17
थेसलोनिकेय् थ्यंगु
1 अनं इपिं अम्फिपोलिस व अपोल्लोनिया जुयाः थेसलोनिके शहरय् वन। अन धर्मशास्त्र स्यनिगु छेँ छखा दु। 2 पावलं न्हापालिपा थें अन वनाः स्ववाः तक विश्रामबार पतिकं धर्मशास्त्रयागु खँ कयाः इपिं नाप न्ह्यसः लिसः यात। 3 मुक्ति बीम्ह ख्रीष्टं दुःख फये हे माः, सी हे माः, अले हानं म्वाना वये माः धकाः पावलं इमित ध्वाथुइक कनाः धाल -- “जिं धया च्वनाम्ह येशू हे ख्रीष्ट खः।” 4 इपिं मध्ये गुम्हं गुम्हं यहूदीतय्सं पावल व सिलासयागु खँय् विश्वास यानाः इपिं नाप वल। अथे हे परमेश्वरयात मानय् याइपिं ग्रीक तःम्हय्सिनं व नांजाःपिं तःम्ह हे मिसातय्सं नं इमिगु खँय् विश्वास यात।
5 अथे जूगुलिं यहूदीतय् नायःतय्सं नुगः मुइकाः हुल्याःतय्त मुंका हयाः हाःहू याना जुल। इमिसं यासोनयागु छेँय् वनाः पावल व सिलासयात पिने हयाः मनूतय्गु न्ह्यःने हयेत स्वल। 6 इमित लुइके मफुगुलिं यासोन व छुं दाजुकिजापिन्त हे शहरयापिं हाकिमतय्थाय् साला यंकाः थथे धाल -- “संसारयात फाता पुइकेत स्वइपिं मनूत थुखे नं वये धुंकल। 7 यासोनं इमित थःगु छेँय् तयातःगु दु। कैसरं धाःगु खँ मन्यंसे इमिसं येशू धाःम्ह मेम्ह हे जुजु दु धकाः धया जुल।”
8 थ्व खं अन मुंवःपिं मनूतय्त व शहरयापिं हाकिमतय्त आछु आछु कंकल। 9 इमिसं यासोन व मेपिन्त दि तय्काः त्वःता छ्वल।
बेरियाय् बिसिके छ्वःगु
10 अय्जूगुलिं दाजुकिजापिन्सं चान्हय् जुइवं पावल व सिलासयात बेरियाय् छ्वया बिल। बेरियाय् थ्यंकाः इपिं धर्मशास्त्र स्यनिगु छेँय् वन। 11 अन च्वंपिं मनूत थेसलोनिकेय् च्वंपिं मनूत स्वयाः गुलिखय् भिं। इमिसं परमेश्वरयागु वचन यइपुक न्यन। पावलं धाःगु खँ पाय्छि जू ला कि मजू धकाः इमिसं न्हिथं धर्मशास्त्र पुइकाः स्वयेगु यात। 12 अय्जूगुलिं इपिं यक्वसिनं हे विश्वास यात। अथे हे तःधंपिं ग्रीक मिसा व मिजंतय्सं नं विश्वास यात।
13 थेसलोनिकेय् च्वंपिं यहूदीतय् नायःतय्सं पावलं बेरियाय् वनाः परमेश्वरयागु वचन न्यंकाच्वंगु दु धकाः सीकाः अन नं मनूतय्त ग्वाकाः जुल। 14 अय्जूगुलिं विश्वासीतय्सं उघ्रिमय् पावलयात समुद्र सिथय् छ्वया बिल। सिलास व तिमोथी जक अन हे च्वनाच्वन। 15 पावलयात तःवंपिं मनूतय्सं वयात एथेन्स थ्यंक हे तया वल। वं इमित हे सिलास व तिमोथीयात फतिंफतले याकनं छ्वया हजि धकाः धया छ्वल।
पावल एथेन्सय्
16 एथेन्सय् सिलास व तिमोथीयात पिया च्वंबलय् पावलं अन मूर्तिया मूर्ति जक खनाः तसकं नुगः मछिंकल। 17 अय्जूगुलिं धर्मशास्त्र स्यनिगु छेँय् वनाः यहूदीत नाप व परमेश्वरयात मानय् याइपिं मनूत नाप खँ ल्हाः जुल। अले बजारय् नाप लाक्व मनूत नाप नं न्हिं न्हिं खँल्हाबल्हा याना जुल।
18 छन्हु पावलं इपिक्युरी व स्तोइकी दार्शनिकतय्त नाप लात। पावलं इमित येशूयागु खँ व येशू सिनाः म्वाना वःगु खँ न्यंकल। गुलिं गुलिंसिनं वयात थथे नं धाल -- “थ्व मनू छु धकाः हालाच्वंगु?” गुलिसिनं धाल -- “थ्वं ला अजूचायापुपिं द्यःतय्गु खँ न्यंका जूगु थें च्वं।”
