Ⅰ -Bho ɛ -nɩ -kaa a, ꞌle koo -a ꞌke ꞌlɛꞌɛ? -A ꞌke na: -A nʋ ꞌꞌnyinynidɩ ꞌle -Lagɔꞌɔ ꞌlimʋꞌa wɔnnmɔɛ ꞌke ꞌꞌkpiꞌkpa tenyɩ maꞌa? Ⅱ -Gba, ꞌkla -mnɔɔ -ko! -Ɛkedɩmaa, ꞌbho ꞌꞌnyinynidɩꞌa damʋ, -ka nyɔ-ɔ ꞌmɛꞌɛ ɛ, ꞌka-a -a ꞌke ꞌtɔ -nɩ. -Ka -a ꞌka ꞌꞌnyinynidɩꞌa nʋnʋa ꞌꞌlru-mu -nɩ, ꞌka se -nɩ. Ⅲ A ꞌye li-ɔ, -aꞌba batizeeɛ ꞌle Zezii Kliisɩꞌa ꞌnynɩ ꞌmʋ, ꞌɩnnɛ -tɔꞌo -ka -a -ke ɔ ꞌꞌsisriꞌa ꞌꞌyi. ꞌLe ꞌɛ ꞌzɔ -tɛꞌɛ ꞌmʋ-ɛ. -Ka ɛ ꞌlɛꞌɛ, ꞌka-a ꞌka-a: -A-bʋ batizee-ɛꞌɛ ꞌle ꞌɔ ꞌnynɩ ꞌmʋ, -a ꞌwɔɔnꞌo -ka ɔ ꞌmɛꞌɛ -aꞌba dɩ. Ⅳ Batizeeɛ ꞌmnɛ, ɛ kɔkɔɔꞌɔ-ɔ -ka nyʋ ꞌgbaa ꞌnɔ ka -amʋ ꞌle -a -ke ɔ ꞌyeꞌa ꞌmɛ ꞌle ʋn ꞌye ꞌɔ -amʋ ꞌgbaa ꞌle ʋn ꞌyeꞌa tinmaze. ꞌLe, -ka ꞌɔ -tɩtaꞌa wɔnkuɛ -zɔ ꞌɔ glu ꞌle ꞌmɛmʋꞌa ꞌꞌklumʋ, ꞌle ɔ ꞌyeꞌa ti-nɩ -lrɛɛ ɛ, ꞌka-a -a ꞌke -nɩ ꞌle tinɩɛlre ꞌli.

Ⅴ A -gblee, -ka -a -ke ɔ ꞌꞌsisriꞌa ꞌꞌyi ꞌle ɔ ꞌmɛmɛɛ ꞌmʋ, ꞌle -a -ke ɔ ꞌke ꞌꞌyiꞌꞌsisri ꞌle ꞌɔ tinɩɛ ꞌmʋ -lrɛɛ. Ⅵ Lɛ -a ꞌka yibo a, ꞌɩnnɛ ꞌmo-o, kplisʋa -a -nɩꞌa ti -bɛnyɩ, ꞌɩnnɩ -ke ɔ ꞌmɛꞌo ꞌbho nyʋyrilbhaatu ꞌꞌyri ꞌle -aꞌba ꞌꞌnyinynidɩꞌa ꞌyʋɛ -nɩꞌa -amʋ ꞌmʋꞌa tinɩɛ ꞌmɛꞌo ꞌle ꞌꞌnyinynidɩ -see ꞌtɔ -amʋ ꞌgeyiɛ ꞌmʋ -kpʋn yi ꞌbho le. Ⅶ A ꞌye li-ɔ, nyɔ-ɔ ꞌmɛꞌɛ ɛ, ꞌꞌnyinynidɩ se ꞌtɔ ꞌbhɛɛ ɩ ꞌke ɔ ꞌꞌlru ꞌmʋ -kɔ. Ⅷ ꞌLe, -bho -a -ke *Kliisɩ ꞌmɛ, -a yiboꞌo na, -a -ke ɔ -nɩꞌe-e ti -lrɛɛ. Ⅸ -Ɛkedɩmaa, Kliisɩ -Lagɔ -zaꞌa glu ꞌle ꞌmɛmʋꞌa ꞌꞌklumʋ, ɔ -see ꞌtɔ ꞌmɛ yi. ꞌMɛmɛɛ se ɔ wɔnyiꞌbhɛɛ. Ⅹ A -gblee, ꞌꞌnyinynidɩꞌa dɩ ɔ ꞌꞌduꞌo ꞌle ɔ ꞌye kpɛ -lue ꞌtɩn ꞌmɛ -nɩ. ꞌTraamʋ ꞌtɔ ɔ, ɔ -nɩꞌe-e ti -Lagɔꞌɔ kamʋ ꞌle ɔ ꞌke ꞌɔ lbhʋ nʋ. Ⅺ A-bee -mnʋʋ -lrɛɛ, a -ke Zezii Kliisɩ ꞌmnɔ ꞌꞌsisriꞌe-e ꞌꞌyi, nyʋ-ʋ ꞌmɛ -nɩꞌa ꞌle ꞌꞌnyinynidɩ ꞌmʋ ꞌle -ʋ -nɩꞌa ti ʋn ꞌke -Lagɔꞌɔ lbhʋ nʋ, a -zrɛ -nɩ nʋ aꞌba ꞌꞌbhi ꞌꞌyi!

