2
Yesu Krisito kelewu
oyu laasa sʋ mʋ asɩn
oyu laasa sʋ mʋ asɩn
1 Mɛ‐daa ana yɛ mi‐supu ana, n maa ba fanɛ asɛ ba lɛɛ Ɩbwaarɛ kesintin asɩn mʋ tɔwɛ fanɛ mʋ, n man taa kɔnɔ tɔ ɔkɔn abɛɛ kanyaasɩn kɩbansa nɩn ba tɔwɛ fanɛ. 2 Lɩɩ fɛɛ n waa mɛ nfɛɛrɛ saŋa mʋ nɩɩ n bʋ fanɛ asɛ mʋ fɛɛ, n mee biti n bɩla bɩɩ asɩn akʋ tɔwɛ tii Yesu Krisito, yɛ mʋ kelewu mʋ nɩɩ o wu oyu laasa sʋ mʋ nkʋn. 3 N maa ba fanɛ asɛ mʋ, n taa kɩpɔɔsɛ yɛ kufuu yɛ kɩkyɩkya gaa nɩn ba. 4 Mɛ asɩn tɔwɛsa yɛ mɛ abwaarɛsɩn kɩtɔwɛ mʋ tɔ mʋ, n man taa nyɩmɩsa kanyaasɩn pʋpɔlɛ fanɛ, amaa Ɩbwaarɛ Kayaayu mʋ ɩ lɛɛ mʋ ɔlʋn mʋ kaapʋ fanɛ. 5 Saamʋ, fanɛ kɩkɔɔlɛ‐gyii kɩ mɛɛ yɛ kɩ baa kɩ gyan nyɩmɩsa kanyaasɩn sʋ, amaa kɩ baa kɩ gyan Ɩbwaarɛ ɔlʋn sʋ.
Ɩbwaarɛ kanyaasɩn
6 Ɩnɩmʋ kpini gbaa mʋ, an tɔwɛ kanyaasɩn asɩn an sa bamʋ nɩɩ ba tɛɛ dan kɩkɔɔlɛ‐gyii mʋ tɔ mʋ, man gyɛ dulinyaa nɩmʋ tɔ kanyaasɩn, abɛɛ kɩmʋ alʋnpʋ kanyaasɩn mʋ nɩɩ bamʋ ɔlʋn mʋ ii biti ɩ ba fʋʋ ɔkaa mʋ. 7 Amaa kanyaasɩn asɩn mʋ nɩɩ an tɔwɛ fanɛ falɛ ɩ gyɛ Ɩbwaarɛ kanyaasɩn baalasa, mʋ nɩɩ ɔ wʋla ŋmina yɩla yɛ ee biti ɔ taa kanyaasɩn maŋa bʋnyaa anɛ, pɔyɩ nɩɩ o piili dulinyaa mʋ. 8 Nɩɩ dulinyaa nɩmʋ tɔ alʋnpʋ mʋ tɔ ɔkʋ man taalɛ bɩɩ kanɩn kanyaasɩn maŋa, nɩɩ ba daa bɩɩ nɩn, naafɔɔ ba man dɩn da Ɔnyɩrɩpɛ bʋnyaa wuya mʋ oyu laasa sʋ. 9 Amaa i du nɩn fɛɛ kanan mʋ nɩɩ ba kyʋrɔɔ waa Asɩnkyan yɩlasa mʋ tɔ mʋ yɛ,
“Kʋtɔ mʋ nɩɩ ɔkʋ ansi ɩ man pɩɩ wu,
nɩɩ asʋ ɩ man pɩɩ nu,
nɩɩ ɔkʋ man pɩɩ fɛ ɩmʋ nfɛɛrɛ mʋ,
ɩ gyɛ kʋtɔ mʋ nɩɩ Ɩbwaarɛ lɔŋɔ yɩla sa bamʋ nɩɩ bee biti mʋ mʋ.”
