1 Nadxa gulasa xúgute̱ benne' dxuluchi'e̱, na' guleché̱'e̱ Jesús lau Pilato, benne' dxenná be'e̱ waláz chee̱ Roma. 2 Na' gulezú lawe̱' dxelagu zrie̱' Jesús, dxelenné̱':

―Ble'entu' benne' nigá dxegú'u xel-le̱' bénneache chee̱ xeledábague̱' xu'u lawe'. Dxenné̱' quebe dxal-la' quízrujntu' da dxuchizruj César, benne' Roma, na' cá'anqueze dxenné̱' naque̱' Cristo, Benne' Wenná Bea.

3 Nadxa Pilato bche̱be̱' Jesús:

―¿Nacu' Lue' Wenná Bea chee̱ judío ca'?

Na' beche̱be Jesús:

―Ca' naca na, ca ba gunnáu' lue'.

4 Nadxa gunná Pilato, guzre̱' benne' xíchaje̱ ca' chee̱ bxruze ca', ne bénneache ca':

―Quebe bi da zrinnaj dxezrelda' nun benne' nigá.

5 Benne' ca' belún chúchue̱' dizra' chee̱', gulenné̱':

―Dxegu'u xel-le̱' xúgute̱ benne' zaj zre̱'e̱ xe̱zre ca' zaj nababa Judea chee̱ xeledábague̱' xu'u lawe'. Guzú lawe̱' dxune̱' na naga nababa Galilea, na' na'a dxune̱' na nigá.

6 Gate ben Pilato da nigá, na' bche̱be̱' che naca Jesús benne' Galilea. 7 Gate gulé̱'e̱ le̱' naca Jesús benne' Galilea, na' Pilato gusél-le̱' Le̱' lau Herodes, benne' dxenná be'e̱ xe̱zre ca' zaj nababa Galilea, na' lu zra na' zue̱' Jerusalén. 8 Gate ble'e Herodes Jesús, gubéle̱'e̱ne̱', lawe' da bátate̱ dxaca lazre̱' lé'ene̱' Le̱', lawe' da ba benne̱' dxuluchalaj bénneache chee̱ Jesús, na' guca lazre̱' lé'ene̱' gun Jesús tu xel-la waca da za xabáa. 9 Da zante̱ da bche̱be̱' Jesús, na' Le̱' quebe bi beche̱be̱'. 10 Zráqueze benne' xíchaje̱ ca' chee̱ bxruze ca' na', nen benne' ca' dxuluxuzájle̱'e̱ da nadxixruj bea na, na' belún chúchue̱' dizra' chee̱' da dxelagu zria Jesús. 11 Nadxa Herodes, ne benne' chee̱' ca' dxjaque̱' wedil-la buluzúe̱' Le̱' chalá'ala, na' chee̱ xelún le̱' chee̱', bulugácue̱' Le̱' ladxe' bzawe ca naca zra tu benne' wenná bea. Nadxa Herodes besel-le̱' Le̱' lau Pilato. 12 Lu zra na' Pilato, ne Herodes belexaque̱' tuze, lawe' da belezrá'a ljwezre̱' nédxute̱.

13 Nadxa Pilato bchague̱' benne' xíchaje̱ ca' chee̱ bxruze ca', ne benne' xu'u lawe' ca', 14 na' guzre̱' benne' ca':

―Le'e guche̱le benne' nigá za'le naga zua', dxennale dxegú'u xel-le̱' bénneache chee̱ xeledábague̱' xu'u lawe'. Neda' ba bche̱ba' Le̱' laule le'e, na' quebe bi da zrinnaj dxezréleda' nune̱' ca naca da dxennale chee̱'. 15 Cá'anqueze Herodes quebe bi da zrinnaj bzrélene̱' da nun Jesús, na' budée̱' Le̱' launtu'. Quebe bi ne gune̱' chee̱ chuga' chee̱' gatie̱'. 16 Gudéa' Le̱' xel-la zi', na' gusánqueza' Le̱'.

17 Dxácate̱ dxaca laní na', Pilato dxal-la' gune̱' tu da dxelezaca ba lazre' bénneache, gusane̱' tu benne' xu'e̱ lizre xia. 18 Xúgute̱ benne' ca' gulezú lawe̱' dxelebezre xe̱'e̱, dxelenné̱':

―¡Gate benne' nigá! ¡Bsan Barrabás na'!

