1 Yun te nuu ni ndiꞌi ni kaꞌan Jesús tnoꞌo yaꞌa, te ni kee ya Galilea kuaꞌan ya ja ni jino ya nuu tnii Judea ja oo jioo yute Jordán. 2 Te kuaꞌa ndevaꞌa ñayiu ka ndikin ña jin ya, te yun ni ndasaꞌa ya ñayiu ka kuꞌu. 3 Yun te ni jinokuei tee ka kuu fariseo ja vi koto tnuni ña de jin ya, te ka jiñaꞌa de:

͏―͏¿A kuu ja xndendoo tnaꞌa in tee jin ñasiꞌi de nani guaa ni kuu?

4 Yun te jiñaꞌa ya:

͏―͏¿A tu ka kaꞌu ni nuu tutu ii naxa ni saꞌa ia Dios ndee jaxtnañuꞌu ja ni saꞌa ya teyii jin ñasiꞌi?

5 Te suni ni kaꞌan ya:

͏―͏Yun kuu ja xndoo teyii tata de vi nana de, te nitnaꞌa de jin ñasiꞌi de, te ndi nduu de vi kokuu invaa ni ka ñayiu. 6 Yun kuu ja masu uu ka kuu, chi invaa ni ka ñayiu. Te tu na tniuu in tee ja saꞌa siin de nagua ni xtnitnaꞌa ia Dios ͏―͏jiñaꞌa ya.

7 Yun te ka jikan tnoꞌo ña tee yun:

͏―͏¿Su nau ja ni tatnuni Moisés ja vi kuñaꞌa teyii in tutu nuu ñasiꞌi de ja vi xndendoo tnaꞌa de, te ndoo ña?

8 Yun te jiñaꞌa Jesús:

͏―͏Vi ja inu ndee ini anu ni, guaa ni jandetu Moisés ja vi xndendoo tnaꞌa ni jin ñasiꞌi ni. Su ndee jaxtnañuꞌu, chi masu saa ni kuu. 9 Su sein, chi kaꞌan san ja nani kuu teyii ja xndendoo tnaꞌa de jin ñasiꞌi de ja masu jini neꞌe ña ña jin de, te ndakuaka tnaꞌa de jin inka ñaꞌa, te skindee de ña. Te na in ndakuaka tnaꞌa jin ñaꞌa ni ndoo yun, te suni skindee ña yii xtnañuꞌu ña.

10 Yun te ka jiñaꞌa tee ka skuaꞌa jin ya:

͏―͏Nuu ja siun kaa ja ma kuu xndendoo tnaꞌa teyii jin ñasiꞌi de, vi guaꞌa ka kuu ja ma kuaka tnaꞌa ñayiu.

11 Su yun te jiñaꞌa Jesús:

͏―͏Masu ndiꞌi ni vi jinkuiꞌnu ini tnoꞌo yaꞌa, chi nani ñayiu ka niꞌi nuu Dios ja vi jinkuiꞌnu ini. 12 Su sava tee, chi saa ni kaku maa de ja ma kuu tnandaꞌa de. Te sava de, chi maa ñayiu ni ka saꞌa ja ma kuu vi tnandaꞌa de. Te sava de, chi tu ka kuini maa de ja vi tnandaꞌa de, nagua ja kuu vi kunukuechi guaꞌa de nuu tatnuni ia Dios. Na in kuini ja kuantaꞌu tnoꞌo yaꞌa, te na kuantaꞌui ͏―͏jiñaꞌa ya.

13 Yun te ni ka junsiaꞌa ñayiu suchi kueli nuu Jesús, nagua ja sonee ya ndaꞌa ya siki, te na ndakuatu ya ja jaꞌi. Su ni ka kuxeen tee ka skuaꞌa jin ya nuu ñayiu ka junsiaꞌa suchi kueli yun.

14 Su jiñaꞌa Jesús:

͏―͏Vi kuandetu ni na kikuei maa suchi kueli jian nuu san, te ma vi kasi niꞌnu ni ja kikuei, chi nuu tatnuni ia Dios ndee andivi kuu nuu vi koo ñayiu ka kuu na kuinio suchi kueli yaꞌa ͏―͏jiñaꞌa ya.

