7
Ɩsɩrayɩ abi ngbɩn kɩlɩfa
yɛ adɩna yɛ ana mʋ nɩɩ
Ɩbwaarɛ lɛɛ yɩla
yɛ adɩna yɛ ana mʋ nɩɩ
Ɩbwaarɛ lɛɛ yɩla
1 Ɩnɩmʋ kamaa mʋ, n wu Ɩbwaarɛ nbɔɔ ana, ba maa yɩlɛ kasɛ sʋ abaafʋn ntun nna ba kɩtaa abaafʋn ana afuu, kɛ ɩ man nyɛ funti kasɛ sʋ abɛɛ ɔpʋ sʋ abɛɛ iyu. 2 Nɩɩ n bɩla wu kabɔɔ kʋ maa lɩɩ kyɔwɛ ɔlɩɩkpa ɛɛ ba sʋsʋ, yɛgɛ ɔ sʋ Ɩbwaarɛ mʋ nɩɩ ɔ bʋ tɔ kakpaa mʋ kʋtɔ duligisa. Nɩɩ ɔ taa ɔbʋlɛ lala kuusi tɩɩ Ɩbwaarɛ nbɔɔ ana mʋ nɩɩ Ɩbwaarɛ sa bamʋ ɔlʋn yɛ ba nyita kasɛ yɛ ɔpʋ mʋ. 3 Nɩɩ ɔ tɔwɛ bamʋ yɛ, “Fan man nyita kasɛ abɛɛ ɔpʋ abɛɛ iyu, amɔɔ an duligi anɛ Ɩbwaarɛ asunpu bamʋ asɩkpɩɩ sʋ pɔyɩ.”
4 Nɩɩ n nu asa mʋ nɩɩ ba duligi bamʋ mʋ kɔnɔ. Ba bʋ ngbɩn kɩlɩfa yɛ adɩna yɛ ana lɩɩ Ɩsɩrayɩ nbunɔ kudu anyɔ mʋ kpini tɔ.
5 Gyuda kebunɔ tɔ asa ba bʋ ngbɩn kudu anyɔ.
Nɩɩ Ruben kebunɔ tɔ asa ba bʋ ngbɩn kudu anyɔ.
Nɩɩ Gadi kebunɔ tɔ asa ba bʋ ngbɩn kudu anyɔ.
6 Nɩɩ Asa kebunɔ tɔ asa ba bʋ ngbɩn kudu anyɔ.
Nafitali kebunɔ tɔ asa ba bʋ ngbɩn kudu anyɔ.
Manase kebunɔ tɔ asa ba bʋ ngbɩn kudu anyɔ.
7 Simeyon kebunɔ tɔ asa ba bʋ ngbɩn kudu anyɔ.
Lewi kebunɔ tɔ asa ba bʋ ngbɩn kudu anyɔ.
Isaki kebunɔ tɔ asa ba bʋ ngbɩn kudu anyɔ.
8 Sebulun kebunɔ tɔ ba bʋ asa ngbɩn kudu anyɔ.
Gyosefu kebunɔ tɔ ba bʋ asa ngbɩn kudu anyɔ.
Bengyamin kebunɔ tɔ ba bʋ asa ngbɩn kudu anyɔ.
Sakyɔ damantɛ
mʋ nɩɩ ba lɩɩ
ndɛndɛmandɛ
mʋ nɩɩ ba lɩɩ
ndɛndɛmandɛ
9 Ɩnɩmʋ kamaa mʋ n wu sakyɔ damantɛ kʋ, nɩɩ ɔkʋ mɛɛ taalɛ karagɛ bamʋ. Ba lɩɩ ndɛndɛmandɛ yɛ nbunɔ kʋkwɩɩ‐kʋkwɩɩ yɛ asa kʋkwɩɩ‐kʋkwɩɩ yɛ ntɔwɛ kʋkwɩɩ‐kʋkwɩɩ ba yɩlɛ kuwura‐gya mʋ yɛ Kabʋlʋpʋ mu ansi tɔ. Ba bun ɩbalɩmasʋ fufuli yɛgɛ ba sʋ abalaafa bamʋ abaa tɔ. 10 Nɩɩ ba taa ɔbʋlɛ lala bee kuusi bɛɛ tɔwɛ yɛ,
“Kamɔlɩgɛ gyɛ anɛ Ɩbwaarɛ
mʋ nɩɩ ɔ tɛ kuwura‐gya sʋ mʋ
yɛ Kabʋlʋpʋ mʋ lɛɛ.”
