1 Kundaꞌu ini ña ni jin san, vi Dios, chi ka oo ñayiu ka sondikin ña jin san,

te ndiꞌi ni ore ka ndakoi siki san, te ndevaꞌa ndetnuni ka saꞌa ñai.

2 Ndiꞌi ni kiuu ka sondikin ña tee ka kaꞌan uꞌu ña jin san,

chi kuaꞌa ñayiu inu teyii ndevaꞌa ka ndakoo siki san.

3 Su kiuu ja yuꞌu san,

te kukanu ini ña san jin ni, vi Dios.

4 Te kukanu ini san ia Dios, te saꞌa kaꞌnu san tnoꞌo ya.

Kukanu ini san ia Dios, te tu yuꞌu san,

chi tu nagua kuu saꞌa ña in ñayiu jin san.

5 Te siun ni ka kagua de tnoꞌo kaꞌan san,

te ka ndakani ini de ja vi saꞌa ña de ndiꞌi jakueꞌe jin san.

6 Te ka ndututu de, te ka neni yuꞌu ña de,

te ka jito guaguaꞌa ña de na ndenu jika san,

te ka ndetu de naxa kuu ja vi kaꞌni ña de jin san.

7 Ma skaku ni jin de nuu jakueꞌe ka saꞌa de yun, vi Dios.

Xnaa ni ñayiu sava ka ñuu yun jin ja kiti ini ndevaꞌa ni.

8 Chi ja ni kaꞌu maa ni na kusaa jichi jino yuꞌu san,

te ni tnaa vaꞌa ni tenuu san nuu in tindoꞌo ni,

te yun kuu ja yoso nuu liuru ni.

9 Te vi kunu ñayiu ka kaꞌan uꞌu ña jin san kiuu ja kana san nuu ia Dios ja chituu ña ya,

chi jini san ja oo ya yituu ña ya jin san.

10 Te kukanu ini san ia Dios, te saꞌa kaꞌnu san tnoꞌo ya.

Kukanu ini san Jitoꞌo, te saꞌa kaꞌnu san tnoꞌo ya.

11 Te kukanu ini san ia Dios, te tu yuꞌu san,

chi tu nagua kuu saꞌa ña in ñayiu jin san.

12 Skunkuu san tnoꞌo ni kee yuꞌu san nuu ni, vi Dios,

te soko san in yaa ja ndakuantaꞌu san nuu ni.

13 Chi ni skaku niꞌnu ña ni jin san ja tu ni jiꞌi san,

te ni skaku ña ni ja tu ni kanakau san nuu ndaꞌa ñayiu yun,

nagua ja kaka san nuu ichi ni, vi Dios, nuu yeꞌe niꞌnu ja ka jika ñayiu ka teku.