1 Yun te ni jinkuiin san nuu ñuti yuꞌu ndute mar. Te ni jini san ni jinonta in kiti xeen nuu ndute yun, te oo uja xini ti vi uxi ndiki ti, te ndi uxi ndiki ti ka ñuꞌu corona, te nuu ndi uja xini ti ndee in sivi ja kaneꞌe jin ia Dios. 2 Te kiti xeen ja ni jini san yun kaa ti na kaa in yiꞌi, te ndaꞌa ti kaa na kaa ndaꞌa oso, te yuꞌu ti kaa na kaa yuꞌu ndikaꞌa. Te ni jiñaꞌa koo yun jakaꞌnu ti vi nuu mesa nuu tatnuni ti vi tniuu kaꞌnu ja konee kiti xeen yun. 3 Te ni jini san ja ni tnakueꞌe in xini ti, te na tnoꞌo ja vija ni kuyatni ja kuu ti, su ni nduvaꞌa xini ti. Te ni ka saꞌu kuii ini ñayiu nii ñuyiu nuu ni ka jini ja ni nduvaꞌa ti, te ni ka jata ndikin ñai jin ti. 4 Te ni ka chiñuꞌi koo kaꞌnu yun, chi ni jiñaꞌa ti tniuu kaꞌnu ja nee ti nuu kiti xeen yun, te suni ni ka chiñuꞌi kiti xeen yun, te ka jiñaꞌi:

―Tu na in kintnaꞌa inuu jin kiti xeen yaꞌa, ni tu na in kundee ja kaxin tnaꞌa jin ti ―ka kachi.

5 Te suni ni jandetu ia Dios ja kaꞌan teyii ti, vi ja kaneꞌe ti jin ya. Te ni niꞌi ti jakaꞌnu ja kotatnuni maa ti nuu uu xiko uu yoo. 6 Te saa ni saꞌa ti, chi ni kaneꞌe ti siki ia Dios, vi ni kaneꞌe ti siki sivi ya, vi siki nuu oo ndiaꞌa ya, vi siki ndiꞌi ia ka oo andivi. 7 Te suni ni jandetu ia Dios ja kaxin tnaꞌa ti jin ñayiu maa ya, te kundee ti nui. Te suni ni niꞌi ti tniuu kaꞌnu ja kotatnuni ti nuu ñayiu ndiꞌi ni tatatnoꞌo vi ñuu naꞌnu vi ñuu kueli vi ndiꞌi nuu saꞌan. 8 Te ndiꞌi ñayiu ñuyiu ni ka chiñuꞌu kiti xeen yun, ñayiu ja tu ka yoso sivi ndee kiuu xtnañuꞌu nuu ni jinkoo ñuyiu nuu liuru teku ja nevaꞌa Lelu ia Dios, ia ni jati niñi ja ni jiꞌi ya nuu cruz. 9 Te na ñayiu oo soꞌo, te na konini.

11 Yun te ni jini san inka kiti xeen ja ni jinonta ti nuu ñuꞌu. Te oo uu ndiki ti, te na kaa ndiki lelu kaa ndiki ti, su kaꞌan ti na kuinio in koo kaꞌnu. 12 Te suni tatnuni ti ndiꞌi nagua tatnuni kiti xtnañuꞌu yun jin nuu maa ti. Te saꞌa ti ja vi chiñuꞌu ña ñayiu ñuyiu jin kiti xtnañuꞌu yun, kiti ni tnakueꞌe xini ja vi ja yatni ja kuu ti, te ni nduvaꞌa ti. 13 Te suni saꞌa ti taka tniuu naꞌnu ja vi ndee saꞌa ti ja kai ñuꞌu andivi, te makuun ichi nuu ñuyiu jin nuu ndiꞌi ñayiu. 14 Te jin tniuu naꞌnu ja ni kuu saꞌa ti jin nuu kiti xtnañuꞌu yun, te ni xndaꞌu ti ñayiu ñuyiu. Te ni tatnuni ti ja vi saꞌa ñayiu in chuꞌchi, nagua kaa maa kiti xtnañuꞌu ja ni tnakueꞌe xini ti jin yuchi kani, ja vi ja yatni ja kuu ti, te ni nduvaꞌa ti. 15 Te ni niꞌi kiti kuu uu yun in jakaꞌnu ja kuu kuñaꞌa ti ja teku chuꞌchi ja kaa nagua kaa kiti xtnañuꞌu yun, nagua ja saa, te kuu kaꞌan chuꞌchi yun, te tatnuni ja vi kaꞌni ña jin ñayiu tu ka kuini ja vi chiñuꞌu ña jin. 16 Te suni saꞌa kiti kuu uu yun ja ndiꞌi ñayiu naꞌnu vi ñayiu kueli, vi ñayiu kuika vi ñayiu ndaꞌu, ñayiu jinokuechi vi ñayiu tu jinokuechi, ja vi jinkondee in tnuni ndaꞌa kuaꞌi axi tnei. 17 Te ni in ñayiu ma kuu kuaan axi xiko nuu ja tu na tnuni ndisoi axi sivi maa kiti xeen yun a número sivi ti.

18 Yaꞌa kuu nuu vi ndukuo tnoꞌo ndichi, te na ñayiu jinkuiꞌnu ini, te na kaꞌui número kiti xeen yaꞌa, chi número in ñayiu ñuyiu kuu. Te número yaꞌa kuu iñu ciento uni xiko iñu.