Ⅰ Lɩ -Lagɔ ꞌꞌzizeꞌa nyʋ ꞌꞌyrili, ꞌle *Zezii *Kliisɩ ꞌye ꞌɩ ꞌꞌduku ꞌꞌyrili-za, ɔ ꞌye ꞌɩ -Lagɔꞌɔ lbhʋnʋmʋ ꞌtmʋʋ, ꞌya dɩ ɛ-bɛ ꞌꞌbɔgʋ -nɛɛ -zaꞌa ꞌmʋ. Lɛ -Lagɔ ꞌꞌsiꞌa ꞌnynɩ -ɛ ꞌka -nʋ-ɛ ꞌwla, ʋn ꞌke ɩ yiboꞌa dɩ, ꞌɔ ꞌꞌbhuo-o ꞌlɔ ꞌɔ -kaa ꞌꞌyi. A -gblee, ꞌɛ ꞌꞌlru ꞌꞌyi Zezii Kliisɩ lbhoꞌo ɔ gboꞌa -dalbhoyi, ꞌle, ꞌɩnmɔ, ꞌɔ lbhʋnʋyi *ꞌZaan gbo, ɔ ꞌke ꞌɩnmʋ lɩ ꞌmnɩ -tɔ. Ⅱ Ɩ ziꞌa -kaa a, ꞌle, lɛꞌꞌo lɛ -Lagɔ gboꞌa -dalbhoyi -tɔꞌɔ ꞌɩnmʋ ꞌꞌyi, ꞌɩn ꞌye ɩ ꞌcnɩ ꞌle ꞌꞌbɔgʋ -nɛɛ ꞌli ꞌle nyʋ ꞌke ɩ yibo. ꞌƖn na: -Lagɔꞌɔ wlu moꞌo -ziaka ꞌle Zezii Kliisɩ ꞌye ɩ ꞌꞌkpiꞌwɔɔn.

Ⅲ Wlu-u ꞌwlʋꞌa ꞌle -Lagɔꞌɔ wɔn ꞌmʋ, ꞌɩnmɔ ꞌɔ lbhʋnʋyi ꞌZaan ꞌcnɩꞌa, nyɔ-ɔ zrɛꞌɛ ꞌɛ ꞌꞌbɔgʋtu ꞌbho nyʋ ꞌweeꞌa ꞌꞌyigbeyi a, ɔ ꞌwa-a ti. Ɩ-bɩ wlu ꞌmnɩ, nyʋ-ʋ po ꞌɩ -lokui ꞌle -ʋ ꞌꞌdu ꞌɩ ꞌbho a, -Lagɔ-ɔ wʋnna ꞌnʋ-ʋ ꞌꞌniti, -ɛkedɩmaa, -nɔɔ -ke ti lɩ ꞌmnɩ ꞌka yi, ɛ ꞌꞌkɔɔꞌɔ-ɔ gbo.

Ⅳ Ɛ-bɛ ꞌꞌbɔgʋ -nɛɛ, ꞌɩnmɔ *ꞌZaan ꞌcnɩ ɛꞌo. A-bʋ *Zeziiꞌa -glɩgbɩ -mɛɛsɔn-ɔ -nɩꞌa Aziibhlʋkpa ꞌꞌkpi, ꞌɩnmɔ ꞌyeꞌe amʋ.

ꞌꞌKɔgwlɛlagɔ -kɔꞌɔ lɩ ꞌwee, ɔ -wʋnna amʋ ꞌꞌniti, ꞌle ɔ ꞌke amʋ -pɔlʋꞌa bhlubhlua ꞌꞌnyɩ! ꞌƆ -zuzu ꞌsaaꞌa li kpɛ -mɛɛsɔn, ɔ nʋ amʋ -zɛgɛ ꞌꞌlruli, ꞌle a ꞌke -pɔlʋꞌa bhlubhlua ꞌye -lrɛɛ! Ⅴ Zezii *Kliisɩ ꞌma-a -ziadɩꞌa ꞌmʋzayi, ɔ nʋ amʋ -zɛgɛ ꞌꞌlruli, ꞌle ɔ ꞌke amʋ -pɔlʋꞌa bhlubhlua ꞌꞌnyɩ! A -gblee, tinɩɛzɛgɛ-ɛ seꞌa ꞌꞌtiinamʋ ꞌbhle, nyʋ -Lagɔ-ɔ ꞌꞌnyɩ ꞌɛ ꞌle ꞌmɛmʋꞌa ꞌꞌklumʋ, ꞌɩnnɔ ꞌmo-o ꞌwa nyamna, ꞌle ɔ -kɔꞌɔ ꞌbhlɩkpɩyowli.

