1 Ngannkon’gɨ, lokɨ m’aw dann’se’tɨ, m’ilə’se mbər poyta kɨ rɔta’tɨ lə Luwə, kɨ to lo kiyə’tɨ, in kɨ nyagər kɨ aldɔ’se eke kɨ tərta ə m’ilə’n’se mbər kin el. 2 Tadɔ lokɨ m’in dann’se’tɨ, nya kɨ rangɨ kɨ m’un ndu’m dɔ’tɨ goto. M’sangɨ kadɨ gəri Kirisitɨ par kareba. Adɨ in Kirisitɨ kɨ ɓəri’ə kagidəsɨ’tɨ. 3 Lokɨ m’in dann’se’tɨ, m’in me tɔgɨ goto’tɨ. M’el’se ta me dadɨ’tɨ kɨ ɓol. 4 Nya kɨ m’ndo’se kɨ mbər Poyta kɨ majɨ kɨ m’ilə’se kin, in kɨ ta nyagər lə de el. In kigo kɔjɨ tɔgɨ’tɨ lə Ndil Luwə. 5 Be kadɨ kunme kadɨ lə’se ulə ngirə’ne dɔ nya gər’tɨ lə de el, nan dɔ tɔgɨ’tɨ lə Luwə yo ta. 6 Ningə, j’in kaa jɨ ndo njekunme’gɨ kɨ tɔgi me ndil’tɨ kɨ me tər tɔ. Nan k’in ə in tər lə de’gɨ kɨ dɔnangɨ’tɨ ne el. Taa in tər lə njetɔgɨ’gɨ kɨ dɔnangɨ’tɨ ne kɨ ndɔ madɨ ə a tujɨ kin el tɔ. 7 J’iləmbər tər lə Luwə. Tər kɨ to lo kiyə’tɨ bitɨ ɓone. In tər kɨ Luwə ində dɔ’a dana kete non kində dɔnangɨ’tɨ tadɔ tɔɓar lə’je. 8 Tər kɨ de kare kɨ dann nje tɔgɨ’gɨ’tɨ kɨ dɔnangɨ’tɨ ne kɨ gər goto. Re kum’de te dɔ tər’tɨ kin ə re a ɓəri Burəɓe kɨ nje tɔɓar kagidəsɨ’tɨ el. 9 Ningə, tokɨ makitu lə Luwə el’n, in nya kɨ kum’de oo el, in nya kɨ mbi de oo el, in nya kɨ de mər me’ne’tɨ el tɔ. In nya kɨ Luwə ində dɔ’a dana tadɔ lə de’gɨ kɨ ndigi’ə* 2.9 Ejay 64.3, 52.15. 10 Nga ningə, Luwə te kɨ dɔ’a adɨ’je kɨ gorow lə Ndil. Tadɔ Ndil oo ginn nya’gɨ pətɨ. Ndigɨ ra’gɨ lə Luwə kɨ to lo kiyə’tɨ kaa Ndil oo. 11 Kɨ ɔjidɔ de, de madɨ kɨ gər nya’gɨ kɨ to rɔ madɨ’ne’tɨ goto. In ndil kɨ to rɔ de’tɨ kin par ə gər nya’gɨ kɨ to rɔ’a’tɨ. In be ə, yan Luwə kaa to be tɔ. Ndil Luwə kɨ kar’ne ba par ə gər nya’gɨ kɨ to rɔ Luwə’tɨ. 12 Nga ningə, ndil kɨ in me’je’tɨ j’ingi kin in ndil kɨ dɔnangɨ’tɨ ne el, nan in Ndil kɨ in ta rɔ Luwə’tɨ nu, kadɨ jɨ gərɨ’n nya’gɨ kɨ Luwə adɨ’je kigo memajɨ’tɨ li’ə. 13 Ningə, j’el taa kɨ row nyagər lə de el, nan kɨ row lə Ndil Luwə. In be ə, j’isi j’ɔr ginn nya kɨ rɔta’tɨ lə Ndil, j’adɨ de’gɨ kigo Ndil’tɨ. 14 De kɨ aw kɨ Ndil Luwə me’ne’tɨ el, asɨ kadɨ ingə nya kɨ rɔta’tɨ kɨ in rɔ Luwə’tɨ el. Tadɔ in Ndil Luwə par kareba ə adɨ de gər nya’gɨ kɨ rɔta’tɨ kin. 15 De kɨ aw kɨ Ndil Luwə me’ne’tɨ asɨ gangɨ ta dɔ nya’gɨ’tɨ pətɨ, ningə de kɨ rangɨ asɨ gangɨ ta dɔ’a’tɨ el. 16 Makitu el ene: «Nan ə gər mərta lə Burəɓe wa? Ke nan ə asɨ kɔj’ɔ ta wa† 2.16 Ejay 40.13?» De’ə goto, nan j’in, j’awi kɨ mərta lə Kirisitɨ.