1 यःपिं दाजुकिजापिं, जिं व्‍यवस्‍था सःपिं मनूत नाप नवानाच्‍वनागु खः धकाः छिमिसं थुइकि। छिमिसं मस्‍यू ला? म्‍वाना च्‍वँतले जक मनूत व्‍यवस्‍थां धाःथें च्‍वने माः। 2 बिया छ्वये धुंकूम्‍ह मिसाया भाःत मसितले व मिसां भाःतयात त्‍वःते मज्‍यू धकाः व्‍यवस्‍थां धाःगु खँ मानय्‌ याये हे माः। अय्‌नं भाःत सित धाःसा व्‍यवस्‍थां भाःतयात त्‍वःते मज्‍यू धकाः धाःगु आज्ञा मानय्‌ याये म्‍वाः। 3 भाःत म्‍वाना च्‍वंबलय्‌ हे मेम्‍ह मनू नापं ब्‍याहा याःसा वयात स्यंम्ह मिसा धकाः धाइ। भाःत सी धुंकाः व व्‍यवस्‍थापाखें मुक्त जुइ। मेम्‍हलिसे ब्‍याहा याःसां स्यंम्ह मिसा धकाः धाइ मखु।

4 अथे हे छिपिं नं ख्रीष्‍ट नापं सी धुंकूगुलिं आः व्‍यवस्‍थायागु अधिनय्‌ च्‍वने माःगु मन्‍त। उकिं दाजुकिजापिं, झीसं परमेश्वरया निंतिं यक्‍व फल सय्‌केत सिनाः म्‍वाना झायादीम्‍ह ख्रीष्‍ट नाप मिलय्‌ जुया च्‍वने माः। 5 न्‍हापा झीपिं मनू स्वभाबया पापं जाःगु इच्छाकथं म्वाना च्वनापिं खः। उबलय्‌ व्‍यवस्‍थां झीगु इच्‍छायात क्‍वत्‍यला तःगुलिं झीत पाप याके बिल। थ्‍व फुक्‍क ज्‍या मृत्‍युयागु लँपु जक खः। 6 आः झीपिं व्‍यवस्‍थायागु अधिनय्‌ च्‍वने माःगु मन्‍त। झीत चिनातःगु व्‍यवस्‍थाया निंतिं झीपिं सी धुन। अय्‌जूगुलिं न्‍हापा थें व्‍यवस्‍थाया अधिनय्‌ च्‍वने माःगु मन्‍त, बरु आवंलि ख्रीष्‍टयागु आत्‍मां धाःथें झीसं परमेश्वरयागु सेवा याये माः।

7 अय्‌सा झीसं आः छु धायेगु? छु व्‍यवस्‍था पाप खः ला? थ्‍व ला जुइ हे फइ मखु। अय्‌नं व्‍यवस्‍था मदुगु जूसा जिं पाप म्‍हसीके फइ मखुगु। व्‍यवस्‍थायागु सफुलिइ “छं लोभ याये मते” धकाः च्‍वया मतःगु जूसा जिं लोभ छु खः धयागु हे सी मखुगु।* ७:७ प्रस २०:१७; व्‍य ५:२१ 8 थ्‍व हे आज्ञायागु ग्‍वाहालि कयाः पापं जितः लोभ याये सय्‌का बिल। व्‍यवस्‍था मदुगु जूसा पाप नं दइ मखुगु। 9 जि छकः ला व्‍यवस्‍था मसिकं म्‍वाना च्‍वने धुंकूम्‍ह मनू खः। गुबलय्‌ आज्ञा सिल अबलय्‌ पाप म्‍वात। 10 अले जि सित। जीवन बी धकाः धाःगु आज्ञा ला जितः स्‍याना छ्वइम्‍ह जुल। 11 पापं आज्ञायागु ग्‍वाहालि कयाः जितः झंगःलात। थुकथं जितः स्‍याना बिल।* ७:११ उत ३:१३ 12 अय्‌जूगुलिं व्‍यवस्‍था पवित्रगु खः। अले आज्ञा नं पवित्र, धर्मी व भिंगु खः।

13 अय्‌सा थज्‍याःगु भिंगुलिं हे जितः स्‍याना बिल ला? थथे ला गुब्‍सं नं मजुइमा। पापं यानाः दुनें दुनें मभिं जुयाः जितः स्‍याःगुलिं जिं पापयात म्‍हसीके फत। अले हानं आज्ञां यानाः नं पाप झन ग्यानापुसे च्वन।

14 व्‍यवस्‍था आत्‍मिक खः धकाः झीसं स्‍यू। जि धाःसा आत्‍मिक मखु अय्‌नं पापया ल्हातय्‌ मियातःम्‍ह मनू जि हे खः। 15 जिं यानाच्‍वनागु ज्‍या जिं हे मथू, छाय्‌धाःसा जितः छु यः व जिं मयाना, बरु जितः मयःगु छु खः व हे जक याना च्‍वना।* ७:१५ गला ५:१७ 16 थुकथं जिं जितः मयःगु ज्‍या यात धाःसा जिं व्‍यवस्‍था भिं जू धकाः मानय्‌ याये। 17 अय्‌जूगुलिं थज्‍याःगु ज्‍या याइम्‍ह जि मखु, बरु जिके च्‍वंम्‍ह पाप खः।

18 जिगु मनय्‌ छुं नं भिंगु खं थाय्‌ मकाः धकाः जिं सिल। मनं भिंगु याये मास्‍ति वःसां जिं याये मफु। 19 थुकथं जिं याये मास्‍ति वःगु भिंगु ज्‍या याये मफु, बरु याये मास्‍ति मवःगु मभिंगु ज्‍या जक यानाच्‍वना। 20 थथे जितः मयःगु हे जक याना जुल धाःसा थथे याइम्‍ह जि मखु, बरु जिके दुने च्‍वंम्‍ह पाप खः।

21 जिं भिंगु ज्‍या यायेत्‍यनाबलय्‌ हे, मभिंगु ज्‍या याकिम्‍ह जिगु न्‍ह्यःने च्‍वं वइ धकाः जिं स्यू। 22 परमेश्वरयागु व्‍यवस्‍था दुनुगलंनिसें मानय्‌ याना च्‍वने दुसा जि लय्‌ताया। 23 जिगु म्हयागु व्‍यवस्‍था व मनयागु व्‍यवस्‍थाया दथुइ ल्‍वापु जुयाच्‍वंगु जिं चा। थुकथं पापयागु व्‍यवस्‍थां जितः त्‍याकाः चिना तल। 24 जि ला तसकं हे आपतय्‌ लानाच्‍वन। थज्‍याःगु सी मालिगु ज्‍याखँ यानाच्‍वनागु जिगु म्‍हयात सुनां बचय्‌ याइ? 25 झी प्रभु येशू ख्रीष्‍टयापाखें परमेश्वरयात सुभाय्‌। छाय्‌धाःसा जिगु मनं ला परमेश्वरयागु व्‍यवस्‍था हे मानय्‌ याः। अय्‌नं जिगु म्‍हं धाःसा पापया दास जुयाः सेवा यानाच्‍वन।