10 Amaa Ɩbwaarɛ bɔla mʋ Kayaayu sʋ lɛɛ mʋ kanyaasɩn baalasa mʋ kaapʋ anɛ. Ɩbwaarɛ Kayaayu mʋ ɩɩ mɛɛgɛ kʋtɔ kʋmaa nɩmʋ tɔ ɛɛ kɩɩ, halɩɩ Ɩbwaarɛ asɩn mʋ nɩɩ ɩ gyɛ mʋ ɔtɔ tɔ asɩn nɩɩ ɩ baala mʋ gbaa. 11 Ɔkʋ mɛɛ taalɛ bɩɩ nfɛɛrɛ mʋ nɩɩ ɔkʋ ɩɩ fɛ, amɔɔ mʋ gbaa‐gbaa mʋ. Kanɩn maŋa nɩɩ ɔkʋ mɛɛ taalɛ bɩɩ Ɩbwaarɛ nfɛɛrɛ, amɔɔ mʋ gbaa‐gbaa mʋ Kayaayu mʋ nkʋn. 12 Man gyɛ dulinyaa nɩmʋ tɔ kayaayu nɩɩ Ɩbwaarɛ taa sa anɛ, amaa Kayaayu mʋ nɩɩ kɩ lɩɩ Ɩbwaarɛ asɛ mʋ, nɩɩ an nyɛ, kɛ a taalɛ nu atɔ mʋ nɩɩ Ɩbwaarɛ taa kɛɛ anɛ mʋ kasɛ. 13 Ɩmʋ sʋ man gyɛ nyɩmɩsa kanyaasɩn asɩn kaapʋsa nɩɩ an sʋ an tɔwɛ fanɛ. Amaa ɩ gyɛ asɩn mʋ nɩɩ Kayaayu mʋ kaapʋ anɛ, fɛɛ kanan mʋ nɩɩ an lɛɛ Kayaayu tɔ asɩn mʋ kasɛ an kaapʋ bamʋ nɩɩ ba sʋ Kayaayu mʋ. 14 Amaa ɔsa kʋmaa mʋ nɩɩ ɔ man sʋ Ɩbwaarɛ Kayaayu mʋ, mɛɛ yɛ ɔ taalɛ kɔɔlɛ atɔ mʋ nɩɩ ɩɩ lɩɩ Ɩbwaarɛ Kayaayu mʋ asɛ mʋ kyula. Asɩn mʋ ɩ gyɛ amelensi‐sɩn sa ɔsa mʋ, ɔ mɛɛ yɛ ɔ taalɛ nu ɩmʋ kasɛ, lɩɩ fɛɛ Ɩbwaarɛ Kayaayu mʋ nkʋn ɩɩ yɛgɛ nɩɩ asa bee nu ɩmʋ kasɛ. 15 Nɩɩ ɔsa mʋ nɩɩ ɔ sʋ Ɩbwaarɛ Kayaayu mʋ bɩrɛ, ɛɛ taalɛ mɛɛgɛ kʋtɔ kʋmaa tɔ wu ɩmʋ tɔ, amaa mʋ gbaa‐gbaa mʋ lɛɛ bɩrɛ, ɔkʋ mɛɛ taalɛ mɛɛgɛ ɩmʋ tɔ wu sɛhn. 16 I du nɩn fɛɛ kanan mʋ nɩɩ ba kyʋrɔɔ waa Asɩnkyan yɩlasa mʋ tɔ mʋ yɛ,
“Anɩmʋ ɩ taalɛ bɩɩ Ɔnyɩrɩpɛ Ɩbwaarɛ nfɛɛrɛ?
Nɩɩ anɩmʋ ɩ taalɛ tɔwɛ waa mʋ?”
Amaa anɛɛnɛ bɩrɛ an fɛ nfɛɛrɛ kanan mʋ nɩɩ Krisito ɩɩ fɛ mʋ.