1 Su kuaꞌan Jesús yuku nani Olivo. 2 Te nuu ni tuu ndii inka kiuu, te ni ndajino ya veñuꞌu, te ndiꞌi ñayiu ñuu ni jinokuei nuu oo ya. Yun te ni junkoo ya, te ni jinkondee ya kaxtnoꞌo ya. 3 Yun te ni jinokuei tee ka kaxtnoꞌo Ley vi tee ka kuu fariseo jin in ñasiꞌi ni ka nukuꞌun de saꞌa ña kuechi ñuyiu, te ni ka jani ña de maꞌñu sagua. 4 Te ka jiñaꞌa de:

―Mastru, ni ka nukuꞌun san ñaꞌa yaꞌa mamaa nuu saꞌa ña kuechi ñuyiu. 5 Te nuu Ley Moisés tatnuni ja vi kaꞌnio in ñaꞌa saꞌa siun jin yuu. ¿Te maa ni, naxa kaꞌan tna ni? ―ka jiñaꞌa de.

6 Tnoꞌo yaꞌa ka jiñaꞌa de ja ka kiꞌin vijin ña de, nagua ja kuu vi xtavi kuechi ña de. Su Jesús, chi ni chindei ya xini ya ichi nuu ñuꞌu, te tee ya nuu ñuꞌu yun jin xindaꞌa ya. 7 Su ja siun ka xnuu ña de ja ka jikan tnoꞌo ña de, te ni ndanenuu ya, te jiñaꞌa ya:

―Ndee maa ni guaa tu na yika kuechi, te suu ni kokuu jaxtnañuꞌu ja kani yuu ni ña ―jiñaꞌa ya.

8 Te ni chindei tuku ya xini ya ichi nuu ñuꞌu, te ni tee ya inka jichi nuu ñuꞌu yun. 9 Su nuu ni ka onini de tnoꞌo yaꞌa, te ni ka ndakuni de ja suni ka oo yika kuechi de, te ndi in ndi in de ni ka ndandute, ni jinkondee ndee tee nijaꞌnu ka, te vi saa vi saa ni kenta ndee tee kuechi, te ni ndoo maintnoꞌo ni ka Jesús jin ñaꞌa nukuiin sagua yun. 10 Yun te ni ndanenuu Jesús, te ni in ka ñayiu tu na in oo, chi maintnoꞌo ni ka ñasiꞌi yun nukuiin, te jiñaꞌa ya:

―Kuaꞌa, ¿ndenu ka oo tee ka kaꞌan kuechi siki ni? ¿A ni in de tu ni ka kuun ña de yuu ja vi kaꞌni ña de? ―jiñaꞌa ya.

11 Te jiñaꞌa ña:

―Ni in de joo, vi Jitoꞌo san.

Yun te jiñaꞌa ya:

―Ni sein, ma xtavi kuechi ña san. Kuanoꞌo ni veꞌe ni, te ma saꞌa ka ni yika kuechi ―jiñaꞌa ya.] * 8:11 Masu nuu ndiꞌi tutu ii ndee janaꞌa yoso tnoꞌo yaꞌa.

12 Yun te ni kaꞌan tuku Jesús, te jiñaꞌa ya:

―Maa san kuu ñuꞌu ja yeꞌe niꞌnu nuu ñuyiu, te na in ndikin ña jin san, te ma kokakai ñunee, chi koyeꞌe niꞌnu nui, te suu saꞌa ja kotekui nikuii nikani ―jiñaꞌa ya.

13 Yun te ka jiñaꞌa tee ka kuu fariseo:

―Tnoꞌo kaꞌan ni jian, chi ja jaꞌa maa ni ndakani ni, te masu tnoꞌo jiniuꞌu kuu ja ndakani ni ―ka jiñaꞌa de.

