1 Ni oo in tee ni okuꞌu ja ni onani Lázaro. Te maa de jin kuaꞌa de María vi Marta ka kuu de ñayiu ñuu Betania. 2 Te María yaꞌa kuu kuaꞌa Lázaro tee ni okuꞌu, te suu ñaꞌa yaꞌa ni chiꞌi tatna xiko siꞌin Jitoꞌo Jesús nuu kuee ka, te ni ndasichi ña jin ixi xini ña. 3 Te nduu kuaꞌa de yun ni ka tetniuu tnoꞌo kuaꞌan nuu Jesús nuu ka jiñaꞌa ña:

―Jitoꞌo, kuꞌu tee kaꞌan too maa ni.

4 Te nuu ni jini Jesús tnoꞌo yun, te jiñaꞌa ya:

―Kueꞌe yaꞌa, chi masu kueꞌe ja kuu de kuu, chi saa nagua ja vi kuni ñayiu ja kaꞌnu ndevaꞌa kuu ia Dios, nagua ja jin kueꞌe yaꞌa, te suni xneꞌe Seꞌe Dios ja kuu kaꞌnu ya ―jiñaꞌa ya.

5 Te ni okaꞌan too ndevaꞌa ña Jesús jin Lázaro vi Marta vi jin kuꞌu ña. 6 Te nuu ni niꞌi tnoꞌo ya ja kuꞌu Lázaro, te ni kendoo ka ya uu ka kiuu nuu ni oo ya yun. 7 Yun te saa jiñaꞌa ya nuu tee ka skuaꞌa jin ya:

―Na noꞌokuei tukuo Judea inka jichi.

8 Te ka jiñaꞌa tee ka skuaꞌa jin ya:

―Mastru, oo yatni ni kiuu ja ka nduku tee ka kuu nijaꞌnu nuu tnaꞌo judio ja vi kuun ña de yuu, ¿te a vi kuini tuku ni kiꞌin ni yun? ―ka jiñaꞌa de.

9 Te jiñaꞌa Jesús:

―¿A masu uxi uu ore nevaꞌa in kiuu ja satniuo? Te nuu ja in ñayiu jika tnoꞌo nduu, te ma kachi jaꞌi, chi ndijin ndiaꞌi jin nikandii oo ñuyiu yaꞌa. 10 Su na in jika tnoꞌo jakuaa, te kachi jaꞌi, chi tu ndijin nui.

11 Yun te jiñaꞌa ka ya:

―Lázaro, tee ka ndeka tnaꞌa guaꞌa jion, chi ni kixin de, yun guaa kiꞌin san xtoto san de ―jiñaꞌa ya.

12 Yun te ka jiñaꞌa tee ka skuaꞌa jin ya:

―Jitoꞌo san, nuu ja kixin vaꞌa maa de, te nduvaꞌa de.

13 Su Jesús, chi tnoꞌo yun ni kaꞌan ya ja ni jiꞌi Lázaro. Te ni ka ndakani ini tee ka skuaꞌa jin ya ja kaꞌan ya siki ja kixin vaꞌa maa de. 14 Yun te ni kaꞌan kaji Jesús:

―Ja ni jiꞌi Lázaro. 15 Te kusii ini san ja jaꞌa in in maa ni ja tu ni ka oo yun, chi saa nagua ja vi kandija guaꞌa ka ni, su na kiꞌon nuu oo ndiyi yun ―jiñaꞌa ya.

16 Yun te jiñaꞌa Tomás, tee ka xnani Kuati, nuu sava ka tee ka skuaꞌa jin ya:

―¿A suni kiꞌinkuei yoon, nagua ja suni vi kuo jin ya? ―jiñaꞌa de.

17 Te nuu ni kenta Jesús ñuu Betania, te ni jini ya ja ni kuu kuun kiuu ni jinkoyuꞌu Lázaro in kava veꞌe. 18 Te yatni oo ñuu Betania jin ñuu Jerusalén, vaa ndee yatni uni kilómetro. 19 Te kuaꞌa ñayiu judio ni ka junkoto ña jin Marta vi María, ja ni ka ndakuñaꞌi tnoꞌo ndee ini nuu ña, ja ni jiꞌi kuaꞌa ña. 20 Yun te nuu ni niꞌi tnoꞌo Marta ja kuaꞌan Jesús, te ni kee ña ja ni nutnaꞌa ña jin ya, su María chi ni ndoo ña veꞌe ña. 21 Te jiñaꞌa Marta nuu Jesús:

―Jitoꞌo san, nuu suaꞌa te ni oo ni yaꞌa, chi ma kuu kuaꞌa san nuu siun. 22 Su visi ni saa, te jini san ja ndiꞌi ni ja jikan ni nuu ia Dios, te taa ya ―jiñaꞌa ña.

