3
1 Landun ma rayun sug bintaha' nu ngag Judeo tu se nga gena' Judeo? Awas duun baik paluun suk peksunud sek sirimunyas sek peketinuli'? 2 Duun! Guna, sinalig nud Diwata sung minsahiin tu se ngag Judeo. 3 Ma'ad lama run bu' sud duma ri senilan gena' melituuren? Migulugan ba ini ne sud Diwata gena' rema melituuren? 4 ✡ 3.4: Ngak Salmo 51.4 (LXX). Gena' gaid! Mekpebilin neng melituuren sud Diwata, isan pesi' belusen su dlaun ne getaw. Sumala' ri se kesulatan,
“Su ginasuy mu mpemetuuran neng metuud;
bu' meddaag'a ri se kasu mu, se gukuman'a.”
5 Ma'ad lama run bu' sung mibaal ta nek sayep mikpe'ita' se kelaru gupiya ne sud Diwata migbaal se ginsaktu? Meketalu' ita ba neng misayep sud Diwata sek peksiluten ri senita? (Keni su kanunay nek saaken ne nga getaw.) 6 Ndi' gaid! Ay bu' gena' metareng sud Diwata, pegendunen ma sek pegukum su nga getaw rini seg benwa?
7 Ma'ad bu' suk pegbalus'u mekepesiddengeg tumu' ri sed Diwata pebiyan sek pekpekelaru gupiya se kemetuuraan, tuma ma ukumanu pa gisip mekesesala'? 8 Tuma ma ndi' ita ma mektalu', “Megbaal ita neng melaaten arun mateng su gempiya?” Duma miktampela' ri senaan pebiyan sek pekpengaleg neng miktalu'u runi ngag betang keni! Silutan ilan gaid se gembaya' ri senilan.
Nda'iruni Getaw neng Metareng
9 Na, landun ma rayun? Gita ne ngag Judeo mpiya ita ba kampuun sinangkali' ri se nga gena' Judeo? Gena' gaid! Sumala' sek tinalu'u na su ngag Judeo bu' su nga gena' Judeo meksama neng miriyalem ri se ga'em nek sala'. 10 ✡ 3.10-12: Ngak Salmo 14.1-3 (LXX); Ngak Salmo 53.1-3 (LXX). Sumala' ri se Kesulatan:
“Nda'irun gairi getaw neng metareng,
11 nda'iruning mikesabut,
awas miksimba ri sed Diwata.
12 Su dlaunen tinumeliyud buwat sed Diwata;
bu' mikpekesala' ilan;
nda'irunik sala neng migbaal bu' landuning metareng, nda'irun gaid isan sala.
13 ✡ 3.13: a Ngak Salmo 5.9 (LXX); b Ngak Salmo 140.3. Su ngak pekpenuntul nilan mekepatay;
ginamit nilan sud dila' nilan sek pegbalus,
bu' minggawas ri se ngad demumug nilan su ngang melala nek talu';
14 ✡ 3.14: Ngak Salmo 10.7 (LXX). bu' sug baba' nilan mipenu' seng melebiyan nek pekpenuklad.
15 ✡ 3.15-17: Isaias 59.7-8. Mesayun ri senilan suk pekpegeel bu' pekpatay;
16 pedlaatan bu' pe'entusen nilan su nga getaw isan ta' ilan pagaw.
17 Ndi' ilan metau pegendun run sek pedleketubu' ri se kelinaw,
18 ✡ 3.18: Ngak Salmo 36.1. awas meketu'un sek pektamed ri sed Diwata.”
19 Na, mikesuun ita ne su dlaun nek sinugu' ri se Kesugu'an para ma'aray tu se ngang misakup ri se Kesugu'an, arun mpelali suk pekpemalaw ne getaw; bu' arun, meruma sek pegukum ned Diwata su dlaun ne getaw ri seg benwa. 20 ✡ 3.20: Ngak Salmo 143.2; Galacia 2.16. Ay nda'iruni gempemetareng ri sek pengenleng ned Diwata pebiyan sek pektuman se Kesugu'an; sung mehimu ma'aray se Kesugu'an giin suk pekpe'ilala ne gita mikesala'.
Pegendun run sek Pekpemetareng ned Diwata su nga Getaw
21 Ma'ad nemuun pirayag na ned Diwata suk pebiyanen sek pekpemetareng ri se nga getaw bu' keni gena' pebiyan se kesugu'an isan pimetuuran ini se Kesugu'an ni Moses bu' se ngak propeta. 22 ✡ 3.22: Galacia 2.16. Pimetareng ned Diwata su nga getaw pebiyan sek pektu'u nilan riin ni Jesus Christ. Binaal ini ned Diwata se dlaun neng miktu'u riin ni Christ, ay meksama ma su dlaun ne nga getaw. 23 Ay mikesala' su dlaun ne nga getaw bu' mipelayu' ri sed Diwata ne giin sung mekeluwas ri senilan. 24 Ma'ad pebiyan se genda'ig bayad ne kepiya ned Diwata, dinawaten su dlaun ne nga getaw ri seniin pebiyan riin ni Christ Jesus, neng medluwas ri senilan. 25-26 Binegay giin ned Diwata, arun pebiyan se dugu'en mbaal giin ne getaran ne su ngak sala' ne nga getaw mpasaylu pebiyan ri sek pektu'u nilan ri seniin. Binaal ini ned Diwata arun sek pekpe'ita' ne giin metareng. Nud diin melipebeba'en giin bu' nda'en pengebetay run su ngak sala' ne nga getaw; ma'ad nemuun inebeten na su ngak sala' nilan arun sek pekpe'ita' ne giin metareng, bu' baalenen neng metareng su dlaun neng mektu'u riin ni Jesus.
27 Aas lama run rayuni gempenghambug ta? Nda'irun! Bu' landun mai keterengan para run nini? Tendeng ba ay miktuman ita se Kesugu'an? Gena', ma'ad ay miktu'u ita. 28 Ay miktu'u ita ne su getaw baalen neng metareng ned Diwata pebiyan sek pektu'u, bu' gena' sek pektuman ri se Kesugu'an. 29 Awas sud Diwata, Diwata ba ma'aray giin se ngag Judeo? Gena' ba Diwata ma rema giin se nga gena' Judeo? Metuud, Diwata rema giin nilan. 30 ✡ 3.30: Deuteronomio 6.4; Galacia 3.20. Sud Diwata sala ra, bu' pemetarengen su ngag Judeo nek pisingkal sek pektu'u nilan, bu' pemetarengen su nga gena' Judeo pebiyan ri sek pektu'u nilan. 31 Migulugan ba ini neg binibay ta su Kesugu'an tendeng sek pektu'u? Nda', nda' lai; tumu' linigen ta su Kesugu'an.
✡3:4 3.4: Ngak Salmo 51.4 (LXX).
✡3:10 3.10-12: Ngak Salmo 14.1-3 (LXX); Ngak Salmo 53.1-3 (LXX).
✡3:13 3.13: a Ngak Salmo 5.9 (LXX); b Ngak Salmo 140.3.
✡3:14 3.14: Ngak Salmo 10.7 (LXX).
✡3:15 3.15-17: Isaias 59.7-8.
✡3:18 3.18: Ngak Salmo 36.1.
✡3:20 3.20: Ngak Salmo 143.2; Galacia 2.16.
✡3:22 3.22: Galacia 2.16.
✡3:30 3.30: Deuteronomio 6.4; Galacia 3.20.