1 Tsa'caen supa Jesúsja Capernaumne sombopa Judea andeni Jordán na'en jonifani ja. Tseni jasi tsain'bio a'i tise can'jeni bo'fa. Tsa'caen bosi Jesúsja atesian tise in'janqquia'caen. 2 Tsa'caen tson'jen'ni majan fariseondeccu Jesúsnga catse'fa. Tisema qqueñañe in'jamba qquen iñajampaña'fa:

—¿Ñotssi ti tsa'ndu tise pushema catiye?

3 Qquen su'fasi Jesúsja su:

—¿Jongoe qquen tsu manda Moisésja?

4 Tise'paja su'fa:

—Moisés tsu manda pushema catiye in'jan'da catiya'cho tevaen'jema tevaemba pushenga afepa catiye.

5 Tsonsi Jesúsja su:

—Moisés tsu tsa'caen manda antte que'i injama'cho shacapa in'jan'fambisi. 6 Tsa'ma tseyi me'ttia'ye agattoemba Chigaja tsa'caen anttembi. Nane tsandie, pushesuve tsu agattoen. 7 Tsa'cansi tsu tsandieja tise yaya, tise mamama catipa tise pushei'ccu canseya'cho. 8 Tsa'caen cansepa tsu dos a'i fae a'iveyi da'fa. Nane dos a'imbi tsu. Jo'su fae'ccoyi. 9 Chiga tsa'caen in'jamba fa'enga tsonsi a'ija tsa'caen fae'ccoe da'choma attufaembe can'faya'cho.

10 Tsomba Jesús tsaoni can'jensi tisema shondosundeccuja tsane ccase iñajampaña'fa. 11 Iñajampaña'fasi Jesús su:

—Majan tise pushema catipa faesuma pushe'ta tise aishe pushema tsu egae tsoña. 12 Toya'caen pushesu tise tsa'nduma catipa faesuma tsa'ndu'ta tise'qque tsu egae tsincon.

13 Tsonsi Jesúsnga dushundeccuma i'fa cuintsu Jesús pporaeñe. Tsa'ma tsa'caen iña'fasi Jesúsma shondosundeccu iyu'u'fa. 14 Iyu'je'fasi Jesús attepa iyicca'yepa su:

—Antte'faja cuintsu dushundeccu ñanga ji'faye. Nane tise'pama se'pimbe can'faja. Majan Chigambe a'ija va dushundeqquia'can tsu. 15 Nane ñoa'me gi su, majan ñame in'jambipa va dushundeqquia'cambija osha'faya'bi tsu Chiga sefacconi ca'niñe.

16 Tsa'caen supa Jesúsja du'shuma munsin dyaipa pporaemba tise'pane Chigama ñotsse afa.

17 Tsa'caen afa nanimba Jesús jaye tson'jen'ni fae tsandie buttopa jipa Jesús tsovejufanga ccaru dyaipa iñajampaña:

—Ño'an atesian'su, ¿ma'caen gi tsoña tsangae canseyeja?

18 Jesúsja su:

—¿Jongoesie qui ñama “ño'an” qquenda su? Chigayi tsu ño'an, Faesu ño'ame me'i'on. 19 ¿Queta ti qui atesu a'inga Chiga manda'choma? Faesumbe pushei'ccu cansejama. A'ima fi'ttijama. Cca'najama. Cca'inga afopoenjama. Afopoenjama tisu ti'tsse isuye. Que yaya, que mamama ñotsse in'jamba pañajan.

20 Qquen susi tsandieja su:

—Atesian'su, tsamajan pa'ccoma gi pañamba canse chuitepie.

21 Jesús tsandiema ñotsse in'jamba camba su:

—Fae tsoña'cho tsu shaca. Japa pa'cco que an'bian'choma chavaenjan. Chavaemba corifin'dima isupa mendeqquianga afeja. Tsayita qui Chiga sefacconi ricove daya. Tsa'caen tsomba jipa ñai'ccu fae'ngae paya'ngae jacanjan.

22 Tsama pañamba ñoquimbipa ñombi'yé ja panshaen ricopa.

23 Tsonsi Jesúsja tisema shondosundeccuma piyicamba su:

—Aiye'pa tsu majan osha'choma an'bian'cho Chiga a'ive daye.

24 Tsa'caen susi tisema shondosundeccuja asi'ttaemba can'boen'fa. Tsa'ma Jesúsja ccase su:

—Dusutssi'pa, majan tise an'bian'choma panshaen in'jan'da ñoa'me aiye'pa tsu tiseja Chiga a'ive daye. 25 Nane bove aiye'pambi tsu camello nojan'cco chango'ye panshañe. Ti'tsse aiye'pa tsu rico Chiga a'ive daye.

26 Qquen susi pañamba ti'tsse asi'ttaemba can'boen'fa. Asi'ttaemba tisupapora iñajampaña'fa:

—Tsa'caenda ¿majan tsu ccushaye'ja osha?

27 Tsa'ma Jesús tise'pama camba su:

—Aindeccuja osha'fambi tsa'caen tsoñe. Tsa'ma Chigaja osha. Nane Chigaja osha'choma oshacho.

28 Tsonsi Pedro afaye ashaemba su:

—Na'su, ingija pa'tssi tisu an'bian'choma catipa gi quei'ccu jacan'fa.