15 Te ni sonee ya ndaꞌa ya siki suchi kueli yun ja ni jikantaꞌu ya ja jaꞌi, te ni kee ya kuaꞌan ya.

16 Yun te ni jino in tee kuechi nuu oo ya, te jiñaꞌa de:

͏―͏Tee guaꞌa kuu ni, Mastru. ¿Nagua kuu jaguaꞌa saꞌa san ja koteku san nikuii nikani?

17 Te jiñaꞌa Jesús:

͏―͏¿Nau ja xnani ña ni tee guaꞌa? Te tu na tee guaꞌa oo, chi maintnoꞌo Dios kuu ia guaꞌa. Su nuu ja kuini ni ja koteku ni nikuii nikani, te kuantnoꞌo ni tnoꞌo tatnuni ia Dios ͏―͏jiñaꞌa ya.

18 Te jiñaꞌa de:

͏―͏¿Ndeja kuu?

Yun te jiñaꞌa Jesús:

͏―͏Ma kaꞌni ni ndiyi. Ma koskindee tnaꞌa ni. Ma suꞌu ni. Ma kaꞌan tnoꞌo ni siki ñayiu. 19 Te kuanyuꞌu kuandetu ni nuu tata ni vi nuu nana ni, te kaꞌan too ni in ñani in tnaꞌa ni nagua kutoo ni maa ni.

20 Yun te jiñaꞌa tee kuechi yun:

͏―͏Ndiꞌi yaꞌa skunkuu san ndee lule san. ¿Nagua kuu ka ja jaꞌni ña jin san?

21 Yun te jiñaꞌa Jesús:

͏―͏Nuu ja kuini ni ja kokuu ni tee ndaa, kuaꞌan ni te xiko ni ndiꞌi ja nevaꞌa ni, te kuñaꞌa ni nuu ñayiu ka kundaꞌu, chi saa te konevaꞌa kuaꞌa ni ndee andivi. Yun te saa kii ni, te kondikin ña ni ͏―͏jiñaꞌa ya.

22 Te nuu ni jini soꞌo tee kuechi yun ja siun ni kaꞌan Jesús, te ni kusuchi ndevaꞌa ini de kuaꞌan de, chi tee kuika ndevaꞌa kuu de.

23 Yun te jiñaꞌa Jesús nuu tee ka skuaꞌa jin ya:

͏―͏Kaꞌan ndaa ndija san ja vijin ndevaꞌa kuu ja kiuu in tee kuika nuu tatnuni ia Dios ndee andivi. 24 Te kaꞌan tuku san inka jichi ja ñama ka kiuu in cameyu yau in yiki tiku, saa ja kiuu in ñayiu kuika nuu tatnuni ia Dios.

25 Te nuu ni ka onini tee ka skuaꞌa jin ya, te ni ka saꞌu kuii kuiti ini de, te ka kachi de:

͏―͏¿Na in kuu ja kaku niꞌnu nuu saa?

26 Te ni ndiaꞌa ña Jesús, te jiñaꞌa ya:

͏―͏Ja nuu ñayiu ñuyiu yaꞌa, chi vijin kuu, su ja nuu ia Dios, chi ndiꞌi ni ja kuu saꞌa ya.

27 Yun te jiñaꞌa Pedro:

͏―͏Su sein, chi vi ni ka xndoo san ndiꞌi ja ka nevaꞌa san, te ka ndikin ña san, te ¿nagua kuu ja vi niꞌi san?

28 Te jiñaꞌa Jesús:

͏―͏Kaꞌan ndaa san ja nuu kenta kiuu ja nduu jaa ñuyiu yaꞌa, te nukoo maa san ja kuu san Seꞌe Teyii nuu yeꞌe tajan nuu mesa ja tatnuni san, te suni vi jinkoo maa ni ja ka ndikin ña ni jin san nuu ndi uxi uu mesa, te vi kaꞌnde ni kuechi ndi uxi uu tatatnoꞌo Israel. 29 Te ndiꞌi ñayiu ja ka xndendoi veꞌi a ñani a kuaꞌi a tatai a nanai a ñasiꞌi a seꞌi axi ñuꞌi ja jaꞌa sein, te vi ndaniꞌi in ciento jichi kuaꞌa ka, te suni vi niꞌi ja vi kotekui nikuii nikani. 30 Su kuaꞌa ñayiu ka kuu naꞌnu vitna vi nduu lulei, te kuaꞌa ñayiu ka kuu lule vitna vi nduu naꞌnui ͏―͏jiñaꞌa ya.