Ⅰ Zɔ -lue ꞌzɔ ɔ, *Zezii -sɔꞌɔ ꞌmʋ-ɛ, ɔ ꞌye -badaklagba ʋn-ʋ ꞌlaꞌa Genɩzalɛɛtɩ wɔnli tinanamʋ mu. ꞌLe-e nyʋꞌa -dadudu -yɛ nɔꞌo ꞌle ʋn-ʋ ꞌꞌtutuꞌo, ꞌle, -Lagɔwlu ɔ-ɔ zaꞌa ꞌmʋti, ʋn ꞌke ɛ ꞌbɔꞌwɔn. Ⅱ Ɔ nʋꞌa -kaa, ɔ ꞌye-e ꞌle ꞌkɩka ꞌꞌyi gɔlɩ ꞌsɔn li. ꞌꞌNizemʋ -kɔ ꞌnɩ a, ʋn ꞌdre-e ꞌle ꞌya ꞌlimʋ ꞌle ʋn-ʋ wɔtɔꞌɔ ꞌwa -dadɩ. Ⅲ -Gblee, ɔ nʋꞌa -kaa, ɔ ꞌkpa-a Simɔɔꞌɔ gɔlʋ ꞌli, ꞌle ɔ ꞌye ɔ ꞌtmʋʋ ꞌle ɔ na: ꞌƖnmɔ bhade -ɩnmʋ li, yi -ɩn ꞌke gɔlʋ -nɛɛ po -ɩn ꞌke ꞌɩnmʋ ꞌkɩka gbo-tɛ. Ɔ ꞌlɛꞌɛ -kaa, ꞌle Simɔɔ -ke ɔ ꞌye mu. Ʋn nyniꞌa ꞌbho nya ti -sɛ ɛ, ɔ ꞌye gɔlʋ ti-nyna. ꞌLe-e Zezii -deꞌe ti ꞌle ɔ ꞌye ꞌbho ꞌkpa ɔ-ɔ tɔꞌɔ nyʋ.

Ⅳ Ɔ gwɛꞌɛ -wluwlua ꞌꞌyi a, ꞌle ɔ na: Simɔɔ, -ɩn -ke gɔlʋ -na, -ɩn -ke ɛ ꞌke ꞌꞌniꞌa -da -tɛꞌɛ ꞌmʋ tinyni, ꞌle -ɩn -ke -aꞌa -namʋ ꞌke ꞌbho aꞌba -dadɩ ꞌꞌvuto, a ꞌke zmi kpʋn. Ⅴ ꞌLe ɔ na: ꞌAn -Kɔyi, -glaapleꞌa ꞌꞌmatʋ, -a -zi ꞌnɩ ꞌmʋ-ɛ ꞌwee, -a -see lɛꞌɛ -lue komu ꞌye, -a sɩa-oꞌo bhubhuyiti. -Ɩnmɔ ꞌlɛꞌɛ ꞌtɔ -kaaꞌa dɩ a, ꞌɩn-ɩ ꞌye ꞌle ꞌan -dada ꞌꞌvuto mʋ. Ⅵ Ɔ poꞌa wlu ti ꞌꞌsɛɛ, ɔ -ke ꞌɔ -namʋ ꞌꞌwe ꞌꞌvutoꞌo-o ꞌwa -dadɩ ꞌle -bada ꞌmnɛ kɔ. Zmi ꞌwa -dadɩ jriꞌa, ꞌya ꞌꞌyidieɛꞌɛ dɩ, ɩ na ɩ ꞌke -dadɩ ꞌmnɩ -cna. Ⅶ Ʋn nʋꞌa -kaa, ꞌwa -namʋ -lrʋʋ-ʋ -nɩꞌa ꞌꞌsetigɔlʋ ꞌli, ʋn ꞌlaa ꞌnʋ-ʋ ꞌꞌyi ʋn ꞌke yi ʋn ꞌke ʋ -kpa. Ʋn yi-oꞌo ꞌle ʋn ꞌye zmi gɔlɩ ꞌsɔn ꞌmnɩ ꞌꞌyii; -toope -sieꞌe ꞌbho ɩ ꞌke ꞌꞌnidu ꞌꞌmna, ꞌya zmiꞌa ꞌꞌyiyiaꞌa dɩ.

