1 Nakkin itye Jesuse an ngruwar kornar, puntin ar, wunyitye loru ngurlangk, wunyitye lewin, puntin ar ngaityar inangk gai nomauwurle luku. 2 Yarnin itye Jesus anangk.

3 Nunkowallin ar nowaiy are plaityingyin, kingdom Godald kanauwurle ellin itye.

4 Nunkowallin ar ungunuk ar parpin, palli ar kuntun.

5 Nunkowallin ar ungunuk ar nowaiy ngrakkuwallin, kanauwurle ellin itye ruwe.

6 Nunkowallin ar ungunuk ar yeyauwe ellin, klallin, ananyiril nunkeri, palli ar yalkani.

7 Nunkowallin ungunuk ar tainpulun wirrangwarrin; Jehovil tainpulani kanauwe wirrangar.

8 Nunkowallin ar yare are balpewallin an kanauwurle ngelar, kar nakkani ityan Jehovah.

9 Nunkowaillin ar ungunuk ar merildin an ngrakkuwallin, kar krunkani el an porlar Jehovald.

10 Nunkowallin ungune ungunuk ar partin onom hilamb uk ungune nunkerarwyirrewarre ellin itye nomauwurle.

11 Nunkowallin ungune, yaral kornar naiyuwun onom, partin onom, yaral ar yelpulun ungune wirrangar, hil ambe ungune anauwe ngaityar. 12 Kuntun ungune, ngruwar wyirreungai nomauwurle. Luk ennin ar partir an prophetar, yare ar lewir ungunai onom.

13 Ngune ellin saltowe ruwald. Ungunuk saltowe nowaiy itye prityin, wirrangi itye. Wirrange saltowe, kornar nemmani ityan, kornar nemmani ityan towani ar ityan.

14 Ngune ellin nunkulowe ruwald. Yarild atyan nampundun taldumandar ngurlangk.

15 Tarno kornar nampundun yan nunkulawe, kar reyin ityan, wunyar ngruwar taldumandungai nakkin ityan. 16 Rey ar yan nomauwe nunkulowe kornungar, wunyar nakkani onom nunkerar; - wunyar kuntun ananyiril ngaiowe, wyirreungai.

17 Nowaiy ungune yarn ap puntir hil amb uk pintamin an lawowe prophetar; nowaiy ap puntir pintamuramb, ngape puntir hil ambe ellin ityan.

18 Katyil ap yarnin onomangk; nginbundani henggengk, wyirrewarre, ruwe, ungunai ar pintarnaniyan yammalaitye pittue lawanmant, kar ngruwar ellani an.

19 Ungunuk korn nowaiy ellani yan muralappe tungari, ungunuk il Jehovah taiyani, wunyitye tingowun kornar luku kar krunkani ityan muralappeol korn wyirreungai. Ungunuk korn ellani muralappe tungare Jehovald wunyitye tingowun kornar luku, kar krunkani ityan grauwe korn wyirreungai.

20 Nowaiy nunkeri ungune ananyiril kar Phariseas, wunyungune nowaiy yappulani wyirrewarre.

21 Ung’ar atye yarnir kaldow, nowaiy inde mempin pornuramb, ungunuk korn luk ennin kar judge em ityan.

22 Hikkai ap yarnin onomangk, ungunuk kornil ngrakkuwallin an amb gelauwalle, kar judge em al ityan; ungunuk korn il yarnin gelauwanangk luku. Plaityingyin inde, wunyitye council punish em ityan, ungunuk itye krunkun korn, wirrangi, bluk el our itye an keneinangk hell ald.

23 Yaral inde pempin ityan giftowe altarangk wunyinde ngullun umauwe gelauwalle nyenunkun umanyeril. 24 Nem ar ityan giftowe altarangk, loru, merild our ngrakkuwallin, nginte pornun ityan gelauwe, wunyinde pempin mai giftowe inangk Jehovah.