14 Yun te jiñaꞌa Jesús:

―Visi tnoꞌo ja jaꞌa maa san kuu ja ndakani san, su tnoꞌo ja ndakani san, chi jiniuꞌu, chi jini san ndenu vaji san vi ndenu kiꞌin san. Su maa ni, chi tu ka jini ni ndenu vaji san vi ndenu kiꞌin san. 15 Maa ni, chi ka jaꞌnde ni yika kuechi ñayiu nagua ndakani ini in ñayiu ñuyiu, su sein, chi tu jaꞌnde san yika kuechi ni in ñayiu. 16 Te nuu ja na ndanduku san kuechi ñayiu, su saꞌa ndaa san, chi masu maintnoꞌo maa san kuu ja jaꞌnde san kuechi, chi maa san vi Tata san, ia ni tetniuu ña jin san. 17 Chi nuu Ley maa ni yoso ja nuu ja inuu ka ndakani uu testiu, te tnoꞌo ndaa kuu. 18 Te nuu ja ka kaꞌan maa ni ja ndakani san tnoꞌo ja jaꞌa maa san, te suni Tata san, ia ni tetniuu ña jin san, kuu inka ia ndakani tnoꞌo ja jaꞌa san ―jiñaꞌa ya.

19 Yun te ka jiñaꞌa de:

―¿Ndenu oo tata ni?

Te jiñaꞌa Jesús:

―Ni maa san, tu ka jini ña ni na in kuu san, te ni Tata san, chi nuu ja na vi kuni ña ni jin san, te suni vi kuni ni Tata san.

20 Te tnoꞌo yaꞌa ni kaꞌan Jesús nuu oo ya nuu veñuꞌu kaꞌnu kaxtnoꞌo ya nuu oo jatnu nuu ka tnaa ñayiu xuꞌun ja ka sokoi nuu ia Dios. Te ni in ñayiu tu ni ka kakuiko ña ja kiꞌin ya vekaa, chi kuini ka ja jino kiuu ja kuu ya.

21 Yun te jiñaꞌa tuku Jesús inka jichi:

―Sein, chi kiꞌin san, te vi ndanduku ña ni, su vi kuu maa ni nuu yika kuechi ni, chi ma kuu kiukuei ni nuu kiꞌin san ―jiñaꞌa ya.

22 Yun te ka jikan tnoꞌo tnaꞌa tee ka kuu nijaꞌnu nuu ñayiu judio:

―¿A ndakaꞌni de maa de axi nau ja kaꞌan de siaꞌa: “Ma kuu kiukuei ni nuu kiꞌin san”? ―ka ndatnoꞌo tnaꞌa de.

23 Te jiñaꞌa ya:

―Maa ni, chi tee ka oo ndee ndiꞌi yaꞌa ka kuu ni, te sein, chi ndee sukun yun oo san. Maa ni, chi ñayiu ñuyiu yaꞌa ka kuu ni, te sein, chi masu ñayiu ñuyiu yaꞌa kuu san. 24 Te yun guaa kachi san ja vi kuu maa ni nuu yika kuechi ni, chi tu ka kandija ña ni ja Maa San Kuu, te yun guaa vi kuu ni nuu yika kuechi ni ―jiñaꞌa ya.

25 Te ka jiñaꞌa de:

―¿Te na in kuu maa ni?

Yun te jiñaꞌa Jesús:

―Ja ni kaꞌan san ndee jaxtnañuꞌu na in kuu san. 26 Te nevaꞌa kuakuaꞌa san tnoꞌo ja kaꞌan san vi ja saꞌa ndaa san kuechi in in ni, su ia ni tetniuu ña jin san, chi ia ndaa kuu ya. Te sein, chi tnoꞌo ja ni onini san nuu ya kuu tnoꞌo ja kaꞌan san nuu ñayiu ñuyiu ―jiñaꞌa ya.

27 Su tu ni ka jinkuiꞌnu ini ñayiu yun ja kaꞌan ya ja jaꞌa Tata Dios. 28 Te jiñaꞌa ka Jesús:

―Nuu na vi ndaneꞌe sukun ni Seꞌe Teyii, yun te saa vi kuni ni ja sein, chi Maa San Kuu, te tu saꞌa san nagua kuini maa san, chi kaꞌan san nagua ni kaxtnoꞌo maa Tata san. 29 Te maa ya ni tetniuu ña jin san, chi oo ya jin san, te tu xndoo maintnoꞌo ña Tata san jin san, chi siun ni saꞌa san nagua junkuaan ini ya ―jiñaꞌa ya.