Ⅷ -Gblee, Simɔɔ *ꞌPiɛlɩ ꞌwɔn-ɔ dɩ-ɩ ziꞌa ꞌzɔ ꞌmʋti. Ʋn -sɔꞌɔ ꞌꞌnukɔ ꞌmʋ ꞌle ɔ ꞌye Zezii ꞌkolri wɔnyi glu po ꞌle ɔ na: ꞌAn -Kɔyi, ꞌɩnmɔ ꞌbhade -ɩnmʋ li, ꞌꞌnyinynidɩꞌa nʋyi ꞌɩn ꞌꞌduꞌo; ꞌɩnmɔ -ke kpli-i seꞌa ꞌꞌyiꞌsrɛɛ ꞌle -mnɔɔɔ ꞌke ꞌmna linyni! ꞌƐ dɩ nyni ꞌle nya ti. Ⅸ -Gblee, -sɩanyɩ nʋꞌa -kaa, ɛ ꞌkpʋn-o Simɔɔ -ke ꞌɔ -namʋ, zmi ʋn triꞌa ꞌꞌnyni wɔn ꞌmʋ tiꞌa dɩ. Ⅹ Ɛ-bɛ -sɩanyɩ ꞌmnɛ -lrɛɛ, ɛ ꞌkpʋn-o ꞌɔ -namʋ Zaakɩ -ke *ꞌZaan, -ʋ ꞌma-a nyɔ -lue ʋn-ʋ ꞌlaꞌa Zebedeeꞌa ꞌꞌyreetɩ. ꞌLe Zezii na: Simɔɔ, -sɩanyɩꞌa ꞌlbha -ɩnmʋ -le! ꞌTraamʋ ꞌtɔ ɔ, -ka -aꞌa -dada jriꞌa zmi a, ꞌka-a -ɩn ꞌke nyunyu jri ꞌle ʋn ꞌke yi ʋn ꞌke -Lagɔꞌɔ nʋ ꞌꞌdu. Ⅺ Simɔɔ -ke ꞌɔ -namʋ ꞌwɔnꞌɔ Zeziiꞌa wlu -nɛɛ ꞌbɔ ɔ, ʋn ꞌꞌluoꞌo-o ꞌwa gɔlɩ ꞌmʋ, ʋn -kpʋn ꞌnɩ-ɩ ꞌkɩka. ꞌBho -gbaa -lue ꞌmnɛ ꞌmʋ, ʋn ꞌsie-e ꞌwa ꞌꞌnizelɩꞌa klɛ ꞌle ʋn -ke ɔ ꞌye mu. ꞌBho ꞌmnɔ, ꞌbho-o ʋn ꞌꞌluoꞌo ꞌɔ ꞌbɩnɛɛ ꞌmʋ ꞌle ʋn -ke ɔ ꞌye -da ꞌwee mu.

Ⅻ Ɩ ziꞌa -kaa, *Zezii -sɔꞌɔ ꞌmʋ-ɛ ɔ ꞌye Galileebhlʋkpa ꞌꞌkpiꞌa -gwlɔ -lue ꞌmʋ mu. Ɛ-bɛ gwlɔ ꞌmnɛ ꞌmʋ, nyukpasu -lue *lalʋ -zaꞌa ku, ꞌbho-o ɔ -yi -nɩꞌe Zezii -bodɩ. Ɔ ꞌye ꞌɔ li a, ɔ ꞌpo -ɔ ꞌkolri wɔnyi glu ꞌle ɔ na: ꞌAn -Kɔyi, ꞌɩnmɔ bhade -ɩnmʋ li, ꞌɩn yi-oꞌo -ɩn ꞌke ꞌɩnmʋ ꞌpʋʋn. ⅩⅢ -Gblee, Zezii ꞌwɔnꞌɔ wlu ꞌmnɛ ꞌbɔ, ꞌle ɔ ꞌye sʋ sro, ɔ ꞌye ɔ liꞌtʋ ꞌle ɔ na: Kɩn, ꞌɩn ꞌwɔn-oꞌo, ꞌpʋn! ꞌBho -gbaa -lue ꞌmnɛ ꞌmʋ ꞌɔ ꞌwɛ ꞌbhɔ-ɔꞌo, ⅩⅣ ꞌle Zezii ꞌye ɔ ꞌtmʋʋ ꞌle ɔ na: Po -lokui! -Bho -ɩn mu a, nyɔꞌɔ ꞌwɔn ꞌya dɩ ꞌbɔ -le! Mu ꞌle *-Lagɔꞌɔ ꞌsragazayi