1 Yun te ni ndakani Jesús in kuentu, te ni kaꞌan jioniꞌni ya ja jaꞌa ja nini kuu ja siun ni vi kondakuatuo, te ma vi kuitao. 2 Te jiñaꞌa ya:

―Ni oo in tee jaꞌnde kuechi in ñuu ja vini tu yuꞌu de Dios, te ni tu ndiꞌni de nagua ka kuu ñayiu. 3 Te suni ñuu yun ni oo in ñaꞌa ni ndondaꞌu, te ni ojaꞌan ña ni okaꞌan kuechi ña nuu de ja na saꞌa ndaa de siki in ñayiu kaꞌan uꞌu jin ña. 4 Te kuaꞌa jichi tu ni kuini de ja saꞌa ndaa de kuechi yun. Su ni oo in kiuu, te ni ndakani ini de: “Visi tu yuꞌo Dios, te ni tu ndiꞌnio nagua ka kuu ñayiu, 5 su ja siaꞌa ndi nuu ndi kuee kii ñaꞌa yaꞌa xnaꞌa ña ña jion, te na saꞌa ndao kuechi yun, chi nuu tuu, te ma kundee ka inio ja susuu kii ña”, ni kachi de ―jiñaꞌa Jesús.

6 Te jiñaꞌa tuku ya ja kuu ya Jitoꞌo:

―Vi konini ni tnoꞌo ni kaꞌan tee kueꞌe ja jaꞌnde kuechi yun. 7 Te ndee ka kuu ia Dios ja ma chituu ya ñayiu ni kaji ya ja vi nduu vi ñuu ka jikantaꞌui nuu ya. Te ma kokukuee ya ja kuñaꞌa ya nagua ka jikain. 8 Te kaꞌan san ja ñama chituu ña ya jin. Su kiuu na ndajiokuiin sein, ja kuu san Seꞌe Teyii, te ¿a nukuꞌun san ñayiu ka kandija ñuyiu yaꞌa? ―jiñaꞌa ya.

9 Yun te ni ndakani ya in kuentu ja ni kaꞌan jioniꞌni ya ja jaꞌa in ñayiu ndakuantnoꞌo mai ja kui ñayiu ndaa, te skexikoi sava ka ñayiu, te jiñaꞌa ya:

10 ―Ni ka oo uu tee ni jaꞌankuei veñuꞌu ja ni ka ndakuatu de. In de kuu fariseo, te inka de kuu tee xtutu xuꞌun impuestu. 11 Ni jino tee kuu fariseo ni jinkuiin de, te ni jinkondee de ndakuatu de nuu ia Dios, te jiñaꞌa de suaꞌa: “Tata Dios, ndakuantaꞌu san nuu ni, chi masu nagua ka oo sava ka de oo san ja ka suꞌu de, vi ka saꞌa de janeꞌe jayichi, vi ka skindee de ñasiꞌi de, ni tu kaa san na kaa tee xtutu xuꞌun impuestu yaꞌa. 12 Sein, chi uu jichi ondite san nuu ni ja in in semana, vi soko san nuu ni uxi ja in ciento taka ja niꞌi san”, jiñaꞌa de. 13 Su tee xtutu xuꞌun impuestu, chi ndee jika ni jinkuiin de, te ni chindei de nuu de, te ni tu ni ndanenuu de ichi andivi, te ni jinkondee de katu de pechu de ja tnaꞌu ini de, te jiñaꞌa de: “Tata Dios, kundaꞌu ini ña ni, te konekaꞌnu ini ni ja jaꞌa san, chi tee saꞌa yika kuechi kuu san”, jiñaꞌa de. 14 Te kaꞌan san ja saa suaꞌa nuu tee xtutu xuꞌun impuestu yun ni onekaꞌnu ini ia Dios. Su nuu tee kuu fariseo yun, chi tu ni onekaꞌnu ini ya. Chi ñayiu saꞌa kaꞌnu mai, te saꞌa ndaꞌu ña ya. Te ñayiu saꞌa ndaꞌu mai, te saꞌa kaꞌnu ña ya ―jiñaꞌa Jesús.

15 Yun te ni ka junsiaꞌa ñayiu suchi kueli nuu Jesús, nagua ja na sonee ya ndaꞌa ya siki, te na kakantaꞌu ya jaꞌi. Su nuu ka jini tee ka skuaꞌa jin ya, te ni ka kuxeen de nuu ñayiu ka junsiaꞌa suchi kueli yun. 16 Yun te ni kana ya suchi kueli yun, te jiñaꞌa ya:

―Vi kuandetu ni na kikuei maa suchi kueli jian nuu san, te ma vi kasi niꞌnu ni ja kikuei, chi nuu tatnuni ia Dios kuu nuu vi koo ñayiu ka kuu na kuinio suchi kueli yaꞌa. 17 Chi kaꞌan ndaa san ja na in ñayiu tu jantaꞌu ja tatnuni ia Dios nui nagua jantaꞌu in suchi luluu, te ma kiuu saꞌuin nuu tatnuni ya ―jiñaꞌa ya.

18 Yun te ni jikan tnoꞌo in tee kuu nijaꞌnu jin Jesús, te jiñaꞌa de:

―Tee guaꞌa kuu ni, Mastru. ¿Nagua kuu ja saꞌa san ja niꞌi taꞌu san ja koteku san nikuii nikani? ―jiñaꞌa de.

