1 ꞌBi kuán kionga Jesús sejñandai ndachikun tseꞌe Genesaret, xutankjiun tiꞌbeꞌnyuꞌñu kui tuxi kjuintꞌeni enre Naꞌenchana. 2 ꞌBa Jesús tsabe jó barku xi kjiyundai ndachikun, ꞌba xi tsuba tjiuti kio ꞌetukajenni nga yane naꞌya tire. 3 ꞌBa Jesús jaꞌasꞌen jngu barkubiu, xi tseꞌe Simón, ꞌba tsiꞌare nga ngatatsikjinchire ngando. ꞌBa tsikꞌejña ngaya barku, ꞌba ꞌnda kio yakuyanire xuta. 4 ꞌBa kionga je jetꞌare nga yakuya, kitsure Simón:

—Tꞌinkue barku ña ngisa nanga nando, ꞌba kio chanikjaꞌajiun naꞌya tinu tuxi sa̱kuninu tjiuti.

5 ꞌBa Simón kitsingojore:

—Naꞌen, je kañaꞌaxai̱ tsaꞌa nistjen ꞌba nijnguú kaxuntsjai. Tunga mé ji ꞌba teꞌminaa̱, skanikjaꞌajinfara̱ naꞌyo.

6 ꞌBa kionga nchjabiu je ꞌba kitsaꞌen, ꞌñu nkjin tjiuti kixuntsja kaꞌnda naꞌyo je mejen kitijnda. 7 ꞌBa ꞌbatsaꞌen tu chuba= kitsaꞌenre nchja xinkjin xi tjinduya barku xi ngijngu, tuxi kjuaꞌekasekoni. ꞌBa nchjabiu jendiba, ꞌba ꞌñu kitsitse ngojó barkubiu ꞌba tu ngichuba kichaja ngisare nga stiungijndiu. 8 Nga tsabe kibi, Simón Pedro tsakasenkunchꞌin ngixkun Jesús, ꞌba kitsure:

—Tisentꞌaxinnaa̱ Naꞌen, ngatꞌa jngu= ña̱ xuta je.

9 ꞌBi kitsu Simón ngatꞌa kui ko ngatsiꞌi xi tjenko kuakunre tu kjuare nga ꞌñu nkjin tjiuti kitsuba. 10 ꞌBa nde kjimare Santiago ko Juan, kiꞌndire Zebedeo, xi ñatjen tsaꞌexa Simón. Tunga Jesús kitsure Simón:

—Bi kuin. ꞌNdani ngandaꞌe bi tjiuti kꞌuekui, tusa xuta kꞌuekui xi ngatꞌa tsaꞌan.

11 ꞌBa kionga je jaꞌeko barku ña je nangi, ꞌendu yeje xi tjinre ꞌba kitjenngi Jesús.

12 ꞌBa kionga Jesús tijña jngu naxinanda chi, jaꞌe jngu xuta xi ꞌñu kunre chiꞌin feꞌndujun. ꞌBa nga tsabe Jesús, kitsikindi ꞌnda tꞌanangiu ꞌba ꞌetsꞌare:

—Ji naꞌen, tsa mejénri, ku̱an sitsejunnaa̱ nga xjaꞌaxinnaa̱ chiꞌin xi kunna̱.

13 ꞌBa meni Jesús kitsure nga yanere ntsja xi tjiꞌmio:

—Mejénna̱. Ngatamatsje ngani.

ꞌBa ndekuini chubabiu kitjuxinre chiꞌin feꞌndujun xi kunre xutabiu. 14 ꞌBa Jesús ꞌenere xutabiu:

—Tuꞌyá ꞌbe_ri nijmi. Tu tꞌin sani ꞌba tikaku_ri yojori naꞌmiu. ꞌBa tꞌikue kjuatjo xi baku nga je kuatsjejin jotsaꞌen kitsu Moisés, tuxi ꞌbatsaꞌen skuekixini xuta nga je kuanda ngani.

15 Tunga ngisa ꞌñu nuꞌyare ngatꞌa tseꞌe Jesús, ꞌba ꞌñu nkjin xuta mañajan tuxi kuasen ñojonnire ꞌba tuxi kui sindani chiꞌin xi kunre. 16 Tunga Jesús fi nga fikjako Naꞌenchana ngaꞌnde tꞌaxin.

17 ꞌBa jngu nixtjin nga Jesús tibakuya, ꞌba nde kio tjindu yakꞌa nchja fariseo ko yakꞌa chjine kjuatexumo xi jendibani ngayéje naxinanda chi tseꞌe Galilea, xi tseꞌe Judea, ꞌba ko naxinanda Jerusalén. ꞌBa kjuaꞌñure Naꞌenchana kisꞌejñatsejen ngajinre Jesús nga tsinda xi sefesun. 18 ꞌBa kio jaꞌe yakꞌa xuta xi kjiyare kuxta jngu xi bi ma fi. ꞌBa mejénre kjuaꞌasꞌenko niꞌyo tsakai ꞌba sikajña ngixkun Jesús. 19 Tunga bi masjaire jótsaꞌen kjuaꞌasꞌenni, tu kjuare xutankjiun. ꞌBa ꞌbatsaꞌen tsijin ngasun nkꞌa niꞌyo, ꞌba tsꞌaxjextiu jngu kaꞌa ña kisate niꞌyo, ꞌba kio tsꞌajenni ko kuxtare xi tjiꞌmio ngamasenre xutankjiun ꞌba kitsikajña ngixkun Jesús. 20 ꞌBa kionga Jesús tsabe kjuamakjainre nchjabiu, kitsure xi tjiꞌmio:

—Je kuachatꞌari jeri amiguna̱.