gbo, -ka -ɩn -nɩꞌa, -ɩn ꞌke ɔ ꞌna ꞌꞌyi-tɔ, *ꞌsraga -ke dɩ *Moyiizɩ -za ꞌka ꞌmʋ a, ɔ ꞌke ɛ -za -aꞌa dɩ, ꞌle, -ka -ɩn ꞌpʋnꞌa a, nyʋꞌa klɛ ꞌke ɩ yibo. ⅩⅤ -Gblee, Zezii -see ꞌkɩ ꞌybha ꞌɔ ꞌnynɩ ꞌke ti-wa. Ɛ -nɩꞌa ꞌtɔ -kaa, ɛ -waꞌa-a ꞌle Galileebhlʋkpa ꞌꞌkpi ti. Nyʋꞌa -dadudu ꞌwlʋ-o gwlɛ ꞌꞌkpiti ꞌle ʋn-ʋ yɛ ꞌnɔ ꞌle ʋn ꞌke ɔ -lokuipo, ꞌle, nyʋ -yʋ ꞌbhleꞌa ꞌwalɩ ꞌmʋ a, ɔ ꞌke ʋ ꞌpʋʋn. ⅩⅥ Ʋ-bʋ nyʋ ꞌmnʋꞌa ꞌꞌyidieɛꞌɛ dɩ, ɔ-ɔ poꞌo gwlɔ le. ꞌBɩ -ke ꞌmʋ nyunyu seꞌa -de, ꞌle-e ɔ-ɔ muꞌo ꞌle ɔ-ɔ poꞌo *-Lagɔ wɔn gbo.

ⅩⅦ ꞌWɩ -lrɩɩ ziꞌa, Zezii -nɩ nyʋ -Lagɔwlu -tɔnamʋ. *ꞌZuifʋꞌa ꞌplan ʋn-ʋ ꞌlaꞌa *Faliziɛɛn -ke *-Lagɔꞌɔ gbayibomʋ -lrʋʋ -deꞌe-e ꞌbho ꞌɔ ꞌꞌtroli ti ꞌle ʋn-ʋ po ꞌɔ -lokui. Ʋn -sɔꞌɔ-ɔ Galilee -ke Zideeꞌa gwlɛꞌɛ -dadudu ꞌmʋ. Ʋn -sɔꞌɔ-ɔ Zideebhlʋkpa ꞌꞌkpiꞌa -gwlɔklagba Zelizalɛɛmʋ -lrɛɛke. Zezii ꞌbhle-e -Lagɔꞌɔ wɔnkuɛ ꞌmʋ ꞌle ɔ-ɔ ꞌpʋʋnꞌo ꞌꞌgwizimʋ. ⅩⅧ -Da ɔ -nɩꞌa nyʋ -tɔnamʋ a, nyʋ -lrʋʋ ꞌbhle-e -klɔklɔyi -lue; ɔ ꞌpɛ-ɛ ꞌbho ꞌɔ ꞌꞌkpitipɛlɛ ꞌꞌkpi ti ꞌle ʋn-ʋ yɔ ꞌɔ Zezii. Nyʋꞌa ꞌꞌyidiedɩ, -ka ʋn ꞌka -nyna ʋn ꞌke ɔ ꞌle -budu ꞌli -pa, ꞌle ʋn ꞌke ɔ Zezii ꞌꞌyi-tɔ, ʋn se ꞌna ꞌbhle. ⅩⅨ -Gblee, ʋn nʋꞌa -kaa, ʋn -ke ɔ ꞌya-a ꞌle -budu ꞌꞌkpi, ꞌɛ -da Zezii -nɩꞌa, ꞌbho-o ʋn cɛꞌɛ wɔn, ꞌle ʋn ꞌye ɔ ꞌꞌbhlukui gbo -yi -nɩ, ʋn ꞌye ɔ ꞌbho ꞌɔ ꞌꞌyigbeyi tiꞌꞌsii, ꞌbho nyʋꞌa gwia ꞌmʋ. ⅩⅩ -Ka nyʋ ꞌmnʋ de ꞌɔ ꞌꞌgwli, ɔ ꞌyeꞌa ꞌna li a, ꞌle ɔ ꞌye -kaa -klɔklɔyi ꞌꞌyiꞌlɛ: ꞌƖn bha, -aꞌa ꞌꞌnyinynidɩ -gwɛꞌɛ-ɛ ꞌbho -Lagɔꞌɔ ꞌꞌyigbeyi ti.

