1 Nyiŋi Krisito abuupu mʋ fɛɛ ba bɩya bamʋ n‐yɩɩ kasɛ sa awuragyipu yɛ kɩbanɛ alʋnpʋ kɛ ba nu sa bamʋ, kɛ ba baa bee biti kɩdanbɩrasa kʋmaa kɩwaa, 2 kɛ ba man tɔwɛ asɩn libi gyaga ɔkʋ sʋ, amaa ba nyɛ keyuula yɛ abaa, kɛ ba baa bee su bɛɛ sa abaa, kɛ ba bɩya bamʋ n‐yɩɩ kasɛ sa ɔkʋmaa nɩmʋ.

3 Saŋa kʋ tɔ mʋ, anɛ gbaa anɛ an daa melensi, nɩɩ an waa kʋsʋ tɔ ɔlʋn, an fɔyɩ ɔkpa, nɩɩ an gyɛ anyɛ sa kɩgyagaa yɛ kayalaga kʋmaa nɩmʋ. Nɩɩ an sʋ kumu tɔ ɔlʋn yɛ kayɩɩ basa, nɩɩ bee kisi anɛ nɩɩ anɛ gbaa anɛ an kisi bamʋ. 4 Amaa saŋa mʋ nɩɩ anɛ Ɔmɔlɩgɛpʋ Ɩbwaarɛ mu kebiti yɛ mʋ kʋwɛɛ kuwu lɩɩ ifuli mʋ, 5 ɔ mɔlɩgɛ anɛ. Man gyɛ anɛ adanbɩrasa kɩwaa sʋ nɩɩ ɔ mɔlɩgɛ anɛ, amaa lɩɩ mʋ kʋwɛɛ kuwu sʋ nɩɩ ɔ bɔla mʋ Kayaayu mʋ nɩɩ kɩɩ fwɩɩ anɛ mʋ sʋ, sa anɛ kakʋʋgɛ pʋpwɛ yɛ nkpa pʋpwɛ mɔlɩgɛ anɛ. 6 Ɩbwaarɛ bɔla anɛ Ɔmɔlɩgɛpʋ Yesu Krisito sʋ sa anɛ mʋ Kayaayu Kyɩrɛkyɩrɛ mʋ gaa. 7 Saamʋ, lɩɩ mʋ kabwaala mʋ sʋ mʋ, anɛ ɩkpa i kyiigi mu ansi tɔ, kɛ a ba waa mʋ nkpa kakpaa mʋ nɩɩ an sʋ ɩmʋ tamaa mʋ agyipu. 8 Katɔwɛ nɩmʋ gyɛ kesintin nɩn. Nɩɩ n biti fɛɛ fu bwii pɩla asɩn nɩmʋ tɔ, kɛ bamʋ nɩɩ ba kɔɔlɛ Ɩbwaarɛ gyii mʋ, ba taa bamʋ n‐yɩɩ sa kɩdanbɩrasa kɩwaa. Falɛ atɔ nɩmʋ ɩ bʋrɔn gaa nɩɩ ɩ sʋ tɔnɔ sa ɔkʋmaa nɩmʋ.

9 Amaa lɛɛ fʋ n‐yɩɩ lɩɩ kimelensi ɩmɔɔrɛ‐libi tɔ yɛ kakʋʋgɛ tɔ nkyaga sʋ yɛ kamɔɔrɛ‐gyii yɛ nluu kʋkɔ lɩɩ nbara sʋ, lɩɩ fɛɛ ɩnɩmʋ ɩ gyɛ kɩyan nɩɩ ɩ man sʋ tɔnɔ kpini‐kpini. 10 Ɔsa mʋ nɩɩ ɔ bʋ fanɛ tɔ nɩɩ ɔ sʋ asa amu ɛɛ wɔtɛ abaa mʋ, tɔwɛ yii mʋ kɩlɩɩ kʋlʋn abɛɛ ɩlɩɩ ɩnyɔ. Nɩɩ ɔ man kan yɛgɛ mʋ, barɩgɛ fʋ n‐yɩɩ yɛgɛ mʋ. 11 Baa fii nyi fɛɛ kanɩn ɔsa maŋa alibi i gyii mʋ nfɛɛrɛ yɛ mu kumu, yɛgɛ mʋ gbaa‐gbaa nyi fɛɛ ɩmʋ nɩɩ ɛɛ waa mʋ gyɛ alibi.

12 N dan kan sun Atemasi abɛɛ Tikiku fʋ asɛ mʋ, waa aniya kɛ fʋ ba gyaŋa mɛ Nikopoli kadɛ tɔ, lɩɩ fɛɛ n waa mɛ nfɛɛrɛ fɛɛ n kpee tʋtɔ awɔɔ saŋa. 13 Waa kʋtɔ kʋmaa mʋ nɩɩ fɩɩ taalɛ, kɛ fʋ kyɛ Senasi mʋ nɩɩ ɔ gyɛ lɔya mʋ yɛ Apolosi tɔ, kɛ ba nyɛ kʋtɔ kʋmaa mʋ nɩɩ ki tiri bamʋ lɩɩ ɔkpa mʋ nɩɩ bee biti ba kpee mʋ. 14 Ɩ dagaa anɛ bɩrɩsa ana Krisito abuupu mʋ, ba bɩɩ kanan mʋ nɩɩ ba nyɛ saŋa sa kusun kɩwaa, kɛ ɩ kyɛ asa tɔ kɛ ba nyɛ bamʋ atɔ tirisa, kɛ ba man kyɩna kakyɩna mʋ nɩɩ kɩ man sʋ tɔnɔ.

15 Bamʋ nɩɩ ba bʋ mɛ asɛ nfɩɩ mʋ kpini bɛɛ fwaala fʋ. Fwaala ɔkʋmaa mʋ nɩɩ ee biti anɛ asɩn, nɩɩ ana bamʋ an bʋ kɩkɔɔlɛ‐gyii mʋ tɔ mʋ kpini. Ɩbwaarɛ kabwaala kɩ baa kɩ bʋ fanɛ asɛ.