147
1 ¡Le güe lá'ana Xránadxu Dios lawe' da naca chawe'
gúl-ladxu da güe lá'anadxu Dios chee̱dxu,
lawe' da xrtante̱ naca güe lá'anadxu Le̱'!
2 Xránadxu Dios xexune̱' xe̱zre Jerusalén.
Xequé̱'e̱ benne' Israel ca' zaj zue̱' xe̱zr la xu zitu' ca'.
3 Dxexune̱' benne' ca' dxelexewí'ine lázrele̱'e̱,
ne dxudé̱'e̱ ladxe' naga zaj naca we̱' chee̱ benne' ca'.
4 ¡Nézquezne̱' ca zaj naxán belaj ca'!
¡Tu tu belaj ca' dxu'e̱ la na!
5 ¡Szrente̱ naca Xránadxu Dios, ne nape̱' dute̱ xel-la' waca!
¡Quebe bi de̱ da quebe dxéajni'ine̱'!
6 Xránadxu Dios dxácale̱ne̱' benne' dxexruj lazre' ca',
na' dxuzéxruje̱' benne' ca' dxelune̱' da cale̱la.
7 ¡Le gul-la da güe lá'anale Xránadxu Dios!
¡Le gul-la, ne le quinne da cun zríadi'i na du lau Dios chee̱dxu!
8 ¡Le̱' dxudé̱'e̱ beuj ca' zran xabáa!
¡Le̱' dxesel-le̱' nisa xiuj lu xe̱zr la xu!
¡Le̱' dxune̱' dxelezría xíxre'du ca' lu xi'a ca'!
9 ¡Le̱' dxunézruje̱' da dxelagu be̱ xixre' ca'!
¡Dxunézruje̱' da dxelagu béchajdu ca', be̱ dxelebezre xa'aba'!
10 Da dxezaca ba lázrele̱ne̱' quebe naca na xel-la' wal-la
chee̱ bzrina' ca',
ne quegá xel-la' wal-la chee̱ bénneache.
11 Dxezaca ba lázrele̱ne̱' benne' ca' dxelezrebe̱' Le̱',
ne benne' ca' dxelebeza lazre̱' Le̱' chee̱ xexache lazre̱' le̱'.
12 ¡Le güe lá'ana Xránadxu Dios, le'e zrale xe̱zre Jerusalén!
¡Le güe lá'ana Dios chee̱le, le'e zrale xe̱zre Sión!
13 ¡Le̱' dxuzúa chúchue̱' dxa xu'u chee̱ xe̱zre chee̱le!
¡Dxune̱' dxaca chawe' chee̱ benne' ca' zaj zre̱'e̱ xe̱zre chee̱le!
14 ¡Dxebeque̱' xel-la' dxebeza zri lazre' lu xe̱zr la xu chee̱le!
¡Gúnnale̱'e̱ chee̱le zrua' chawe'!
15 ¡Dxusel-le̱' xrtizre̱' chee̱ benne' ca' zaj zre̱'e̱ dute̱ xe̱zr la xu,
na' chadí dxaca ca da dxenné̱'!
16 ¡Dxugacue̱' xe̱zr la xu bezxe' da naca na ca zrila'!
¡Dxuzéxruje̱' xrle̱'e̱la dxe̱la ca de!
17 ¡Dxune̱' dxelexruj xiaj bezxe' ca weaj xíajdu ca'!
¿Nu benne' gaca guchaga lawe̱' da zaga chee̱ na?
18 ¡Dxenná be'e̱, na' dxexuna na!
¡Dxune̱' dxaca be', na' dxexaca bezxe' na' nisa guba'u!
19 ¡Bzéajni'ine̱' Jacob ca naca xrtizre̱', ne bdee̱' xrba chee̱',
ne da ca' gunná be'e̱ lu na' benne' Israel ca'!
20 Quebe ne gune̱' caní chee̱ xe̱zr la xu xezícadxa ca',
na' benne' xe̱zr la xu ca' quebe dxelexúnbe'e̱ xrba chee̱'.
¡Gaca ba lá'azxa Xránadxu Dios!