Ɔ-bɔ Zezii ꞌmnɔ ɔ, ɔ -kmaꞌa-a -aꞌba dɩ. Ʋn ꞌlbhɔ -ɔꞌo, ꞌɔ nymɔ ꞌye tiꞌwla ꞌle ɔ ꞌye ꞌmɛ -aꞌba ꞌꞌnyinynidɩꞌa dɩ ꞌle ɔ ꞌye -amʋ zetie ꞌle ɩ ꞌmʋ, Ⅵ ꞌle ɔ ꞌye ꞌle -amʋ -za, nyʋ ɔ -kɔꞌɔ ɔ, ɔ ꞌye ꞌle -amʋ ꞌwa ꞌꞌklumʋ po, -a -ke ɔ ꞌke lɩ ꞌwee -kɔ, ꞌle -a ꞌye ꞌɔ -tɩta -Lagɔꞌɔ bʋbɔmʋ ꞌꞌdu. ꞌNynɩꞌa ꞌꞌyibhɛɛɛ -ke wɔnkuɛ ꞌꞌdu Zeziiꞌa lɩ ꞌꞌkɔmʋ! Dɩ -nɩɩ, *ꞌya lɛtu -nɩ -kaa ꞌmʋ ꞌꞌkɔmʋ!

Ⅶ A -gblee, ꞌle yakuꞌa -druku ꞌmʋ, ꞌle-e Zezii-i ꞌye le -yi -nɩ mʋ. Nyɔꞌꞌo nyɔ-ɔ ꞌye -ɔ liꞌye -mʋ. Nyʋ-ʋ -see ꞌɔ ꞌwɔɔn, ʋn-ʋ ꞌye -ɔ liꞌye -mʋ -lrɛɛ. ꞌLe ꞌbhlɩkpɩ ꞌwee ꞌꞌkpi, nyʋ-ʋ -see ꞌɔ ꞌꞌgwlide, ʋn-ʋ ꞌye-e ꞌɔ dɩ ꞌꞌvi -mʋ. ꞌƖn-ɩ zɩ ꞌɩ amʋ -bodɩ ꞌmʋ, ꞌɛ lɛtu-u ꞌye-e -nʋ-ɛ -mʋ. Ɩ-bɩ dɩ -nɩɩ, *ɩ -nɩ -kaa ꞌmʋ ꞌꞌkɔmʋ!

Ⅷ ꞌLe -aꞌba -Kɔyi -Lagɔ na: ꞌƖnmɔ ꞌmo-o ꞌꞌKɔgwlɛlagɔ -ɔ -kɔꞌɔ lɩ ꞌwee ꞌle ꞌan wɔnkuɛ ꞌbhɛꞌɛ ꞌꞌyi ɛ -ziꞌe lɛꞌꞌo lɛ. ꞌƖnmɔ -yaꞌa lɛꞌꞌo lɛ ti, ꞌɩnmɔ ꞌbhleꞌe ꞌɛ tisɔɛꞌɛ ꞌkpʋ kwa.