23 Te jiñaꞌa Jesús:

―Ndateku kuaꞌa ni ―jiñaꞌa ya.

24 Te jiñaꞌa Marta:

―Jini san ja ndateku de nuu vi ndateku ndiyi kiuu sandiꞌi ―jiñaꞌa ña.

25 Te jiñaꞌa Jesús:

―Maa san kuu ia ndaxteku ñayiu, te kuñaꞌa san ja vi kotekui nikuii nikani. Te na in kandija ña jin san, visi na kui, su kotekui. 26 Te ndiꞌi ñayiu ja ka teku, te ka kandija ña jin san, ma vi kui in jichi ni. ¿A kandija ni tnoꞌo yaꞌa? ―jiñaꞌa ya.

27 Te jiñaꞌa ña:

―Saa, vi Jitoꞌo san, kandija san ja maa ni kuu ia ni tetniuu Dios vi Seꞌe maa ia Dios, ja vaji ni nuu ñuyiu yaꞌa ―jiñaꞌa ña.

28 Te nuu ni ndiꞌi ni kaꞌan ya tnoꞌo yun, te ni jaꞌan Marta ni nukana ña kuꞌu ña María, ni kaxtnoꞌo yuꞌu ña, te jiñaꞌa ña:

―Ni kee Mastru yaꞌa, te kana ña ya jin lo ―jiñaꞌa ña.

29 Te nuu ni jini María tnoꞌo yun, te vi ñama kuiti ni ndakoo ña, te kuaꞌan ña nuu oo Jesús. 30 Te chiaꞌan ka ja kiuu Jesús maa ñuu, chi oo ii ni ya nuu ni nutnaꞌa ña Marta jin ya. 31 Yun te nuu ni ka jini ñayiu judio ja ka oo veꞌe María ja ka ndakuñaꞌa tnoꞌo ndee ini nuu ña, ja ñama kuiti ni ndakoo ña, te ni kee ña kuaꞌan ña, te ni ka jata ndikin ña de jin ña, chi ni ka ndakani ini de ja kuaꞌan ña ja ndaꞌi ña yuꞌu ñaña ndi kuaꞌa ña. 32 Te nuu ni kenta María nuu oo Jesús, te ni junkuiin jiti ña nuu jaꞌa ya, te jiñaꞌa ña:

―Jitoꞌo san, nuu suaꞌa te ni oo ni yaꞌa, chi ma kuu kuaꞌa san nuu siun ―jiñaꞌa ña.

33 Yun te nuu ni jini Jesús ja ndaꞌi María vi suni ka ndaꞌi ñayiu judio ja ka ndeka tnaꞌa jin ña, te ni tnaꞌu ini ya, chi ni kundaꞌu ini ña ya. 34 Te ni jikan tnoꞌo ya:

―¿Ndenu mamaa ni ka tayuꞌu ni de?

Te ka jiñaꞌa ña:

―Jitoꞌo san, neꞌe ni kiꞌon, te kuni ni.

35 Te ni ndaꞌi Jesús.

36 Yun te ka ndatnoꞌo ñayiu judio:

―Vi kondiaꞌa ni na kuaꞌa ni okaꞌan too ña de ―ka kachi.

37 Su sava kai, chi ka jiñaꞌi:

―Tee yaꞌa ja ni ndasaꞌa de nduchi nuu tee ni okuꞌu nuu yun, ¿a ma kuu suni saꞌa de ja ma kuu Lázaro nuu siun? ―ka kachi de.

38 Te ni tnaꞌu ndevaꞌa tuku ini Jesús, te ni jino ya yuꞌu ñaña yun. Te yau ñaña yun kuu in kava veꞌe, te yeꞌe kava veꞌe yun ndesi in kava kaꞌnu. 39 Te jiñaꞌa Jesús:

―Vi xtajioo ni kava jian.

Te jiñaꞌa Marta, kuaꞌa ndiyi yun:

―Jitoꞌo san, ja ni jaꞌan kueꞌe, chi ja ni kuu kuun kiuu yiyuꞌu de ―jiñaꞌa ña.

40 Te jiñaꞌa Jesús:

―Ja ni kaꞌan san nuu ni ja nuu ja kandija ni, te kuni ni jakaꞌnu ia Dios ―jiñaꞌa ya.