19 Barrabás nigá gulegú'e̱ le̱' lizre xia lawe' da gudábague̱' xu'u lawe', na' be̱tie̱' tu benne'. 20 Pilato guca lazre̱' gusane̱' Jesús, na' bchálajle̱ne̱' benne' ca' xetú. 21 Na' benne' ca' gulebezre xe̱'e̱ zízrajdxa, dxelenné̱':

―¡Bde̱'e̱ xaga béguaj! ¡Bde̱'e̱ xaga béguaj!

22 Da guxunne' lasa gunná Pilato:

―¿Bizra da zrinnaj nune̱'? Quebe bi dxezréleda' da gudé na Le̱' gatie̱'. Gudéa' Le̱' xel-la zi', na' te na' gusana' Le̱'.

23 Na' benne' ca' belún chúchue̱' dizra' chee̱' chee̱ te̱'e̱ xaga béguaj, ne gulebezre xá'atie̱', nen benne' xíchaje̱ ca' chee̱ bxruze ca', cadxa guca ca da gulaca lazre̱'. 24 Nadxa Pilato guchugue̱' chee̱ Jesús gaca chee̱' ca da dxelaca lazre' benne' ca'. 25 Na' bsane̱' bénnea' belenabe̱', xu'e̱ lizre xia lawe' da gudábague̱' xu'u lawe', ne be̱tie̱' tu benne', na' bdee̱' Jesús chee̱ gaca chee̱' ca dxelaca lazre' benne' ca'.

26 Gate zjaque̱' zaj naché̱'e̱ Jesús chee̱ xuludé̱'e̱ Le̱' xaga béguaj, na' gule̱le̱' tu benne' Cirene, le̱' Simón, zezé̱'e̱ le̱'e̱ xixre', na' bulugu'e̱ le̱' xaga béguaj chee̱ Jesús, na' zéaje̱' cuzru Jesús na'.

27 Na' xjácale̱ Le̱' benne' zante̱, ne nu'ula zan dxelebezre̱', na' dxelebezre xache̱' ne̱ chee̱ da dxaca chee̱ Jesús. 28 Nadxa Jesús gunné̱'e̱ nu'ula ca', na' guzre̱' le̱':

―Le'e, nu'ula Jerusalén, quebe cuézrele chia' neda'. Le cuezre cheé̱quezle, ne chee̱ zrí'inele, 29 lawe' da zrin zra gate xelenné̱': “Ba neza zren naca na chee̱ nu'ula wizre, ne nu'ula ca' cabata' gulezúe̱' zi'i, ne nu'ula ca' cabata' bulugazre̱' bidau'.” 30 Lu zra na' xelezú lau bénneache xelé̱'e̱ xi'a ca': “Le gugacu netu' xu.” Na' xelé̱'e̱ xí'adu ca': “Le gucache netu'.” 31 Che dxelune̱' da caní chia' neda', naca' ca tu xaga ban, ¿gázradxa xelune̱' chee̱le le'e, nácale ca xaga bizre ca'?

32 Cá'anqueze guleché̱'e̱ chupa benne' we̱n da zrinnaj chee̱ xelútie̱' le̱' tu zren nen Jesús. 33 Gate belezrine̱' lataj na' nazí le na, Calavera, da zéaje̱ na, Xi'a Zrita Xíchajdxu, na' buludé̱'e̱ Jesús xaga béguaj, ne cá'anqueze belune̱' chee̱ benne' we̱n da zrinnaj ca', tue̱' cuite̱' xabe̱la, ne xetúe̱' cuite̱' xéglala. 34 Ca dxuludé̱'e̱ Le̱' xaga béguaj, na' gunná Jesús:

―Xrae, bnite lau chee̱ benne' caní lawe' da quebe zaj nézene' bi na' dxelune'.

Na' benne' dxjaque̱' wedil-la gulebeje̱' da dxunna bea' chee̱ xelezí'e̱ late' weaj zra lana Jesús. 35 Benne' ca' zaj zre̱'e̱ na' dxelenné̱'e̱, ne benne' xu'u lawe' ca' belún le̱' chee̱', dxelenné̱':

―Bselé̱' benne' xula ca'. Na'a dxal-la' guselá cuine̱' che da li naque̱' Cristo, Bénnea' Gucá'a Dios.