30 Te nuu ni kaꞌan ya tnoꞌo yaꞌa, te kuaꞌa ñayiu ni ka kandija ña jin ya.

31 Yun te jiñaꞌa Jesús nuu ñayiu judio ja ni ka kandija ña jin ya:

―Nuu ja siun ni vi koo yutnu ni nuu tnoꞌo san, te vi kokuu ndaa kuiti ni tee ka skuaꞌa jin san. 32 Te vi kuni ni tnoꞌo ndaa, te tnoꞌo ndaa yun siaa ña ja ma vi kunukuechi ka ni ―jiñaꞌa ya.

33 Te ka jiñaꞌa de:

―Ndikin tata Abraham ka kuu san, te tu na ama ka tenini ña ja vi kunukuechi san nuu ni in ñayiu. ¿Te nau ja kaꞌan ni ja vi siaa ña, te ma vi kunukuechi ka san? ―ka jiñaꞌa de.

34 Yun te jiñaꞌa Jesús:

―Kaꞌan ndandaa ndija san ja ndiꞌi ñayiu saꞌa yika kuechi, chi jinokuechi nuu yika kuechi yun. 35 Te ñayiu ja jinokuechi, chi masu siun ni kendoi veꞌe jitoꞌi yun, su ndia seꞌe, chi siun ni oi veꞌe tatai. 36 Su nuu ja Seꞌe ia Dios na siaa uun ña, te jandaa kuiti ja vi yaa ni, te ma vi kokunukuechi ka ni nuu yika kuechi. 37 Ja jini san ja ndikin tata Abraham ka kuu ni, su ka nduku ndee ni ja vi kaꞌni ña ni jin san, chi tu ka jantaꞌu ni tnoꞌo kaꞌan san. 38 Sein, chi kaꞌan san tnoꞌo ja jini san nuu Tata san, te maa ni, chi ka saꞌa ni nagua ni ka onini ni nuu tata ni ―jiñaꞌa ya.

39 Yun te ka jiñaꞌa tuku de:

―Tata san kuu ndi Abraham.

Te jiñaꞌa Jesús:

―Nuu ja suaꞌa te seꞌe Abraham ka kuu ni, chi vi saꞌa ni tniuu ni osaꞌa ndi Abraham. 40 Su vitna te ka nduku ndee ni ja vi kaꞌni ña ni jin san, ja kuu san in tee ja kaꞌan san tnoꞌo ndaa, nagua ni onini san nuu ia Dios. Te Abraham, chi tu ni saꞌa de nagua ka saꞌa maa ni. 41 Te maa ni, chi ka saꞌa ni tniuu saꞌa tata ni ―jiñaꞌa ya.

Yun te ka jiñaꞌa de:

―Masu seꞌe ndaꞌu ka kuu san, chi ka nevaꞌa san invaa tata san ja kuu ia Dios ―ka jiñaꞌa de.

42 Yun te jiñaꞌa Jesús:

―Nuu ja suaꞌa te Dios kuu Tata ni, chi vi kokaꞌan too ña ni jin san, chi nuu ia Dios ni kee san vaji san, te masu vaji san ja jaꞌa maa san, chi maa ya ni tetniuu ña jin san. 43 ¿Te nau ja tu ka jinkuiꞌnu ini ni nagua kaꞌan san? Saa, chi tu ka kuini ni vi konini ni tnoꞌo ja kaxtnoꞌo san. 44 Chi tata maa ni kuu Tachi, te ka kuini ni vi saꞌa ni nagua junkuaan ini tata ni, chi in ja jaꞌni ndiyi kuu ndee jaxtnañuꞌu. Te tu oo jin tnoꞌo ndaa, chi tu na tnoꞌo ndaa oo nuu. Te nuu kaꞌan tnoꞌo ja xndaꞌu ña, te ja jaꞌa maa kaꞌan, chi jaxndaꞌu ña kuu, chi maa kuu yua ndiꞌi jaxndaꞌu ña. 45 Te ndia sein, chi chia kaꞌan san tnoꞌo ndaa, te yun tu ka kandija ña ni. 46 ¿Axi ndee maa ni nukuꞌun yika kuechi san? Te nuu ja kaꞌan san tnoꞌo ndaa, ¿te nau ja tu ka kandija ña ni? 47 Chi na in kuu Seꞌe ia Dios, te nini tnoꞌo ya ndee ini ndee anui. Su maa ni, chi masu Seꞌe ia Dios ka kuu ni, yun guaa tu ka nini ni tnoꞌo ya ―jiñaꞌa ya.