ⅩⅪ Ɔ ꞌlɛꞌɛ -kaa a, Faliziɛɛn -ke -Lagɔꞌɔ gbaꞌa yibomʋ ꞌyeꞌa ꞌɛ da-a wluꞌo -kaa ꞌle ꞌwa -pɔlʋ ꞌzɔ: ꞌƖnnɔɔnɔ -naa, yɔɔ -ke ꞌꞌbhuo ɔ ꞌꞌduꞌo ꞌle ɔ-ɔ nyniꞌe -kaa -Lagɔꞌɔ ꞌnynɩ wɔnꞌɔ? ꞌBho -Lagɔꞌɔ ꞌꞌyigbeyi ꞌyɔɔ ꞌbhɛɛꞌɛ ɔ ꞌke nyɔꞌɔ ꞌꞌnyinynidɩꞌa dɩ ꞌbhɔ, -bho ɛ -se -Lagɔ -nɩ -lue? ⅩⅫ Zezii -mnɔɔ yiboꞌo-o lɛ ʋn-ʋ popoꞌa ꞌgwlʋti see, ꞌle ɔ na: Leedɩ aꞌba -naagɩ -nɩꞌe -kaaꞌa? ⅩⅩⅢ ꞌƖn ꞌbhɛɛꞌo ꞌɩn ꞌke amʋ -tɔ na ꞌɩn ꞌbhle-e wɔnkuɛ ꞌle ꞌɩn ꞌke nyɔ -bodɩ nʋ na: -Aꞌa ꞌꞌnyinynidɩ -gwɛꞌɛ-ɛ ꞌbho -Lagɔꞌɔ ꞌꞌyigbeyi ti. -Bho ꞌɩn nʋ nyɔ -nɔɔ -bodɩ na: -Sɔ ꞌmʋ, ꞌꞌluo -aꞌa ꞌꞌkpitipɛlɛ ꞌmʋ, -ɩn ꞌke -na, ꞌle ɔ ꞌke ɛ nʋ, ꞌɩnnɛ ꞌke -tɔ -ka ꞌɩn ꞌbhleꞌa wɔnkuɛ ꞌle ꞌɩn ꞌke nyɔ -bodɩ nʋ, na: -Aꞌa ꞌꞌnyinynidɩ -gwɛꞌɛ-ɛ ꞌbho -Lagɔꞌɔ ꞌꞌyigbeyi ti. ⅩⅩⅣ ꞌƖn ꞌybha-oꞌo a ꞌke ɩ yibo -ka ꞌɩnmɔ *Nyunyɔꞌɔ ꞌꞌYu ꞌbhleꞌa wɔnkuɛ ꞌnɔɔ ꞌbhlʋkpa ꞌꞌkpi, ꞌɩn ꞌke nyʋꞌa ꞌꞌnyinynidɩꞌa dɩ ꞌbhɔ ꞌbho -Lagɔꞌɔ ꞌꞌyigbeyi. Ɔ ꞌlɛꞌɛ -kaa a, ꞌle ɔ na -klɔklɔyi -bodɩ: -Sɔ ꞌmʋ, ꞌꞌluo -aꞌa ꞌꞌkpitipɛlɛ ꞌmʋ, -ɩn ꞌke -ɩn ꞌꞌbhli le mu! ⅩⅩⅤ -Gblee, ꞌbho -gbaa -lue ꞌmʋ, ɔ ꞌye ꞌmʋ-sɔ, ꞌbho nyʋ ꞌweeꞌa ꞌꞌyigbeyi, ɔ ꞌye ꞌɔ ꞌꞌkpitipɛlɛ ꞌmʋꞌꞌluo, ɔ-ɔ muꞌo ꞌɔ ꞌꞌbhli le, ꞌle ɔ-ɔ ꞌbhɛɛꞌɛ -Lagɔꞌɔ ꞌnynɩ ꞌꞌyi.

