Suk Sulat ni San Pablo para se ngak taga
Filipos
Pesi'una
Suk Sulat ni Pablo para se ngak taga Filipos sinulat para se guna nek simbaan neg binakud ni Pablo seg Europe, sek probinsiya neng Macedonia, neng misakup ne nga getaw Roma. Sinulat ini sinegay miperisu si Pablo, bu' sek panahun neng misemukan giin tendeng sed duma ne ngang menteterbahu ne nga Christian nek sinumupak ri seniin bu' migu'ul rema giin tendeng sek sayep nek penendu'an neng mirepet sek simbaan sek Filipos. Ma'ad sulat keni mikpe'ita' se dleliyag bu' peksalig neng metalu' ma'ad se gembagel nek pektu'u ni Pablo riin ni Jesus Christ.
Sung mikegulikseg riin ni Pablo sek peksulat runik sulat keni giin su gembagel nek penugaling sek pekpesalamat se nga Christian ritu sek Filipos tendeng seg begay nek pinawit nilan ritu seniin arun sek pegabang sek pengina'enlanen. Ginamiteni kehigeyunan keni arun sek pedligen ri senilan; bu' pebiyan run nini, mekaangken ilan nek sekeg bu' peksalig isan pa se nga kesamuk neng minateng riin ni Pablo bu' ri senilan rema. Migandyu' si Pablo tu senilan neng me'angken siya nilan sung melipebeba'en ne kina'iya ni Jesus, bu' ndi' ilan siya ge'eman se kinarelaw nek penugaling bu' garbu. Pirelendemaan ilan ne su ketubu' nilan neng misalabuuk riin ni Christ gasa ned Diwata neng mirawat nilan pebiyan sek pektu'u bu' gena' pebiyan sek pektuman se ngang mi'enaran ri se Kesugu'an se ngag Judeo. Miksulat giin metendeng se dleliyag bu' kelinaw neg begay ned Diwata para se ngang misalabuuk riin ni Christ.
Sulat keni mi'ilala pebiyan sek pegbegain se dleliyag, peksalig, peksalabuuk bu' pegantus riin se Christian nek pektu'u bu' ketubu'. Mikperayag rema ini seng meralem nek pegbatik ni Pablo para sek simbaan sek Filipos.
Ngang Misulat ri sek Sulat keni
I. Pesi'una 1.1-11
II. Su Kebetang ni Pablo 1.12-26
III. Su Ketubu' ri ni Christ 1.27—2.18
IV. Su ngak Pelanu ni Pablo para senilan ni Timoteo bu' Epafrodito 2.19-30
V. Su ngak Penegul Kuntra se nga Kuntra bu' Kepiligruwan 3.1—4.9
VI. Si Pablo bu' su ngak Sambaten nek taga Filipos 4.10-20
VII. Su Ketapusan ne ngak Pengumusta 4.21-23
1
1 ✡ 1.1: Su Ngak Pimbaal 16.12. Seniyu ne nga getawan ned Diwata ri sek Filipos, neng misalabuuk riin ni Christ Jesus, duma se nga geseg bu' ngang menggegabang ri sek simbaan,
Sulat keni buwat senami ni Pablo bu' ni Timoteo, su ngang minibeli riin ni Christ Jesus.
2 Sud Diwata ne Gama' ta bu' su Ginu'u ne si Jesus Christ megbegay siya ri seniyu ne kepiya bu' kelinaw.
Suk Pegampu' ni Pablo para se ngang Membebasaan
3 Mikpesalamatu ri sed Diwatau para seniyu se kada nek panahun neng me'ena'ena'u amu, 4 bu' se kada nek panahun neng megampu'u ri se dlaunan niyu, migampu'u duma se dleliyag 5 tendeng ay inebangan niyau sek pekterbahu para sek pedlelaup seng Melengas ne Gesuyen buwat nu guna ne gendaw tampan nemuun. 6 Bu' aas mikesiguruu ne sud Diwata, neng migatad seng melengas nek terbahu keni ri seniyu, mekpeddayun run nini tampan seng metubus ini sek pekpuli' ni Christ Jesus. 7 Mbaya'u gaid ini betiken para seniyu tendeng ay pinetail'u amu ma. Ay dlaunan niyu mikaambit ma se kehigeyunan keni neg binegay ned Diwata para senaan, gena' na run nemuun neng miperisuu, bu' ndi', sinegay duun pai kegewasan'u sek pekpenaliped seng Melengas ne Gesuyen bu' pekpe'uswag run nini. 8 Sud Diwata giining mekepemetuud bu' gendunu kebuga' ri seniyu; ay pinetail'u amu gupiya maa' sek pekpetail ni Christ Jesus.