19 अले इमिसं वयात अरियोपागसय् ब्वना यंकाः -- “छिं थ्व न्हूगु छु खँ धया च्वनादियागु? जिमिसं नं सीके फइ ला?” धकाः न्यन। 20 “छिं धयादीगु खँ ला जिमिसं गुबलें हे न्यने मनंनि। अय्जूगुलिं छिं धयादीगु खँ छु खः धकाः जिमि नं सीके मास्ति वल।” 21 एथेनीत जूसां, अले पिनें वयाच्वंपिं जूसां अन च्वंपिनि न्हू न्हूगु खँ न्यनेकने यायेगु सिबय् मेगु छुं ज्या मदु।
22 अरियोपागसया दथुइ दनाः पावलं धाल -- “एथेनी दाजुकिजापिं, छिकपिं तसकं हे धर्मीपिं खः धकाः जिं सीके धुन। 23 छाय्धाःसा जिं चाःहुलाः छिकपिनि पुजा याइथाय् स्वः वनाबलय् अन छथाय् थथे धकाः आखः किया तःगु खना -- ‘म्हमस्यूम्ह द्यःयात।’ छिकपिन्सं म्हमसीकं पुजा याना च्वंम्हय्सिगु हे खँ जिं न्यंकाच्वनागु खः।
24 “थ्व हे परमेश्वरं थ्व संसार, अले थ्व संसारय् दुगु दक्वं दय्कादीगु खः। थथे स्वर्ग व पृथ्वीया मालिक जुयादीम्ह परमेश्वर मनूतय्गु ल्हातं दय्कूगु देगलय् च्वनादी मखु। 25 हानं थ्व हे परमेश्वर मनूतय्त माःगु जीवन, सासः, अले हानं माक्व चिज बियादीम्ह खः धासेंलि मनूतय्सं हानं परमेश्वरयात छुं हे छाये माःगु मदु।* १७:२४-२५ १ राज ८:२७; यशै ४२:५; प्रे ७:४८ 26 वय्कलं छम्ह हे मनूयापाखें फुक्क मनूतय्त दय्कादिल। अले न्हापांनिसें हे इमित गन गन तयेगु, अले गुबलय् तक म्वाका तयेगु धयागु खँ क्वःछिना तयादी धुंकल।
27 “मनूतय्सं वय्कःयात पचि पचि यानाः मालेमा धकाः फुक्कसित दय्कादीगु खःसां वय्कः झी पाखें तापाना मदी। 28 ‘छाय्धाःसा परमेश्वरं हे झीत सासः बियाः सने फय्कादीगुलिं थौं झीपिं थथे म्वाना च्वने फत।’ थ्व हे खँ छिकपिनि कबिजुपिन्सं नं थथे धाःगु दु -- ‘झी फुक्कं परमेश्वरया सन्तान खः।’ 29 झीपिं थथे परमेश्वरया सन्तान खः धकाः सीक सीकं, झीसं थ्व हे परमेश्वरयात कःमितय्सं दय्कातःगु लुँ, वहः, अले ल्वहंया मूर्ति थें ताय्केगु बांमलाः।
30 “अय्जूगुलिं वय्कःयात म्हमस्यूनीबलय् याःगु ज्याखँयात परमेश्वरं च्यूताः तया मदी। आः धाःसा परमेश्वरं झीत थज्याःगु बांमलाःगु ज्यां लिचिलाः पश्चाताप यायेत उजं बियादीगु दु। 31 वय्कलं थ्व संसारय् च्वंपिं मनूतय्त न्याय यायेगु दिन नं क्वःछिना तयादी धुंकल। ख्वाः स्वयाः न्याय मयाइम्ह छम्ह मनूयात नं वय्कलं ल्यया तयादी धुंकल। वय्कलं थ्व खँया दसु सी धुंकूम्हय्सित म्वाकाः क्यनादी धुंकल।”
32 थथे पावलं सीम्ह म्वाकूगु धकाः धाःगु खँ न्यनाः गुलिसिनं वयात हिस्यात, अले गुलिसिनं थथे धाल -- “थ्व खँ जिमिसं हानं न्यने मानि।” 33 अनंलि पावल इमिथासं बिदा कयाः थःगु लँय् वना छ्वल। 34 गुलिसिनं वयागु खँय् विश्वास यात। इपिं मध्ये अरियोपागसयाम्ह दुजः डियनुसियस धाःम्ह मनू व दामारिस धाःम्ह मिसा नं दु। थुपिं बाहेक इपिं नाप मेपिं नं दु।