ⅩⅩⅥ Nyʋ ꞌyeꞌa -kaa li ꞌꞌsɛɛ, wɔn ꞌma-a ꞌwa klɛ ti, ꞌle ʋn-ʋ ꞌbhɛɛꞌɛ -Lagɔꞌɔ ꞌnynɩ ꞌꞌyi. Ʋ-bʋ nyʋ ꞌmnʋ a, -sɩanyɩ kpʋn -ʋꞌo ꞌle ʋn-ʋ nʋꞌo na: -A -see -bhla -yɛɛ -mnɛɛꞌɛ lɛtu ꞌye ke!

ⅩⅩⅦ -Klɔklɔyi muꞌa ꞌɔ ꞌꞌbhli le a, *Zezii -mnɔɔ -sɔꞌɔ ꞌmʋ-ɛ, ɔ ꞌye ꞌbho lizi. Ɔ -nɩ zinamʋ, ɔ ꞌye-e *lapoozayi -lue ʋn-ʋ ꞌlaꞌa *Levii li. Ɔ -deꞌe-e -budu -lue ꞌli ti; ꞌbho-o ɔ-ɔ za nɩꞌe zikamʋ mɔni ꞌꞌlrumʋ, ꞌle Zezii na: Yi ꞌɩnmʋ ꞌbɩ ꞌɩn -ke -ɩn ꞌke -na! ⅩⅩⅧ -Ɩn ꞌye li-ɔ, Levii nʋꞌa -kaa, ɔ -sɔꞌɔ ꞌmʋ-ɛ. Mɔni ɔ-ɔ ꞌyeꞌa ꞌɔ lbhʋ ꞌmʋ, ꞌɔ -pɔlʋ -see ꞌmʋzegbe ꞌya dɩ, ꞌle ɔ -ke Zezii ꞌye mu.

ⅩⅩⅨ Zɔ -lue ꞌzɔ, Zeziiꞌa dɩ Levii ꞌꞌduꞌo gɔ. ꞌƐ kamʋ ɔ ꞌlɔ ɔꞌo ꞌle ꞌɔ ꞌꞌbhlibhlegbo ꞌle ɔ ꞌye ꞌle mu. Lapoozamʋ -ke nyʋ -dudu -lrʋʋ -nɩꞌe-e ꞌle -budu ꞌli ꞌle ʋn -ke *Zeziiꞌa -namʋ bheteꞌe gbo, ꞌle ɔ -ke ʋn-ʋ liꞌo. ⅩⅩⅩ -Gblee, *Faliziɛɛn -ke *-Lagɔꞌɔ gbaꞌa yibomʋ -lrʋʋ -gbɩ -nɩꞌa ꞌbho ꞌyeꞌa ꞌna li, ʋn ꞌpo-o ꞌcɛ ꞌle ʋn na Zeziiꞌa -namʋ -bodɩ: Leedɩ a -ke lapoozamʋ -ke ꞌꞌnyinynikpliꞌa nʋmʋ -lrʋʋ-ʋ li nɩꞌe -dalueꞌa? ꞌKa se ꞌꞌyrili-nmɔ. ⅩⅩⅪ Zezii ꞌwɔnꞌɔ ꞌwa wlu ꞌmnɛ ꞌbɔ ɔ, ɔ ꞌpo-o ꞌꞌnna ꞌle ɔ na: ꞌKpayibhleyiꞌa ꞌbɔ ꞌꞌgipoyi ti, -bho ɛ -se nyɔ -ke ꞌꞌlru-u ꞌbhatiꞌa, ꞌɩnnɔ ꞌbɔꞌɔ ꞌꞌgipoyi ti. ⅩⅩⅫ ꞌƐ ꞌzɔ-ɔ ꞌmo-o, nyʋ-ʋ ꞌlaꞌa ꞌwa ꞌꞌbhi kplizɩgɩꞌa nʋmʋ, ꞌɩn -see ꞌnɔɔ ꞌkmʋ ꞌmʋ ꞌwa dɩ yi. ꞌꞌNyinynikpliꞌa nʋmʋꞌa dɩ ꞌɩn yiꞌo ꞌle ʋn ꞌke ꞌwa ꞌꞌnyinynidɩ ꞌꞌyiyibo ꞌbho -Lagɔꞌɔ ꞌꞌyigbeyi ꞌle ʋn ꞌke ɔ gbo ꞌꞌbhiti.