21 ꞌBa ꞌbatsaꞌen chjine kjuatexumo ꞌba ko xuta fariseo ꞌetutsꞌinre nga ꞌbitsaꞌen kitsikjaꞌetsjen: “¿ꞌYá= kibi xi bi bekun Naꞌenchana nga ꞌbatsaꞌen tinchja? Tu Naꞌenchana sa xi mare nichatꞌare jere xuta.”

22 Tunga Jesús tsabe mé= xi inyatsikjaꞌetsjen, ꞌba tsiningiyare:

—¿Ánñu ꞌbatsaꞌen nikjaꞌetsjenñu jun? 23 Ñáre xi ngisa bi naꞌenre kuixan: ¿A nga kuixan: “Je kuachatꞌari jeri”? ¿Asa nga kuixan: “Tisetjen ꞌba titjajme”? 24 Tunga mejénna̱ nga xio nga Kiꞌndire Xuta xiꞌiun tjinre kjuaꞌñu kui ngasunꞌndebi nga sichatꞌa je.

ꞌBa ꞌbatsaꞌen kitsure xi bi ma fiu:

—Ji xinra̱, tisetjen, chjube kuxtari ꞌba tꞌin niꞌyari.

25 ꞌBa ngixkun xutankjiun taꞌa tsisetjen xi tjiꞌmio ꞌba kiskjebe kuxta xi kjijñayaa̱ tsakai, ꞌba titsichjire Naꞌenchana nga kiji ngani ndaba. 26 ꞌBa ngatsiꞌi kuakunre ꞌba kitsichjire Naꞌenchana, ꞌba niki inyatsakjun= nga ꞌbi kitsure xinkjin:

—Kjuakun xi kjuakixi= kjiꞌya ngandaꞌe.

27 Jaskan nga je kuán kibi, Jesús ꞌetju ꞌba tsabe jngu xuta xi kjebechjintjai tsajmi ngatꞌare Roma xi Leví ꞌmi. Tijña ngaꞌnde ña tjubechjintjai tsajmi. ꞌBa Jesús kinchjare ꞌba kitsure:

—Ndetjenngina.

28 ꞌBa ꞌbatsaꞌen Leví tsisetjen, ꞌejña yeje xi tjinre ꞌba kitjenngi Jesús.

29 ꞌBa tsꞌaxje jngu sꞌi je ndaba ngatꞌare Jesús; ꞌba ko ꞌñu nkjin xi kjebechjintjai tsajmi ngatꞌare Roma, ñatjen ko kjaꞌe ngisa xuta, tjindutꞌako yamixo. 30 Tunga xuta fariseo ko chjine kjuatexumo xi tujngu mako xinkjin josiko xutare Jesús, ꞌba kitsure:

—¿Ánñu ko xuta xi tjinre je ꞌba ko xi kjebechjintjai tsajmi ñatjen ninchjakoniñu ꞌba ꞌyukoñu?

31 ꞌBa Jesús kitsingojore:

—Xi nda bi chjineki machjenre, tu kui sani xi sefesun. 32 Bi xuta xi kixi jaꞌekinchja_ra̱, tu kui sani xi tjinre je, tuxi sikꞌantjaiyani kjuafaꞌetsjenre ꞌba kjuaꞌe ngani ngixkun Naꞌenchana.

33 ꞌBa ꞌbatsaꞌen nchjabiu kitsure Jesús:

—Xutare Juan ꞌba ko xi tseꞌe nchja fariseo ne kjitꞌa ꞌbendu kjindia ꞌba fako Naꞌenchana, tunga xi tsiji tu kjenntsjai ꞌba ꞌbintsjai.

34 ꞌBa Jesús kitsingojore:

—¿A ku̱an jun sikꞌendu kjindio xuta xi kjinikjintꞌe jngu sꞌi kjuabixan yejerañu xi xiꞌiun tijñajin ngisare? 35 Tunga kjuaꞌe jngu nixtjin kionga stukjaꞌare xi xiꞌiun, ꞌba kionga kjuaꞌe nixtjinbiu, kio=nga kꞌuendu kjindia.

36 ꞌBa nde ꞌejñare kui kjuakusunbi:

—Niꞌyá batetꞌachi jngu xutji xatse tuxi kꞌuextiuyani jngu xutji chinga. Ngatꞌa tsa ꞌba saꞌen, tsikjekjua= xutji xatsio; ꞌba nde najñu xatse chu bi nda faꞌakjare ko xi chingo. 37 ꞌBa nde niꞌyá minya binu xatse jngu tjiuxin chinga. Ngatꞌa binu xatsio kꞌuetijnda tjiuxin chingó, ꞌba binu titsen ꞌba kjuekjua tjiuxiun ngayeje. 38 ꞌBa kui= kjuañu binu xatse xinyani tjiuxin xatse. 39 ꞌBa tsajain xi ꞌbi binu xi je chinga ꞌba saꞌe jaskan ku̱amejénre xi xatse, ngatꞌa tsu: “Xi je chinga ngisa nda ꞌyu.”