Ⅸ ꞌƖnmɔ aꞌba ꞌlotʋꞌa ꞌꞌyu *ꞌZaan -ke a bheteꞌa gbo, ꞌle -a -ke *Zezii ꞌyeꞌa ꞌꞌyiꞌꞌsisri a, ꞌɩnmɔ ꞌmnɔ, ꞌɩnmɔ poꞌo amʋ ꞌꞌbɔgʋ -nɛɛ -jeyi. ꞌKa-a ɛ -nɩꞌe ꞌmʋꞌa dɩ, ꞌɩn -ke a -plɛꞌɛ ꞌkleyeɛɛ ꞌmʋ, ꞌle -a ꞌye ꞌꞌgwli-ku, -ɛkedɩmaa, -a-bʋ ɔ -kɔꞌɔ ꞌwee ꞌle ꞌɔ -kɔkɔɔ ꞌmnɛ -see ꞌꞌtiinamʋ ꞌbhle yi. A -gblee, ꞌꞌdɩzɩgɩ-ɩ ꞌwlʋꞌa ꞌle -Lagɔ gbo, ꞌɩn-ɩ zaꞌa ꞌmʋ, ꞌle ꞌɩn-ɩ nʋꞌa, -da Zezii -nɩꞌa ꞌnɔɔ ꞌkmʋ ꞌmʋ, ɔ -tɔ ꞌnɩ-ɩ nyʋ, ɩ-bɩ -ziadɩ ꞌmnɩ, ꞌya kamʋ ʋn kpʋnꞌo ꞌɩnmʋ, ꞌle ʋn ꞌye ꞌɩnmʋ likpe -lue ʋn-ʋ ꞌlaꞌa Patɩmɔsɩ ꞌli kpa. Ⅹ A -gblee, ꞌɩn -nɩ ꞌbho likpe ꞌmnɛ ꞌli, ꞌle *-Lagɔꞌɔ Lisaazuzuꞌa -jijri ꞌye ꞌɩnmʋ ꞌꞌkpi yi. Zɔ -ke ꞌli -a fɔ nɩꞌa li, ꞌle -a bʋbɔꞌɔ -aꞌba -Kɔyi Zezii, ꞌɩnnɛ moꞌo. ꞌƖn nʋꞌa -kaa, ꞌɩn ꞌwɔn-ɔ wlu -lue ꞌbɔ ꞌle ꞌan lemʋ. Ɛ -nɩꞌe-e vevlele -ka nyɔ-ɔ bhlaꞌa lɛglɛ, Ⅺ ꞌle ɛ na ꞌɩnmʋ -bodɩ: ꞌꞌLuo ꞌꞌbɔgʋ ꞌmʋ, lɛ-ɛ -a ꞌyeꞌa li, ꞌcnɩ ɛ! Zeziiꞌa -glɩgbɩ-ɩ -nɩꞌa Efɛɛzɩ-e, Sɩminɩ-e, Pɛgamʋ-e, Tiatilɩ-e, Saadɩ-e, Filadɛlɩfii -ke Laodisee, ɩ -nɩ -mɛɛsɔn, po ɛ ʋ -jeyi!

Ⅻ -Wluwlu -gwɛꞌɛ ꞌle ꞌan -loku ꞌmʋ ti a, ꞌle ꞌɩn ꞌye ꞌle popo, nyɔ-ɔ zaꞌa ꞌɩnmʋ dɩ -bodɩ ꞌmʋ, ꞌɩn ꞌke ɔ liꞌye. ꞌƖn nʋꞌa -kaa, ꞌɩn ꞌye-e ꞌꞌnapɩ -mɛɛsɔn li ꞌbho ꞌya ꞌꞌkpitidelɩ -mɛɛsɔn ꞌꞌkpi. Ɩ-bɩ ꞌꞌkpitidelɩ ꞌmnɩ, ɩ -nʋ-ɛꞌɛ-ɛ sanu ꞌmʋ. ⅩⅢ ꞌBho ɩ-bɩ ꞌꞌnapɩꞌa ꞌꞌkpitidelɩ ꞌmnɩꞌa gwia ꞌmʋ, nyɔ -lue -ke nyunyɔꞌɔ ꞌꞌyu gʋgɔꞌɔ, ꞌɩnnɔ ꞌɩn ꞌyeꞌe li. Ɔ -paꞌa-a -vilɔbana ꞌmʋ, ꞌle ɔ bhlaꞌa ꞌbho ꞌɛ ꞌꞌkpi sanuꞌa ꞌꞌbɛtʋ. ⅩⅣ ꞌƆ ꞌꞌlru -nɩꞌe-e ꞌꞌbuu! ꞌƆ ꞌꞌyri-i vlan-oꞌo -ka nɛ. ⅩⅤ -Bho nyɔ ꞌꞌdu nɛtɛ ꞌꞌyri, -ka ɛ-ɛ vlanꞌa tenyɩ, ꞌka-a ꞌɔ bhɩ -nɩꞌo. -Ka ꞌbho ꞌꞌdɩklagba ꞌmʋꞌa ꞌꞌniꞌa wlu kuꞌa ti, ꞌka-a ꞌɔ wlu ꞌbhɛɛꞌɛ ꞌꞌyi -lrɛɛ. ⅩⅥ ꞌLe ɔ ꞌbhleꞌe ꞌcʋdrɩ -mɛɛsɔn kwa ꞌle ꞌɔ -linasʋ ꞌmʋ, ꞌle, -blajrɛɛ-ɛ ꞌbhleꞌa ꞌꞌyri ꞌsɔn, ɛ-ɛ ꞌwlʋꞌo ꞌle ꞌɔ wɔn ꞌmʋ. -Bho ꞌyrʋ -nɩ ꞌꞌduu ꞌmʋ, -ka ꞌɛ -vlavlɩ kuꞌa wɔn, ꞌka-a ꞌɔ ꞌꞌyigba-a vlanꞌo -lrɛɛ.