ⅩⅩⅩⅢ *Zezii gwɛꞌɛ -wluwlua ꞌꞌyi a, ꞌle ʋ-bʋ nyʋ ꞌmnʋ ꞌye ɔ -kaa ꞌꞌyiꞌlɛ -lrɛɛ: *ꞌZaanꞌa -namʋ-ʋ ꞌpa-a -nɔɔ -lrɛɛ ꞌli -su ꞌle ʋn-ʋ poꞌo *-Lagɔ wɔn gbo. ꞌKa ꞌmnɔ ꞌka-a *Faliziɛɛnꞌɛ nʋ-ʋ nʋꞌo. Leedɩ -mnaaaꞌa -namʋꞌa pa suꞌa? ꞌKa se ꞌꞌyrili-nmɔ. ⅩⅩⅩⅣ Ʋn poꞌa wlu ti a, ꞌle Zezii ꞌye ꞌꞌyi po ꞌle ɔ na: ꞌBho ꞌnynɔkpagɔꞌɔ zɔ nyimiɛ-ɛ ꞌla-a nyʋ. -Bho ɔ -nɩ ꞌbho ꞌle, ꞌgwlʋ ꞌbhɛɛꞌɛ ɛ ꞌke nyʋ ꞌmnʋ li-nyni ꞌle ʋn ꞌke -lɔlɔ ꞌsɩnꞌa? -Gba, -bho ɔ -nɩ ꞌbho a, ꞌgwlʋ -see ʋ li-nyni yi, ʋn-ʋ ꞌye-e -li -mʋ ꞌle ꞌbʋbʋa ꞌmʋ. ⅩⅩⅩⅤ Ɛ -nɩꞌa -kaa ꞌmʋ a, -nɔɔ -lrɛɛ-ɛ ꞌye-e -nyni -mʋ, ꞌle nyimiɛ ꞌmnɔ ꞌke ꞌwa ꞌꞌklumʋ ꞌwlʋ, ꞌbho-o ʋn-ʋ ꞌye -lɔlɔ ꞌsɩn -nɩ mʋ.

ⅩⅩⅩⅥ Zezii ꞌpo-o ꞌꞌyi -lue -lrɛɛ ꞌle ɔ na: Nyɔ se ꞌbhɛɛ ɔ ꞌke -banasʋaꞌa -da -cnaꞌa ꞌꞌyriɛfɔtɔlre ꞌꞌpa -nɩ. -Bho ɛ -nɩ -kaa a, ꞌꞌyriɛfɔtɔlre-e -geti-e -banasʋa, ꞌle ꞌɛ ꞌbɩ-ɩ ꞌbhɛꞌɛ ꞌmʋti. ⅩⅩⅩⅦ -Gblee, -ka -lue ꞌmnɔ ɔ, ꞌka-a nyɔ se ꞌbhɛɛ, ꞌtokogbalu ʋn ꞌꞌpa -nɩꞌa -drutɛn, nyɔ ꞌke ꞌle ꞌɛ ꞌlimʋ nmɔlre po. -Bho ɛ -nɩ -kaa a, nmɔlre-e ꞌwa-a ꞌtoko ꞌle nmɔ -ke ꞌtoko-o nyniꞌe wɔn. ⅩⅩⅩⅧ ꞌƐ dɩ nyɔ-ɔ poꞌo nmɔlre ꞌle ꞌtokolre ꞌli. ⅩⅩⅩⅨ Ɛ -nɩꞌa -kaa ꞌmʋ a, ꞌle nyɔ ꞌke nmɔsʋa ꞌna, ꞌɔ zi nmɔlreꞌa dɩ ꞌle ɔ-ɔ nʋꞌo: Nmɔsʋa -nmɔꞌɔ wɔn.