Ⅻ ꞌƐ dɩ a, aꞌba ꞌꞌtayi aꞌba ꞌꞌbhi ꞌꞌyiti ꞌꞌnyinynidɩꞌa kpʋn amʋ ꞌgeyiɛ ꞌmʋ -le ꞌle a -kaa *ꞌbhlʋkuꞌa ꞌgwlʋdɩ nʋ! ⅩⅢ Aꞌba ꞌꞌtayi aꞌba ꞌꞌbhi ꞌꞌyiti aꞌba -de ꞌle ꞌꞌnyinynidɩꞌa lbhʋ ꞌli ti -le! A ꞌꞌnyɩ aꞌba tinɩɛꞌɛ klɛ -Lagɔ -jeyi, ꞌle, nyʋ-ʋ -sɔꞌɔ glu ꞌle ꞌmɛmʋꞌa ꞌꞌklumʋ ʋn ꞌyeꞌa ti-nɩ -lrɛɛ ɛ, -ka ʋn -nɩꞌa a, a ꞌke -kaa -nɩ! A ꞌꞌnyɩ aꞌba ꞌꞌbhi -Lagɔ -jeyi ꞌle a ꞌke ꞌꞌyisrɛɛlɩꞌa nʋnʋaꞌa ꞌkpʋ -de, ꞌle a ꞌke ɩ nʋ! ⅩⅣ A -gblee. ꞌtraamʋ ꞌtɔ ɔ, -Lagɔꞌɔ ꞌlimʋꞌa wɔnnmɔɛ-ɛ -kɔꞌɔ amʋ ꞌꞌlru ꞌmʋ. Aꞌba ꞌꞌbhiꞌa ꞌmʋtikukuɛꞌɛ ꞌmʋpɛɛɛ -see ꞌtɔ amʋ ꞌꞌlru ꞌmʋ -kɔ yi. ꞌƐ ꞌꞌnyinynidɩꞌa wɔnkuɛ -see ꞌtɔ amʋ wɔnyiꞌbhɛɛ yi.

ⅩⅤ Ɛ -nɩꞌa ꞌtɔ -kaa ꞌmʋ ꞌle, koo -a ꞌke ꞌlɛꞌɛ? -Lagɔꞌɔ ꞌlimʋꞌa wɔnnmɔɛ-ɛ -kɔꞌɔ -amʋ ꞌꞌlru ꞌmʋ, ꞌle ɛ -se -aꞌba ꞌꞌbhiꞌa ꞌmʋtikukuɛꞌɛ ꞌmʋpɛɛɛ -see ꞌtɔ -amʋ ꞌꞌlru ꞌmʋ -kɔ yi ꞌbho leꞌa dɩ a, -a ꞌbhɛɛꞌo -a ꞌke ꞌꞌnyinynidɩ nʋꞌa? -Gba, ɛ se -kaa ꞌmʋ-nɩ. ⅩⅥ A ꞌye li-ɔ, aꞌba ꞌꞌbhi yiboꞌo-o na, -bho nyɔ cɛ ꞌɔ ꞌꞌbhuo wlu ꞌꞌkpiti ꞌle nyɔ -lrɔɔ kwa ꞌmʋ, nyɔ ꞌmnɔ-ɔ kɔ nɔꞌo -ka ꞌɔ ꞌgeyikpaan ꞌle ꞌgeyikpaan-a ꞌꞌduꞌo ꞌbho ꞌɔ -kɔyi. -Bho ɛ ꞌꞌdu ꞌꞌnyinynidɩ a ꞌke ꞌbho ꞌꞌdu a, ꞌꞌlemnɩɩ a ꞌnʋ-o ꞌꞌnyinynidɩꞌa ꞌgenynuukpɩɩn ꞌle a ꞌmɛꞌo ꞌbho -Lagɔꞌɔ ꞌꞌyigbeyi, ꞌle, -bho ɛ ꞌꞌdu -Lagɔ a ꞌke ꞌbho ꞌꞌdu a, ꞌꞌlemnɩɩ, ꞌɩnnɔ -kɔꞌɔ amʋ ꞌle a ꞌꞌduꞌo ꞌꞌyisrɛɛmʋ ꞌbho ꞌɔ ꞌꞌyigbeyi. ⅩⅦ A -gblee, ꞌɩn-ɩ po-o -Lagɔ ꞌsɛɛ, -ɛkedɩmaa, -bɛnyɩ a ꞌꞌdu-o ꞌꞌnyinynidɩꞌa ꞌgenynuukpɩɩn, ꞌle, ꞌtraamʋ, -ziadɩ nyʋ -tɔꞌɔ amʋ a, a ꞌꞌdu ꞌɛ ꞌbho aꞌba -pɔlʋꞌa klɛ ti. ⅩⅧ A zetie-ɛꞌo ꞌle ꞌꞌnyinynidɩꞌa kwa ꞌmʋ, a ꞌꞌdu-o ꞌꞌyisrɛɛlɩꞌa nʋnʋaꞌa ꞌgenynuukpɩɩn. ⅩⅨ A -gblee, -ɛ -ke dɩ ꞌɩn-ɩ kpʋkpaꞌa aꞌba dɩ ꞌgeyiɛꞌɛ dɩ li, ꞌɩnnɛ ꞌmo-o, lɛ ꞌɩn-ɩ zaꞌa ꞌmʋ a, ꞌɩn ꞌybha-oꞌo a ꞌke ɛ ꞌmʋtiꞌwɔn -ka -zɛgɛka. -Bho ꞌɩn -zɩ ɩ -kaa ꞌmʋ a, ꞌɩnnɛ ꞌmo-o, -bɛnyɩ, ꞌꞌnyinynidɩ, -ɩ seꞌa ꞌꞌyrili-nmɔ ɔ, ꞌɩnnɩ kpʋnꞌo aꞌba tinɩɛ ꞌle ꞌgeyiɛ ꞌmʋ, ꞌle -Lagɔ -see amʋ ꞌꞌkpiꞌwɔɔn. ꞌTraamʋ ꞌtɔ ɔ, a ꞌꞌluo aꞌba tinɩɛ ꞌmʋ ꞌle a ꞌke ꞌꞌyisrɛɛlɩ nʋ ꞌle a ꞌke -Lagɔ ꞌtʋ nʋ ꞌle ɔ ꞌke amʋ ꞌꞌkpiꞌwɔɔn!

ⅩⅩ -Da a ꞌꞌduꞌa ꞌꞌnyinynidɩꞌa ꞌgenynuukpɩɩn a, aꞌba dɩ se ꞌle ꞌꞌyisrɛɛlɩꞌa nʋnʋaꞌa dɩ ꞌꞌkpi -nɩ. ⅩⅪ A-a nʋꞌa -kaa ꞌꞌcɩcɩ ꞌle, leelɛ a ꞌyeꞌa? ꞌYa kplitu -se -kaaa dɩnyilbhaadɩ? -Ɛkedɩmaa, ɩ ꞌbhle-e ꞌmɛmɛɛ kli ꞌbho -Lagɔꞌɔ ꞌꞌyigbeyi. ⅩⅫ ꞌTraamʋ ꞌtɔ ɔ, a zetie-ɛꞌo ꞌle ꞌꞌnyinynidɩ ꞌmʋꞌa dɩ a, a ꞌꞌduꞌo -Lagɔꞌɔ nyʋ ꞌle ɔ -kɔꞌɔ amʋ. Lɛ a ꞌyeꞌa ꞌbho a, ꞌɩnnɛ ꞌmo-o, tinɩɛ-ɛ nʋꞌa -Lagɔ ꞌtʋ, a -ke ɔ ꞌke ꞌle ꞌɛ ꞌli ti-de. Ɛ ꞌbhle-e ꞌꞌkɔgwlɛtinɩɛ kli. ⅩⅩⅢ A -gblee, ꞌꞌnyinynidɩ nyɔ-ɔ nʋꞌa, ꞌɩnnɩ yɔ ꞌɔ ꞌmɛmɛɛ -bodɩ ꞌbho -Lagɔꞌɔ ꞌꞌyigbeyi. ꞌLe nyʋ-ʋ -ke -aꞌba -Kɔyi *Zezii *Kliisɩ ꞌꞌsisriꞌa ꞌꞌyi a, ꞌjɛ -Lagɔ nʋ ꞌʋ ꞌꞌlruli bhubhu, ꞌɩnnɛ ꞌmo-o ꞌꞌkɔgwlɛtinɩɛ.