19 Te jiñaꞌa Jesús:

―¿Nau ja xnani ña ni tee guaꞌa? Te tu na tee guaꞌa oo, chi maintnoꞌo Dios kuu ia guaꞌa. 20 Ja jini maa ni tnoꞌo tatnuni ia Dios nuu kaꞌan suaꞌa: Ma koskindee tnaꞌa ron, ma kaꞌni ron ndiyi, ma suꞌu ron, ma kaꞌan tnoꞌo ron siki ñayiu, te kuanyuꞌu kuandetu nuu yua nuu siꞌi ron, kachi tutu ii ―jiñaꞌa ya.

21 Te jiñaꞌa de:

―Ndiꞌi yaꞌa tavaꞌa san ndee lule san ―jiñaꞌa de.

22 Te nuu ni onini Jesús tnoꞌo ni kaꞌan de, te jiñaꞌa ya:

―Invaa ka ja jaꞌni ña jin ni nuu saa: Xiko ni ndiꞌi ja nevaꞌa ni, te kuñaꞌa ni nuu ñayiu ka kundaꞌu, te konevaꞌa kuaꞌa ni ndee andivi. Yun te saa kii ni, te kondikin ña ni ―jiñaꞌa ya.

23 Su nuu ni kaꞌan ya siun, te ni kusuchi ndevaꞌa ini de, chi tee kuika ndevaꞌa kuu de. 24 Te nuu ni jini Jesús ja ni kusuchi ndevaꞌa ini de, te jiñaꞌa ya:

―Nase ndeꞌe vijin kuu ja kiukuei ñayiu kuika nuu tatnuni ia Dios. 25 Chi ñama ka kiuu in kameyu yau in yiki tiku saa ja kiuu in ñayiu kuika nuu tatnuni ia Dios ―jiñaꞌa ya.

26 Yun te ni ka jikan tnoꞌo ña ñayiu ka nini yun:

―¿Na in kuu ja kaku niꞌnu nuu saa? ―ka jiñaꞌa de.

27 Te jiñaꞌa Jesús:

―Ñayiu ñuyiu, chi ma kuu vi saꞌi. Su ia Dios, chi kuu saꞌa ya ―jiñaꞌa ya.

28 Yun te jiñaꞌa Pedro:

―Su sein, chi vi ni ka xndoo san ndiꞌi ja ka nevaꞌa san, te ka ndikin ña san ―jiñaꞌa de.

29 Te jiñaꞌa ya:

―Kaꞌan ndaa san ja nani kuu ñayiu ja ka xndoi veꞌi, a tatai vi nanai, a ñani, a ñasiꞌi, a seꞌi ja jaꞌa ja koi nuu tatnuni ia Dios, 30 ñayiu yun chi vi ndaniꞌi kuaꞌa kai nuu ñuyiu yaꞌa, te nuu inka ñuyiu ja vaji, vi niꞌi ja vi kotekui nikuii nikani ―jiñaꞌa ya.

31 Yun te ni keneꞌe siin Jesús ndi uxi uu tee ka skuaꞌa jin ya, te jiñaꞌa ya:

―Vitna te ndakueio Jerusalén, chi yun kuu nuu skunkuu ndiꞌi tnoꞌo ni ka tee taka tee ni ka ndakani tnoꞌo ia Dios ndee janaꞌa, ja kaꞌan siki san ja kuu san Seꞌe Teyii. 32 Chi yun kuu nuu vi xtuu ña ñayiu nuu ndaꞌa ñayiu inka ñuu, te vi saꞌa neꞌe vi saꞌa yichi ñai, vi nani ñai, vi vi tiusii ñai. 33 Te vi kani ndevaꞌa ñai, yun te saa vi kaꞌni ñai. Su nuu uni kiuu, te ndateku san ―jiñaꞌa ya.

34 Su tu ni ka jinkuiꞌnu saꞌun ini de tnoꞌo yaꞌa, te ni tu ni ka jini de na tnoꞌo kuu ja kaꞌan ya, chi in tnoꞌo ja tu ka jinkuiꞌnu ini de kuu.

35 Te nuu ni jinokuei Jesús ñuu Jericó, yun nukoo in tee kuꞌu nuu yatni yuꞌu ichi yun jikan de xuꞌun. 36 Te nuu ni onini de ja ka yaꞌa kuaꞌa ndevaꞌa ñayiu, te ni jikan tnoꞌo de nagua kuu. 37 Te ka jiñaꞌa ñayiu ja Jesús, tee ñuu Nazaret, kuaꞌan yun. 38 Yun te ni kana jaa de, te jiñaꞌa de:

―Jesús, ndikin tata ndee rey David, kundaꞌu ini ña ni jin san ―jiñaꞌa de.

39 Te ni ka kuxeen ñayiu ka yoxnoꞌo yun nuu de ja na kasi yuꞌu de. Su vi saa viꞌi ka kana jaa de:

―Ndikin tata ndee rey David, kundaꞌu ini ña ni jin san ―jiñaꞌa de.

40 Yun te ni jinkuiin Jesús, te ni tetniuu ya ja na vi jinkuaka ña jin de. Te nuu ni jino de, te ni jikan tnoꞌo ña ya:

41 ―¿Nagua kuini ni ja saꞌa san jin ni? ―jiñaꞌa ya.

Te jiñaꞌa de:

―Jitoꞌo san, kuini san ja ndanune nduchi nuu san ―jiñaꞌa de.

42 Te jiñaꞌa Jesús:

―Ndanune nuu ni, chi ja kandija ni, ndasaꞌa nduchi nuu ni ―jiñaꞌa ya.

43 Te vi ore saa ni ndanune nduchi nuu de, te ni jata ndikin de Jesús, ndakuantaꞌu de nuu ia Dios ja ni nduvaꞌa de. Te nuu ni ka jini ndiꞌi ñayiu yun, te ni ka ndakuantaꞌui nuu ia Dios.