15
Makunt'ho mfungate yo kukomeleza kulawa kwa mtumigwa ywa kwe mbingu
1 Naho naonaga kilagiso kituhu kikulu kikwehela, kwandaga na watumigwa mfungate wa kwe mbingu watozaga makunt'ho ayo mtandatu ye nk'homelezo naho, kwa ayo maya ya Mnungu nayande yasila.
2 Niyo naona kint'hu enga bahali ye kioo ihangane na moto, wadya wahumi walaile kwe dikala diya ne dihili dyakwe na kwe uwazilo we dizina dyakwe wakimalaga hank'handa ye idya bahali ye kioo watozile masinda mgunda wenk'higwe ni Mnungu, 3 naho nawakakema wila wa Musa mtumwa ywa Mnungu no wila wa Mwanangoto wakagamba,
“Weye Zumbe Mnungu mta udahi,
udamanyi wako ni mkulu na wa kwehela!
Seuta ywa si zose
sila zako ni za kindedi na zikaka enga ivo zikuungwa kunda.
4 Zumbe niani hakukogoha na kuditogola dizina dyako?
Kwaviya weye wimkulu
si zose nezize
na kufunamiza mitwi yawe kubula hasi hameso hako.
Kwaviya udamanyi wako uwagile ukelaviliza kale.”
5 Yeze yajike ayo naonaga Nyumba ya Mnungu, idyo nidyo Dihema dya uwona dikomolwa kwe mbingu. 6 Wadya watumigwa mfungate kwe mbingu wandile na makunt'ho yakutisa mfungate niyo weza kulawa kwe nyumba ya Mnungu wavaligwe suke zing'aile na zisunt'hike na zikumweka mweka, mwe vifuwa vawe nawavaligwa misipi ya zahabu. 7 Niyo yumwenga mwe viumbwa vine wata ugima awenk'ha watumigwa wa kwe mbingu wadya mfungate nyiga ze zahabu, zimemile maya makulu ya Mnungu akwikala ulo na ulo. 8 Nyumba ya Mnungu niyo yamema mosi kulawa ukulu wa Mnungu no ludole lwakwe, naho hakwandile na yeyose adahile kwingila kundani kwe nyumba ya Mnungu kubula aho makunt'ho yakutisa mfungate kulawa kwa wadya watumigwa wa kwe mbingu mfungate yande yasila.