29-30 Tsonsi Jesúsja su:

—Ñoa'me gi su, majan a'i ñama in'jamba, va ccushaya'chone ñotsse condase'choma in'jamba osha'choma cati'ta ja'i tsu ñoa'me ti'tsse'tssia've isuya. Nane majan tise tsa'o, tise antiandeccu, tise yaya, tise mama, tise pushe, tise dushundeccuma, tise andema'qque cati'ta tsaja toya va andeni cansepa tsu injan'tsse isuya. Nane tsa'o, antiandeccu, mamandeccu, dushundeccu, andeve'qque ti'tsse tsu isuya. Toya'caen tsa'caen da'fasi cca'indeccuja tisema chi'gapa in'jangae tsincon'faya. Tsa'ma jai'ngae tsa chi'ga'cho tsu tsangae canse'pama isuya. 31 Nane tsain'bio majan ja'ño joccapitssiandeccuja utu'ccoe tsu da'faya. Toya'caen tsain'bio majan ja'ño utu'ccoandeqquiaja tsequi a'ta joccapitssia've tsu da'faya.

32 Tsaiqui'ye Jerusaléni ansunde jipa Jesúsja tisema shondosundeccuma o'tie jayi. Tise'paja asi'ttaen jayi'fa. Nane dyojo'tsse Jesúsma omboen jayi'fa. Tsonsi Jesúsja tisema doce shondosundeccuma ttu'sepa ccase ccani angapa tisuma ma'caen tson'faya'choma conda. 33 Qquen tsu su:

—Que can'faja. Jerusaléni gi jayi'fa. Tseni japa gi Sefaccone Ji'cho A'i indiyepa afeyeya Chigama afa'su nasundeccunga, Chiga manda'choma atesiansundeccunga. Tsendeccu tsu ñama fi'tti'faye mandapa israembindeqquianga ñama afe'faya. 34 Tsendeccu tsu ñama da'ñomba afa'faya. Tsomba ñanga attupoemba tsse'tsse'faya. Tsa'caen tsse'tsse nanimba tsu ñama fi'tti'faya. Tsa'ma papa gi tres a'tangae ccase qquendyaya.

35 Tsonsi Santiago, Juan (tsendeccuja Zebedeo dutssiyendeccu) Jesúsnga catsepa su'fa:

—Atesian'su, in'jan'fa gi que ingi in'jan'chove tsoñe.

36 Tsa'caen susi Jesúsja iñajampaña:

—¿Jongoesuve tsoñe qui in'jan'fa?

37 Tsonsi su'fa:

—In'jan'fa gi que na'suve dasi fa'eja que tansinfanga, faesuja que pavefanga dyaiye.

38 Tsonsi Jesúsja su:

—Jongoesuve tisu iñajan'chove que'ija atesu'fambi. ¿Osha'fa ti qui ña cui'ccuma cu'iqquia'caen vana'faye? ¿Osha'fa ti qui ña fetiye'chonga fetiyeqquia'caen vana'faye?

39 Qquen susi tise'paja su'fa:

—Osha'fa gi.

Tsonsi Jesúsja su:

—Ñoa'me ña cui'ccuma cu'iqquia'caen qui vana'faya. Ña fetiye'chonga fetiyeqquia'caen qui vana'faya. 40 Tsa'ma ña tansinfanga, ña pavefanga dyaiya'choveta ñajan antteye oshambi. Tsamajan antteya'cho majanga Chiga tayo in'jamba ñoña'chonga.

41 Qquen su'je'fasi faesu diez shondosundeccu pañamba Santiago, Juanma iyicca'ye'fa. 42 Tsa'ma Jesús tsendeccuma ttu'sepa su:

—Que'i in'janqquia'caen majan cocama na'suve dapa ti'tsse mandaye tsu atesu'fa. Majan ti'tsse ñoa'me'qque na'su tsu faesu bove'ccoama manda. 43 Tsa'can'faya'bi qui que'ija. Majan que'i'su ti'tsse na'suve daye in'jan'choja faesuma fuiteya'cho. 44 Que'i majan joccapitssia na'suve daye in'jan'choja poimbe sema'suve daya'cho. 45 Tsa'caen ñajan, Sefaccone Ji'cho A'ita gi faesuma mandaye jimbi. Nane faesuma fuiteye gi ji. Tisuma afepa poimbe shacama afepoeñe gi ji ccushaya'chone.

46 Tsomba napi'fa Jericó canqqueni. Napipa can'jenccapa Jesús, tisema shondosundeccu, tsain'bio a'i'qque tse'ttie sombopa jayi'fa. Jayi'fa'ni fae bini, tsaja Bartimeo qquen inisecho'cho, Timeo dutssi'ye, tsaiqui utufani dyai. Tse'tti dyaipa corifin'dima iñajan'jen, va'chapa. 47 Jesús Nasareno'su panshanjin qquen pañamba binijan fundopa su:

—Jesús, David Dutssi'ye, ñama mende'yeja.

48 Qquen fundo'jesi cca'indeccu tisema iyu'u'fa cuintsu ziyaye. Tsa'ma iyu'u'fa'ni'qque ti'tsse'e fundo'je:

—David Dutssi'ye, ñama mende'yeja.

49 Tsonsi Jesús ja ccutsupa su:

—Tisema ttu'se'faja.

Tsonsi japa binima su'fa:

—Dyombe jangipa jija. Queve tsu ttuse'je.

50 Tsonsi tise opoi'jema ttova catipa butto jangipa Jesúsnga catse. 51 Tise catsesi Jesúsja iñajampaña:

—¿Jongoesuve ña tsoñe qui in'jan?

Tsonsi binijan su:

—Na'su, atte'jeye gi in'jan.

52 Tsonsi Jesúsja su:

—Jaye qui osha. Tayo qui ccusha ñama in'jamba.

Tse'faei'ccuyi binijan atteye osha. Ccushapa Jesúsi'ccu tsaiqui'ye ja.