36 Cá'anqueze benne' dxjaque̱' wedil-la belún le̱' chee̱', na' gulebigue̱' cuita Jesús, ne buluxí'aje̱' Le̱' nupe zichaj. 37 Gulé̱'e̱ Le̱':

―Che lue' nacu' Wenná Bea chee̱ judío ca', bselá cuinu'.

38 Zua xichaj Jesús tu da naxúaj nen dizra' griego, ne dizra' latín, ne dizra' hebreo, da dxenná na:

―Wenná Bea chee̱ judío ca'.

39 Tu benne' we̱n da zrinnaj, bénnea' de̱'e̱ xaga béguaj be̱n le̱' chee̱ Jesús, dxenné̱':

―Che Lue' nacu' Cristo, bselá cuinu', ne bselate̱ netu'.

40 Na' xetú benne' we̱n da zrinnaj na' gudil-le̱' ljwezre̱'. Guzre̱' le̱':

―¿Quebe dxezrebu' Dios? Lue' dxezácaquezu' ca da gulechugue̱' chee̱' Le̱'. 41 Dxi'u dxezácadxu ca da dxál-la'queze sácadxu, lawe' da dxaca chee̱dxu da dxal-la' sidxu ca naca da zrinnaj da nundxu, san benne' nigá quebe bi da zrinnaj nune̱'.

42 Nadxa gunné̱':

―Jesús, xeajsá lazre' neda' gate su lau' nna be'u.

43 Na' beche̱be Jesús:

―Da li dxapa' lue', ná'ate̱la súale̱quezu' neda' lu lataj chawe' chee̱ Dios.

44 Guca ca wagubizra. Nadxa ca naca lu xe̱zr la xu guchul-la na cadxa bzrinte̱ na dxedá' chunna. 45 Gubizra guchul-la na, na' ladxe' ze̱ lu xudau' bdxuaj na chúpala. 46 Nadxa gudxezre xa'a Jesús, dxenné̱':

―Xrae, lu na'u dxegu'a be' xu'a.

Ca gunné̱' ca', na' gutie̱'.

47 Gate benne' dxenná bé'ene̱' benne' dxjaque̱' wedil-la blé'ene̱' ca da guca, na' be̱ lá'ane̱' Dios, gunné̱':

―Da li, benne' nigá quebe bi da zrinnaj be̱ne̱'.

48 Xúgute̱ benne' ca' zaj zre̱'e̱ na', gate belelé'ene̱' ca da guca, na' besiá'que̱' na', dxelu'e̱ lachu'e̱. 49 Xúgute̱ benne' ca' zaj núnbe'e̱ Jesús, ne nu'ula ca' xjácale̱ne̱' Jesús gate bezé̱'e̱ Galilea, belexegá'ane̱' zítu'la dxelenné̱'e̱ da caní.

50 Zua tu benne' chawe' ne xrlátaje le̱' José, benne' xe̱zre Arimatea chee̱ xe̱zre ca' zaj nababa Judea. Nababe̱' xu'u lawe' blau chee̱ judío ca'. 51 José nigá dxebeze̱' zra nna bea Dios, na' quebe be̱ne̱' tuze ca da belún benne' xu'u lawe' blau ca'. 52 Benne' nigá guxíaje̱' xeajchálajle̱ne̱' Pilato, na' gunabe̱' latja gucache̱' Jesús. 53 Ca bexuzre buluxulétaje̱' Le̱' xaga béguaj, na' buluxuchele̱' Le̱' tu ladxe', na' gulu'e̱ Le̱' tu lu xe̱dxu ba, da ba gude̱ne̱' tu le̱'e̱ xi'a xiaj, naga quebe nu ne gáchequeze. 54 Naca na zra dxulucueze̱' chee̱ zra dxulupá'ane̱', da ba zua su lau na.

55 Nu'ula ca' xjácale̱ne̱' Jesús gate bezé̱'e̱ xe̱zre ca' zaj nababa Galilea, xjaque̱' na', ne belelé'ene̱' ba na', ne belené̱'e̱ ájala zaj nagu'e̱ Le̱' xe̱dxu ba. 56 Gate belexezrine̱' xu'u naga zaj zre̱'e̱, na' bulucueze̱' da du ca' dxelelále̱'e̱ zixre, ne da zaj naca na ca za dxelelále̱'e̱ na zixre. Belexezí' lazre̱' zra dxulupá'ane̱' cáte̱ze naca da gunná bea Dios.