11 Ɩbwaarɛ nbɔɔ mʋ kpini ba yɩlɛ kyaabɔɔ kuwura‐gya mʋ yɛ abɩlɩsa mʋ yɛ atɔ‐kɩɩsa ana mʋ. Nɩɩ ba muŋa taa bamʋ ansi bun kasɛ kuwura‐gya mu ansi tɔ, nɩɩ ba sun Ɩbwaarɛ, 12 bɛɛ tɔwɛ yɛ,
“Amen!
Ayɩn‐bi yɛ bʋnyaa yɛ kanyaasɩn yɛ
afwaala yɛ bɛɛrɛɛ yɛ kɩtɩɩ kɩnyɛ yɛ ɔlʋn
ɩ gyɛ anɛ Ɩbwaarɛ lɛɛ kakpaa‐kakpaa!
Amen!”
13 Tʋtɔ nɩɩ abɩlɩsa mʋ tɔ ɔkʋ taasɛ mɛ yɛ, “Nɩɩ bamʋ nɩɩ ba bun ɩbalɩmasʋ fufuli nɩmʋ mʋ, anɩmʋ ana nɩn? Nɩɩ fɩnɛ nɩɩ ba lɩɩ?”
14 Nɩɩ n lɛɛ mʋ kɔnɔ yɛ, “Ɔbɩlɩsa, fu i nyi.”
Nɩɩ ɔ tɔwɛ mɛ yɛ, “Bamʋ ɩ gyɛ asa mʋ nɩɩ ba lɩɩ awʋrʋfɔ lala mʋ kigyii tɔ, nɩɩ ba fwɩɩ bamʋ ɩkaalɛ Kabʋlʋpʋ mʋ nkalan tɔ, nɩɩ i fuuli mʋ. 15 Ɩmʋ sʋ nɩɩ
ba yɩlɛ Ɩbwaarɛ kuwura‐gya mu ansi tɔ,
nɩɩ bee sun mʋ kakyʋwapɛ yɛ kagyanbwɛ mʋ osunkpa obu lala mʋ tɔ.
Nɩɩ ɔmʋ nɩɩ ɔ tɛ kuwura‐gya mʋ sʋ mʋ,
ee biti ɔ baa ɔ bʋ bamʋ asɛ kɛ o kun bamʋ.
16 Nɩɩ akʋn man bɩla yɛ ɔ kɩtaa bamʋ,
nɩɩ bʋlɩfɔ man bɩla yɛ ɔ kɩtaa bamʋ.
Nɩɩ kyɔwɛ man bɩla yɛ ɔ da bamʋ,
nɩɩ awulawula man bɩla yɛ ii wiili bamʋ.
17 Lɩɩ fɛɛ Kabʋlʋpʋ‐bi mʋ nɩɩ ɔ yɩlɛ kuwura‐gya mʋ nsana mʋ ii biti ɔ baa ɔ gyɛ bamʋ ɔkpapʋ.
Kɛ o kpiya bamʋ ɔbʋn kumu mʋ nɩɩ kɩ sʋ nkpa nkyu mʋ asɛ.
Nɩɩ Ɩbwaarɛ ii biti ɔ kpayɛ ansikyu kʋmaa lɩɩ bamʋ ansi tɔ.”