 2:18 Bala kalata gwa Ʉbʉsetʉli 1:14-15. ikʉtɨ: 19 Nsimeenye ɨmbombo syɨnu nʉ lʉgano lwɨnu, kangɨ muunyiitiike, muumbombiile, mʉʉmɨɨliile mu ngʉbɨlo. Nalooli ɨmbombo syɨnu lɨɨlɨno nunu ʉkʉsikɨnda ɨsya ijolo. 20 Looli ndɨ nalyo iisyʉ lɨmo na nuumwe. Mummwambɨliile ʉnkiikʉlʉ jʉla Jesebeli,§ 2:20 Bala kalata gwa 1 Abanyafyale 16:29-31; 18:4; 2 Abanyafyale 9:22. ʉjʉ ikwijoba ʉkʉtɨ nkunguluka. Looli ikʉbamanyisya ababombeli bangʉ nʉ kʉbasobesya, ʉkʉtɨ balogwege nʉ kʉlya ɨnyama ɨsi sisoosiigwe kʉ figemo ɨfya fifwani. 21 Nʉmpeele akabalɨlo akaa kʉpɨndʉka, looli akiigana ʉkʉbʉleka ʉbʉlogwe bwake. 22 Pɨlɨkɨsya! Angʉnsopela ʉbʉbine. Kangɨ aba bikʉlogwa nagwe angʉbapa ɨngʉbɨlo, lɨnga batikʉpɨndʉka kʉ mbiibi syabo ɨsi babombile nagwe. 23 Kangɨ angʉbagoga boosa aba bikʉnkonga, po ɨfipanga fya Kyala fyosa aafikʉmanya ʉkʉtɨ jo ʉne ne nsimeenye ɨnyiinogono nɨ ndumbula sya bandʉ. Ʉne ngwisa kʉbahomba mwesa ʉkʉkongana na ɨsi mwasibombaga.
24 Looli ndɨ nasyo ɨsya kʉbabʉʉla, ʉmwe mwe mulɨ mu Tyatila, mwe mukasikonga ɨmanyisyo sya Jesebeli, kangɨ mwe mukaasiitiike ɨsyo ɨsi bamo bikʉtɨ nongwa sya mbʉtiitʉ ɨsya Seetano. Po kʉmyɨnu nikʉbabʉʉla nikʉtɨ, ndikʉbatwɨka ɨkɨtwalo kangɨ. 25 Looli mukole fiijo aka mulɨ nako, mpaka pakabalɨlo aka angwisa. 26 Ʉjʉ ikʉsitola ɨngelo nʉ kwendelela ʉkʉbʉkonga ʉbwigane bwangʉ mpaka kʉmmalɨɨkɨsyo,
‘Angʉmpa ʉbʉlagɨli ʉbwa fiisʉ fyosa.
27 Ʉmwene ikwisa kʉbalongosyaga nɨ ngili ɨjaa kyela,
ikwisa kʉbabogojolaniaga bo ɨndeko,’* 2:26-27 Bala kalata gwa Ɨsabʉli 2:8-9.
bo ʉlʉ ʉne nambɨliile ʉbʉlagɨli ʉkʉfuma kwa Taata. 28 Kangɨ angʉmpa ʉlʉtondwa kɨpanda bʉsikʉ.† 2:28 Kɨpanda bʉsikʉ Ʉlʉtondwa ʉlʉ lukʉlangala nʉlʉbʉnjʉ fiijo bo bʉkaalɨ ʉkʉkya. Bala kalata gwa Ɨmbalɨlo 24:17.
29 Ʉjʉ alɨ nɨ mbʉlʉkʉtʉ, jo apɨlɨkege ɨsi Mbepo Mwikemo ikʉfibʉʉla ɨfipanga fya Kyala.”
*2:2 2:2 Abatʉmigwa Bala kʉ Ɨsyakʉlɨngaania.
†2:6 2:6 ABanikolaiti baalɨ Bakɨlɨsiti aba bendelelaga ʉkʉsibomba ɨnyiiho simo ɨsya bandʉ aba bakaja Bakɨlɨsiti.
‡2:7 2:7 Bala kalata gwa Ʉbwandɨlo 2:9.
§2:8 2:8 Bala kalata gwa Ʉbʉsetʉli 1:17, 18.
*2:9 2:9 Abandʉ baa Kyala NKɨgiliki bikʉtɨ ABajuuta.
†2:11 2:11 Ʉbʉfwe ʉbwa bʉbɨlɨ Kokʉtɨ Ʉbʉfwe ʉbʉ bukwendelela bwila na bwila. Bala kalata gwa Ʉbʉsetʉli 20:14.
‡2:12 2:12 Bala kalata gwa Ʉbʉsetʉli 1:16.
§2:14 2:14 Bala kalata gwa Ɨmbalɨlo 22:4-35; 31:16.
*2:17 2:17 Ɨmana fyalɨ findʉ ɨfi aBanyaisilaɨli baaliile bo balɨ ndʉngalangala. Bala kalata gwa Ʉkʉsooka 16.
†2:18 2:18 ɄMwana gwa Kyala Bala kʉ Ɨsyakʉlɨngaania.
‡2:18 2:18 Bala kalata gwa Ʉbʉsetʉli 1:14-15.
§2:20 2:20 Bala kalata gwa 1 Abanyafyale 16:29-31; 18:4; 2 Abanyafyale 9:22.
*2:27 2:26-27 Bala kalata gwa Ɨsabʉli 2:8-9.
†2:28 2:28 Kɨpanda bʉsikʉ Ʉlʉtondwa ʉlʉ lukʉlangala nʉlʉbʉnjʉ fiijo bo bʉkaalɨ ʉkʉkya. Bala kalata gwa Ɨmbalɨlo 24:17.