110
परमप्रभुं ल्ययादीम्ह जुजु
दाऊदया भजन
1 परमप्रभुं
जिमि प्रभुयात
धयादिल,
“छं शत्रुतय्त छंगु पालि तःले
मततले छ जिगु जवय् च्वँ।”* ११०:१ मत्ती २२:४४; मर्क १२:२६; लूक २०:४२-४३; प्रे २:३४-३५; १ कोर १५:२५; एफि १:२०-२२; कल ३:१; हिब १:१३; ८:१; १०:१२-१३
2 परमप्रभुं छिगु बल्लाःगु राज्य
यरूशलेमं तःधं यानादी।
छि छिकपिनि शत्रुतय्
जुजु जुयादी।
3 छिं थः शत्रुतलिसें लडाइँ
याःगु दिनय्
छिकपिनि मनूत छिगु हे
इच्छां न्ह्यःने वनी।
सुथ न्हापांया सुति लःथें
छिकपिनि ल्याय्म्हपिं
पवित्र पहाडय् छिथाय् वइ।
4 परमप्रभुं पाफयादीगु दु,
अले उकिं थःगु
मन हीकादी मखु,
“मल्कीसेदेक थें
छ न्ह्याबलेंयात
पुजाहारी खः।”* ११०:४ हिब ५:६; ६:२०; ७:१७,२१
5 छंगु जवपाखे दीम्ह परमप्रभुं
तंया दिनय्
जुजुपिन्त चुँचुं यानादी।
6 वय्कलं जाति जातितय्गु
न्याय यानादी,
अले वय्कलं
सीम्हयात द्वँचिनादी,
अले पृथ्वी न्यंकयापिं
शासकतय्त चुँचुं यानादी।
7 जुजुं लँय् लिकसं लाःगु
खुसिया लः त्वनी,
अथे जुयाः वय्कलं
थःगु छ्यं धस्वाकी।