25 Erild ar ngrakkuwallin murrunmeel inde pornun ityan mai yenamalde, ungunuk itye luk ennin, wunyil taiyani um inangk judgowe, wunyil um pempani officerangk, wunyill yuppani um gaolungai. 26 Katyil ap tingowun umangk nowaiy inde terpulun gaolanmant ungunai inde pempir ngruwar mai moneyowe.

27 Nginte kungir ar yarnir kaldow, nowaiy inde morokkun yan mimine ungunuk itye nowaiy umauwe nape kowan an naitye lew.

28 Yarnin atte onomangk; ungunuk korn tuyuluwarrin yan mimine wunyitye pornun ityan, Moruldamalde itye kinanyirungai ngelungai.

29 Ungunuk mai nunkeri pele um wirrangwarrin, pintamin ityan, throk our ityan; nginte nemmin mai pele, wunyitye mai ngulde nowaiy moru hell angk. 30 Ungunuk mai nunkeri mare um wirrangwarrin, merip our ityan, throk our ityan, nginte nemmin ityan, wunyar ngruwar mai ngulde nowaiy moru hell angk.

31 Kar yarnir luku, yaral itye korn nowaiy an pornun an naitye nape, pemp elour itye inangk papowe, nemuramb.

32 Ngate tingowun umangk, ungunuk korn nemmin an naitye nape, wunyitye winmin yan wirrangi; yaral kangulun korn ile yan morokkun hikkai mimine, yare itye napalle nemmir, hikkai korn wirrangi, moruld amalde itye. Ungunuk mai nape morokkun yan kangulun korn, nginte nem al oulour yan mai nape.

33 Kungir ungune ar yarnir kaldow yaral inde swearing, wuyinde ellin yar inde been swear.

34 Ngate tingowun onomangk, nowaiy inde swear: nowaiy inde swear inanyiril wyirrewarre, lewurmi itye Jehovald. 35 Nowaiy inde swear inanyiril ruwe, kitye Jehovald footstool: nowaiy inde swear inanyiril Jerusalem, city itye grauwald kingald. 36 Nowaiy inde swear inanyiril mai kurle; yarild atyan winmani ityan balpe, kinemin? 37 Nginte yarnour luku, Katyil, katyil, nowaiy, nowaiy; nowaiy inde swear, luku wirrangwarrin.

38 Ung ar atye yarnir kaldow; Pele in ambe pele, ture in ambe ture.

39 Ngate tingowun onom, nowaiy ungune mendin, ungunuk ar partin onom. Ungunuk korn ngultun yan nunkeri make, lare lare yamminye make, ngulturamb ile um. 40 Ungunuk korn pintamani mai coatowe nginte nem al oulour yan mai cloakowe. 41 Ungunuk korn He um taiyani yammalaitye mileowe ngop our inde in ambe ninggengk milengk. 42 Pemp our yaral ar umangk reytyuwun; lendem our yaral ar umangk reytyuwun, nowaiy inde petin.

43 Ung ar atye yarnir kaldow: nginte an pornun an umauwe ngaitye, tarn inde an pornun an yenamalde.

44 Ngate tingowun um, nginte an pornun an yenamalde. Ungunuk ar um, naiyuwun nginte yarn our nunkowarrin: nginte an nunkowarrin ungunuk kornar nowaiy um pornun um. Reytyuwun inangk Jehovah an ambe ungunuk ar partin um. 45 Wunyinde el ellani porlar ngian wyirreungai. Winmin ile yan nungge, wankin an amb itye wirrangar, nunkerar. Taiyin He an parnar an amb itye wirrangar, nunkerar.

46 Ungunuk ungune pornun an narrinyerar, hil amb uk ar onom pornun, nowaiy ungune nunkowarrin, luk ennin publicanar.

47 Ungunuk ungune menmendin ngaityar, kanai; ngune luk ennin yamminyar kornar, luk ennin publicans.

48 Nginte nunkowarrin, lun ellin ile Jehovah nunkowarrin.