1 Ba neza zrente̱ naca na chee̱ bénnea' dxe'e̱ gunne xue

Lu zra gate zue̱' lu da ste̱be, guselá Xránadxu bénnea'.

2 Xránadxu guxúequeze̱' le̱', ne gunézruje̱' le̱' xel-la' nabán.

Gaca na tu da ba neza zrente̱ chee̱ bénnea' lu xe̱zr la xu nigá,

na' quebe gudé Xránadxu le̱' lu na' benne' ca' dxeledábague̱' Le̱'.

3 Xránadxu Dios gúxruqueze̱' le̱' gate zúe̱' lu xel-la' dxudía.

Gun chawe̱' dute̱ da naque̱' gate na' quebe chawe' zue̱'.

4 Gunnía': Xrana' Dios, bexache lazre' neda'.

Bexún bénne'du xu'a lawe' da be̱na' dul-la gate gudábaga' Lue'.

5 Benne' ca' dxeledábague̱' neda' dxelenné̱' chia' da cale̱la.

Dxelenne̱': “¿Bátala gate benne' nigá, ne xenite le̱'?”

6 Che xedajlenné̱'e̱ neda', dxelún lazre̱'.

Dxelebéaje̱' neda' dizra' chee̱ bi da cale̱la gaca xelenné̱' chia',

na' gate dxelexedxúaje̱', na' dxelexrúe̱' dizra' na'.

7 Gate dxelezraga benne' dxelecuídene̱' neda',

na' tu dxelenné̱zqueze̱' chia'.

Tu dxuluchálajle̱zqueze̱' ljwezre̱' chia' neda' da naca

8 “Ba guxú'e̱ tu xízrawe̱' da gute na le̱',

ne québedxa xexásaqueze̱' ga na' de̱'.”

9 Cá'anqueze bénnea' guleza zri lazre' nen neda',

bénnea' bxren lazra', na' gudágule̱queze̱' neda',

benne' nigá dxedábagazegue̱' neda'.

10 Lue', Xrana' Dios, bexache lazre' neda',

na' xunézruja' benne' ca' ca da dxal-la' xelezí'e̱.

11 Caníqueze nezda' ba be̱na' da dxezaca ba lazru' Lue',

chee̱ quebe bi xelebéle̱ benne' ca' dxeledábague̱' neda'.

12 Ca naca chia' neda', ba bé̱xruquezu' neda' lawe' da

ne ba bzu' neda' lau Lue' chadía chacanna.

13 ¡Gaca ba Xránadxu, Dios chee̱ benne' Israel ca'

gaxuane iza, ne chadía chacanna!

¡Ca'an naca na, ne ca'an gaca na!