2
1 Mãwãnacarea ewari ab̶a Ãcõrẽ nezocarã bajãnebemada wayacusa idji quĩrãpita zesid̶aa. Diauru sid̶a ãdjirã ume zesia. 2 Maʌ̃ne Ãcõrẽba diaurua iwid̶isia:
–¿Bʌra sãmaʌba ze b̶ʌ?–
Diauruba panusia:
–Bʌa od̶a ẽjũãne jũma pʌrrʌa nĩbad̶ada ze b̶ʌa.–
3 Maʌ̃ne Ãcõrẽba diaurua iwid̶isia:
–Bʌa mʌ̃ nezoca Jora ¿sãwã unu b̶ʌ? Mʌ̃a od̶a ẽjũãne dewarada idji quĩrãca neẽ́a. Idjira ne jũmane jipa b̶ʌa idjab̶a biẽ́ jarad̶i neẽ́ b̶ʌa. Mʌ̃ra bio waya b̶ʌa idjab̶a cadjiruara quĩrĩãcaa. Ni cãrẽ cadjiruada oẽ́ b̶ʌmĩna bʌa mʌ̃́a jũma idjia erob̶ad̶ara jãrĩbisia. Mãwãmĩna idjira wad̶ibid̶a jipa b̶abaria.–
4 Maʌ̃ne diauruba jarasia:
–Idjira cacua bia b̶ʌd̶e jipa b̶aya.* Idjira cacua bia b̶ʌd̶e jipa b̶aya. Hebreo bed̶ead̶e b̶ʌ́ b̶ʌa: “Eda ebari.” Ẽberãba beu amaaba idjia erob̶ʌra jũma diaya. 5 Maʌ̃ bẽrã Jora puad̶eba cacua biẽ́ b̶ʌdua. Maʌ̃nebʌrʌ idjia bʌda biẽ́ jaraya ara bʌdji quĩrãpita.–
6 Ãcõrẽba diaurua jarasia:
–Mãẽteara mãwã odua. Idjira bʌ jʌwaed̶a b̶ʌa. Baribʌrʌ idjira beacara b̶ʌa.–
7 Ãcõrẽba mãwã jarad̶acarea diaurura idji quĩrãpitabemada ãyã wãsia. Wãped̶a idjia Jora chãdaba bio pua b̶ʌsia. 8 Maʌ̃ne Jora ne babuebadamaa dji pora ʌ̃rʌ̃ chũmane wãsia. Mama zoco ãrĩnaba idji chãdara cʌrʌbadjia.
9 Mãwã b̶ʌd̶e dji quimaba jarasia:
–¿Bʌra wad̶ibid̶a jipa b̶a quĩrĩã b̶ʌca? ¡Ãcõrẽda biẽ́ jaraped̶a beudua!–
10 Joba panusia:
–Wẽrã crĩcha neẽ́ b̶ʌ quĩrãca bed̶earãdua. Ãcõrẽba ne biada diabʌrʌd̶e dadjia bia edabadaa. Ara maʌ̃ quĩrãca Ãcõrẽba idu bia mĩgabibʌrʌd̶e ¿maʌ̃ sid̶a bia edad̶iẽ́ panʌca?–
Jũma mãwãnamĩna Joba Ãcõrẽra biẽ́ jaraẽ́ basía.
11 Joba idji dji biarãda ũbea erob̶asia: Elipa, Temaʌ̃ druad̶ebemaa; Bildá, Súa druad̶ebemaa; idjab̶a Zopar, Naamat druad̶ebemaa. Ãdjia ũrĩsid̶aa Jora ne jũmane biẽ́ b̶ʌda. Maʌ̃ bẽrã bed̶ea ausid̶aa Jomaa wãnaped̶a sobiabid̶i carea idjab̶a idji ume ãbaa panani carea. 12 Jũẽbʌdad̶e tʌmʌba Jora unusid̶aa. Baribʌrʌ chãdaba idji cacuada jũma bira b̶ʌ bẽrã idjida mãwã b̶ʌda cawad̶aẽ́ basía. Maʌ̃ carea ãdjira jĩgua jĩã panesid̶aa. Maʌ̃ne ãdjia cacuad̶e jʌ̃ panʌra sopuaba cõãtasid̶aa idjab̶a ãdji boro ʌ̃rʌ̃ egoro porada cuasid̶aa. 13 Maʌ̃be Jo caita siete ewari egode chũpanesid̶aa ãsa, diamasi bid̶a. Baribʌrʌ ni ab̶aʌda idji ume bed̶ead̶aẽ́ basía. Unusid̶aa idjira bio pua b̶ʌda.