ⅩⅦ A -gblee, ꞌɩn ꞌye ꞌɔ li a, ꞌɩn ꞌga-a ti ꞌle ꞌɩn ꞌye ꞌgwlʋꞌkpa ꞌbho ꞌɔ wɔnyi. Ɔ nʋꞌa -kaa, ɔ ꞌde-e ꞌɩnmʋ -linasʋ ꞌꞌkpi ꞌle ɔ na: -Sɩanyɩꞌa ꞌlbha -ɩnmʋ -le! ꞌƖnmɔ ꞌꞌKɔgwlɛyi Zezii moꞌo. ꞌƖnmɔ -yaꞌa lɛꞌꞌo lɛ ti. ꞌƖnmɔ ꞌbhleꞌe ꞌɛ tisɔɛꞌɛ ꞌkpʋ kwa. ⅩⅧ ꞌƖnmɔ ꞌmo-o ꞌꞌKɔgwlɛyi. ꞌƖn ꞌmɛ ꞌko-oꞌo ꞌle -Lagɔ ꞌye ꞌɩnmʋ glu -za, ꞌɩn ꞌye ti-nɩ -lrɛɛ. Ɛ-bɛ ꞌan tinɩɛ ꞌmnɛ -see ꞌꞌtiinamʋ ꞌbhle yi. ꞌMɛmɛɛ -ke -da -yɔ, nyʋ-ʋ ꞌmɛꞌɛ, ʋn -nɩꞌa, ꞌɩn ꞌbhle-e wɔnkuɛ ꞌbho ꞌya ꞌꞌkpi. ⅩⅨ ꞌƐ dɩ, lɛꞌꞌo lɛ -ɩn -nɩꞌa liyenamʋ, ꞌcnɩ ɛ! Lɩ-ɩ -nɩꞌa ꞌtraamʋ zinamʋ -ke -yɩ ꞌyeꞌa -yi mʋ ꞌwla, ꞌcnɩ ɩ ꞌwee! ⅩⅩ -Ɩn ꞌye li-ɔ, ꞌcʋdrɩ -mɛɛsɔn ꞌɩn ꞌbhleꞌa kwa ꞌle ꞌan -linasʋ ꞌmʋ -ke sanuꞌa ꞌꞌnapɩꞌa ꞌꞌkpitidelɩ -mɛɛsɔn, ꞌɩn-ɩ yi-oꞌo ꞌɩn ꞌke -ɩnmʋ ꞌya ꞌzɔ -tɔ: ꞌCʋdrɩ -mɛɛsɔn ꞌmo-o Zeziiꞌa -glɩgbɩ -mɛɛsɔnꞌɔ ꞌꞌlrutidemʋ. ꞌꞌNapɩꞌa ꞌꞌkpitidelɩ -mɛɛsɔn ꞌmo-o Zeziiꞌa -glɩgbɩ -mɛɛsɔn.