1 Ma ndunaa ini ron tnoꞌo ni kaxtnoꞌo rin, vi seꞌe,

te tavaꞌa nuu anu ron tnoꞌo tatnuni rin.

2 Chi saa, te koteku ron kuakuaꞌa kuia,

te koo vii koo vaꞌa ron.

3 Te ma kujioo jandaꞌu ini ia Dios vi tnoꞌo ndaa ya nuu ron,

te tnaa sukun ron na kuinio in ja ñuꞌu sukun,

te tee tnoꞌo ya ini anu ron.

4 Saa te niꞌi ron ja chindee chituu ña ia Dios,

te vi kaꞌan vii vi kaꞌan vaꞌa ña ñayiu jin ron.

5 Kukanu ini Jitoꞌo ndiꞌi ron jin anu ron,

te ma chituu ron maa ron jin ja jinkuiꞌnu ini ron.

6 Kuꞌun ini Jitoꞌo nuu ndiꞌi ichi jika ron,

te maa ya ndasandaa ichi chindaa jika ron.

7 Ma kokuu ron ñayiu ndichi jin ja ndakani ini maa ron,

koyuꞌu niꞌnu Jitoꞌo, te kujioo nuu jakueꞌe.

8 Chi yun kuu tatna guaꞌa nuu yiki kuñu ron,

nagua ja nduu ndakui ron.

9 Chiñuꞌu Jitoꞌo jin ja nevaꞌa ron,

te soko nuu ya jaxtnañuꞌu ja kee nuu ñundeꞌi jitu ron.

10 Saa te vi kuꞌun chitu ndevaꞌa saka nuu ñuꞌu ja jitu ron,

te vi suaꞌa jati nduxi uva nuu juꞌni ron ti.

11 Te ma skexiko ron, vi seꞌe, nuu tnundoꞌo ja ndakanu ichi ndaa ña Jitoꞌo,

te ma tunini ron nuu kuxeen ya nuu ron.

12 Chi tetniuu Jitoꞌo tnundoꞌo nuu ndakanu ichi ndaa ña ya jin ñayiu kutoo ya,

nagua saꞌa tata nuu kani de seꞌe de ja kutoo de nuu ndakanu ichi ndaa de.

13 Na taꞌu na ndetu ñayiu nukuꞌun tnoꞌo ndichi

vi ñayiu niꞌi ja jinkuiꞌnu ini.

14 Chi jaguaꞌa ka kuu ja ni niꞌi jin yun, masu jin plata,

te kuaꞌa ka ja niꞌi jin yun, masu jin oro vii.

15 Chi yaꞌu ndevaꞌa ka ndee tnoꞌo ndichi yun saa yuu vii ndevaꞌa,

te ni in ja jioꞌo ron ma kuu skintnaꞌa inuu jin ron.

16 Chi jin ndaꞌa kuaꞌa taa kuakuaꞌa kuia ja koteku ron,

te jin ndaꞌa satni taa jakuika konevaꞌa ron vi jayiñuꞌu.

17 Te ndiꞌi ichi taa kuu ichi junkuaan ndevaꞌa ini ron.

Te ja kaka ron ichi chindaa kuu ja koo mani ron.

18 Te tnoꞌo ndichi yun kuu in yutnu ja jiñaꞌa ja teku ñayiu niꞌi tnoꞌo yun ja konevaꞌi,

te na taꞌu na ndetu ñayiu niꞌi ja konevaꞌi.

19 Chi jin jandichi maa Jitoꞌo, te ni saꞌa ya ñuyiu.

Te jin ja jinkuiꞌnu ini ya, te ni saꞌa yutnu ya andivi.

20 Te jin ja jini ya, te ni saꞌa ya ja ni jaꞌnde tnaꞌa ndute mar,

te nuu yuyu ndee andivi.

21 Kinuu guaꞌa tnoꞌo ja saꞌa ndaa ron, vi seꞌe,

te tavaꞌa tnoꞌo ja niꞌnu ini ron.

22 Chi kokuu in ja koxteku anu ron,

vi in ja ndukutu sukun ron.

23 Yun te kukanu ini ron ichi jika ron,

te tu na ndee kachi jaꞌa ron.

24 Te tu nagua koyuꞌu ron nuu jinkotuu ron,

chi jinkotuu ron, te sii ini ndevaꞌa ni kusun ron.

25 Te ma koyuꞌu ron ja sanaa ni, te tnaꞌa ron tnundoꞌo,

chi ni ma koyuꞌu ron tnundoꞌo ja kii siki ñayiu kueꞌe ndevaꞌa.

26 Chi Jitoꞌo kokuu ia kukanu ini ron,

te koto ya siꞌin ron ja ma junkau ron nuu jakueꞌe.

27 Ma kokuu ndeꞌe ini ron, nuu jikan ñayiu in jandiuxi nuu ron,

nuu ja nevaꞌa ron ja kuñaꞌa ron.

28 Te ma kuñaꞌa ron nuu tnaꞌa ron: “Kuaꞌan ni

te kii ni xtnee, te saa na taa san”

nuu ja nevaꞌa ron vitna nagua kuu ja chituu ron jin.

29 Ni ma nduku ron ja saꞌa ron jakueꞌe siki tnaꞌa ron

chi kukanu ini ñai jin ron ja yatni ka oo ron jin.

30 Ma koskiti ini tnaꞌa ron jin ni in ñayiu,

nuu ja masu na jakueꞌe saꞌa ñai jin ron.

31 Ma kokuu kuasun ini ron jin tee yachi ini,

te ni ma kondikin ron ni in ichi jika de.

32 Chi kukini ini ña Jitoꞌo jin ñayiu kueꞌe ndevaꞌa,

su junkuaan ini ya ja koo in ni ya jin ñayiu ndaa.

33 Te xtau tniaꞌa Jitoꞌo ñayiu veꞌe ñayiu kueꞌe,

su saꞌa vii saꞌa vaꞌa ya ñayiu veꞌe ñayiu ndaa.

34 Te kuaku ndee ña Jitoꞌo jin ñayiu ka jaku ndee inka ñayiu,

su kaꞌan ndaꞌu kaꞌan kee ya ñayiu saꞌa ndaꞌu mai.

35 Te vi niꞌi taꞌu ñayiu ndichi jayiñuꞌu,

su ñayiu vasa, chi maa ni jakanoo vi tnaꞌi.