41 Yun te ni ka xtajioo de kava ja ndesi yuꞌu yau ñaña yun. Te ni ndanenuu Jesús ichi andivi, te jiñaꞌa ya:

―Ndakuantaꞌu san nuu ni, vi Tata Yua san, chi nini ni tnoꞌo kaꞌan san nuu ndakuatu san. 42 Te ja jini san ja siun ni nini ni tnoꞌo kaꞌan san, su ni kaꞌan san tnoꞌo yaꞌa ja kuu javaꞌa maa ñayiu kuaꞌa ka oo yaꞌa, nagua ja na vi kandija ñai ja maa ni ni tetniuu ña jin san ―jiñaꞌa ya.

43 Te nuu ni ndiꞌi ni kaꞌan ya tnoꞌo yun, te ni kana jaa ya:

―Lázaro, ndee ni nuu oo ni jian ―jiñaꞌa ya.

44 Te ni ndee ni tee ni jiꞌi yun, ñutuu ndaꞌa de vi siꞌin de saꞌun nani, te nuu de ñutuu inka saꞌun. Te jiñaꞌa Jesús:

―Vi ndajin ni saꞌun ñutuu de jian, te vi siaa ni de na kiꞌin maa de ―jiñaꞌa ya.

45 Yun te kuaꞌa ñayiu judio ja ka ndeka tnaꞌa jin María ni ka kandija Jesús, nuu ni ka jini tniuu kaꞌnu ni saꞌa ya. 46 Su sava de ni jaꞌankuei nuu tee ka kuu fariseo, te ni ka ndakani de naxa ni saꞌa Jesús. 47 Yun te ni ka ndututu tee ka kuu fariseo jin tee ka kuu nijaꞌnu nuu sutu in nuu junta, te ni ka kachi de:

―¿Naxa vi saꞌo? Te tee yaꞌa, chi saꞌa de kuaꞌa tniuu naꞌnu. 48 Te nuu ja vi kuaꞌo tnoꞌo ja siun ni kosaꞌa de, te ndiꞌi ñayiu vi kandija ña jin de. Te kikuei tee ka netniuu Roma, te vi xnaa de veñuꞌu kaꞌnuo vi ñayiu ñuo ―ka kachi de.

49 Yun te in tnaꞌa de nani Caifás, ja kuu de sutu kuu nijaꞌnu ka kuia yun, jiñaꞌa de:

―Maa ni, chi tu ka jini saꞌun ni. 50 Te ni tu ka ndakani ini ni, ja guaꞌa ka kuu ja na kuu in tee ja jaꞌa ñayiu ñuo, te masu ja vi ndiꞌo vi naa ―jiñaꞌa de.

51 Te tnoꞌo yun ni kaꞌan de, su masu ja ni jani ini maa de kuu, chi chia siun sutu kuu nijaꞌnu ka kuu maa de kuia yun, te yun guaa ni ndakani de tnoꞌo maa ia Dios ja kuu Jesús ja jaꞌa ñayiu ñuu judio. 52 Te masu maintnoꞌo ja jaꞌa ñayiu ñuu judio kuu ya, chi suni ja ndaxtutu ya ndiꞌi ñayiu ja ka kui seꞌe maa ia Dios ja ni ka jitenui taka ñuu.

53 Te vi guaa ndee kiuu saa ni junkau tnaꞌa tnoꞌo ni ka ndatnoꞌo tee ka kuu nijaꞌnu nuu ñayiu judio ja vi kaꞌni de Jesús. 54 Te yun guaa tu ni kuu kaka ndijin ka Jesús neꞌu tee ka kuu nijaꞌnu nuu ñayiu judio. Chi ni kee ya Judea yun, te kuaꞌan ya in ñuu nani Efraín, yatni nuu oo ñuꞌu teꞌa, te ñuu yun ni ka kendoo ya jin tee ka skuaꞌa jin ya.

55 Te ja ni kuyatni ja ñuꞌu viko pascua ja ka saꞌa ñayiu judio, te kuaꞌa ñayiu taka ñuu kuaꞌankuei Jerusalén ja vi skunkui nagua kaꞌan Ley ja vi nduvii nuu ia Dios, ama ka ja kejaꞌa viko pascua yun. 56 Te ka ndanduku de Jesús nuu ka oo de nuu veñuꞌu yun, te ka jikan tnoꞌo tnaꞌa in in de:

―¿Naxa kachi tna ni? ¿A ma kii Jesús viko yaꞌa? ―ka kachi de.

57 Te sutu ka kuu nijaꞌnu vi tee ka kuu fariseo, ni ka xtaku de tniuu ja nuu ja ndee in ñayiu jini ndenu oo ya, te na kaxtnoꞌi nagua ja kuu vi kakuiko ña de jin ya.