9 Migampu'u ne suk petail niyu meddugang gaid gupiya, duma seng metuud nek sinuunan bu' ginsaktu nek pegukum, 10 arun mekegbaal amu sek pekpili' landuning melengas. Rayun mekegawas amu buwat se dlaun ne gena' dlimpiyu bu' mpemasul mbuus sek pekpuli' ni Christ. 11 Su nga ketubu' niyu mpenu' siya seng melengas ne ngag betasan ne si Jesus Christ ra sung mekegbegay run, para sek pekpesiddengeg bu' peksaya' ri sed Diwata.
Suk Pedleketubu' giin si Christ
12 Liyagan'u neng mesuunan niyu, ne ngak sambat'u, ne su ngag betang neng mihitabu' ri senaan mikegabang gupiya sek pekpelelaup seng Melengas ne Gesuyen. 13 ✡ 1.13: Su Ngak Pimbaal 28.30. Tendeng run nini, su dlaun ne nga guwardiya sek palasyu bu' su ngad duma rini mikesuun neng miperisuu tendeng ay sesugu'enu ni Christ. 14 Bu' suk pekeperisuu migbegay tu se ngang mektetu'u ned dugang nek peksalig ri se Ginu'u, aas su kebelu' nilan sek pegwali seng minsahi miksamet se genda'ik pegendek.
15 Tumu' sud duma migwali ri ni Christ tendeng ay misinaku bu' mikpelabawlabaw, ma'ad sud duma melengas su nga ketuyu'an nilan. 16 Binaal nilan nini buwat sek petail, tendeng ay misuunan nilan ne sud Diwata migbegay ri senaan nek terbahu sek pekpenaliped seng Melengas ne Gesuyen. 17 Su ngad duma nda' pegwali riin ni Christ neng metinuuren, bu' ndi' buwat se gispiritu se kerelaw ne gangut; migena'ena' ilan neng merugangan nilan suk pegantus'u saanay riniu sek perisuwan.
18 Saddan na ma'ad! Pidleliyagu metendeng run nini arun mewali ma'aray si Christ se dlaun nek pebiyan, buwat ma sek sayep awas se ginsaktu ne ketuyu'an. Bu' mekpeddayunu sek pedleliyag, 19 tendeng ay misuunan'u nek pebiyan ri se ngak pegampu' niyu bu' se gabang neg buwat se Gispiritu ni Jesus Christ, mekegawasu ra. 20 Suk pinugelingan'u gupiya bu' pidderama ne ndi'u mpalunggaw ri sek terbahuu, ma'ad se dlaun nek panahun bu' labi na nemuun, mengme'uliksegenu gupiya, arun suk tibuuk nek pekeetaw'u mekepesiddengeg ri ni Christ, tetubu'u ma awas patay. 21 Para senaan, su ketubu'u para ra gaid ri ni Christ. Bu' matayu ma, meguwit ini neng melengas ne nga kelebu'an. 22 Ma'ad bu' mekpeddayunu nek tetubu' mekegbaalu ne dlabaw pa nek terbahu. Nda'u mesuunay ta' mai gembaya'u pili'en. 23 Midlibegu ri sed duwa' keni bu' landunik pili'en'u. Liyagan'u megawa' ri se ketubu' keni bu' mekeddunut ri ni Christ, tendeng ay giin nini su dlabi neng melengas. 24 Ma'ad para se kelengasan niyu gimpurtanti pa kampuun neng mekpebilinu nek tetubu'. 25 Mikesiguruu run nini, bu' misuunan'u neng mekpebilinu pa. Mekpebilinu duma se dlaunan niyu, arun sek pegabang sek pekpe'uswag sek pektu'u niyu bu' dleliyag, 26 arun seng mekepuli'u ri seniyu, duuni keterengan niyu sek pekpesigarbu ri senaan ri se ketubu' niyu duma ni Christ Jesus.
27 Na, su gimpurtanti neg betang giin suk pedleketubu' niyu neng mi'unut ri seng Melengas ne Gesuyen ni Christ. Mekeriinu ma awas ndi', bu' me'ita'u amu, merengegan'u neng migbareg amu neng meligen duma sek sala ne ketuyu'an bu' sek sala ra ne dliyagan nek pinentuwan niyu para sek pektu'u sumala' seng Melengas ne Gesuyen. 28 Ndi' amu endek ri se nga kuntra niyu; kanunay amu mengmeddasigen, bu' mekpemetuud ini tu senilan ned dinaag ilan bu' middaag amu, tendeng ay sud Diwata sung migbegay ri seniyu ne keddaagan. 29 Ay binegayan amu ne kehigeyunan sek pekpenibeli ri ni Christ, gena' na run pebiyan sek pektu'u ri seniin, ma'ad pebiyan rema sek pegantus para seniin. 30 ✡ 1.30: Su Ngak Pimbaal 16.19-40. Na, mekedduma amu ri senaan ri se gubat. Maa' ne gubat neng mi'ita' niyu ri senaan sek pegbunu' nung minayan, bu' sumala' seng mirengeg niyu, suk sala neng mikepegbunu'u pa run.