48 Yun te ka jiñaꞌa tee ka kuu nijaꞌnu nuu ñayiu judio:

―¿A masu inu ndija san nuu ka kaꞌan san ja in tee tnoꞌo ñuu Samaria kuu ni, te ñuꞌu ña tachi jin ni? ―ka jiñaꞌa de.

49 Te jiñaꞌa Jesús:

―Tu na tachi ñuꞌu ña jin san, chi suaꞌa chiñuꞌu san Tata san, te maa ni, chi saa suaꞌa ka skexiko ña ni jin san. 50 Su sein, chi tu nduku san ja vi kaꞌan yiñuꞌu ñayiu jin san. Su oo inka ia ja ndiꞌni ja vi koo yiñuꞌu ñayiu nuu san, te saꞌa ndaa ya ja jaꞌa san. 51 Su kaꞌan ndandaa ndija san, ja na in tavaꞌa tnoꞌo ja kaxtnoꞌo san, te ma kuu saꞌuin ―jiñaꞌa ya.

52 Yun te ka jiñaꞌa tee ka kuu nijaꞌnu nuu ñayiu judio:

―Vitna ndia te ka jini san ja ñuꞌu ña tachi jin ni, chi Abraham vi tee ni ka ndakani tnoꞌo ia Dios ni ka jiꞌi de, te maa ni, chi kachi ni ja na in tavaꞌa tnoꞌo ja kaxtnoꞌo ni, te ma kuu saꞌuin. 53 ¿Te a kaꞌnu ka ni saa nuu ndi tata velu san Abraham ja suni ni jiꞌi de nagua ni ka jiꞌi tee ni ka ndakani tnoꞌo ia Dios ndee janaꞌa? ¿Te na in kaꞌan maa ni ja kuu ni, nuu saa? ―ka jiñaꞌa de.

54 Te jiñaꞌa Jesús:

―Nuu ja nduku san jayiñuꞌu maa san, te tu nagua jiniuꞌu saꞌun, chi maa Tata san saꞌa ja koo jayiñuꞌu nuu san, ia ka kaꞌan maa ni ja kuu Dios ni. 55 Su maa ni, chi tu ka jini ni ya, su ndia sein, chi jini san ya, te nuu ja na kaꞌan san ja tu jini san ya, te chia tnoꞌo san, na kuinio in in maa ni. Su jini san ya vi skunkuu san tnoꞌo ya. 56 Su ndi tata velu ni Abraham, chi ni kusii ini de ja kuni de kiuu ja kii san. Te nuu ni jini de, te ni kusii ini de ―jiñaꞌa ya.

57 Yun te ka jiñaꞌa tee judio:

―Vaa vini uu xiko uxi kuia chiaꞌan ka ja koo ni, te kachi ni ja ni jini ni Abraham ―ka jiñaꞌa de.

58 Te jiñaꞌa Jesús:

―Kaꞌan ndandaa ndija san ja ama ka ja koo Abraham, te sein, chi ja oo san ―jiñaꞌa ya.

59 Yun te ni ka kundaꞌa de yuu ja vi kuun ña de, su ni tayuꞌu nuu Jesús, te ni kee ya nuu veñuꞌu yun, te vi maꞌñu sagua ñayiu yun ni yaꞌa ya kuaꞌan ya.