1 Paskwa hishta puncha kankapa ishkay puncha chayra pishirka. Pan mana punkichiskata mikuna punchakunapas kallarinkapa ishkay puncha chayra pishirka. Chasnapi pakrikunapa apukuna kwintariranakurka Dios ñupa uras killkachiska killkata kutillata killkakamakunawa imasnata Jesusma hawachinata usharinka hapichisa wañuchinkapa. 2 Paykunapura rimarinakurka:

—Hishta punchakunapi payta hapinkapa mana balinchu. Runakuna piñarisa ñukanchita wañuchinakunkachari— nisa.

3 Jesus Betania llaktapi karka. Simonpa wasipi kahurka. Chay Simon ñupa uras millay karachayu kaskarayku runakuna payta shutichinakurka —millay karachayu— nisa. Jesus Simonpa wasipi shukunawa parihu mikuranakuskapi shu warmi shamurka. Yapa bali suma asna nardu sisamanta wirayu alabastro* 14.3 Suma yura rumi kan, mana yapa sinchi. rumimanta rurariska butillashtuta apamurka. Jesus tiyaskama mayayasa butillashtu kunkata pakisa chay suma asna wirata Jesuspa uma hawapi talirka. 4 Maykankuna chayta rikusa, yapa piñarisa paykunapura rimariranakurka:

—Imaraykuta chasna yanka hichan chay yapa bali suma asna wirata. 5 Ñukanchi rantichinata ushanchima karka kinsa pacha puncha yali trabahasa ganaska tupupi, chay kullkiwa mana imayu runakunata yanapankapa— nisa chay warmita piñanakurka.

6 Chasnapi Jesus rimarka:

—Ama kay warmita pinkachisa rimaychichu. Kushilla kankapa sakichi. Ñuka alipa rawarka. 7 Mana imayu runakuna tukuy uras kankunawa kanakunmi, kankuna munaska uras paykunata yanapanata ushankichi. Ranti ñuka mana tukuy uras kankunawa kashachu. 8 Kay warmi pay ushaska tuputa rarka. Ñuka wañupi ñukapa ayawa rurana kaskata ñuparisa ñuka aychata chay suma asna wirawa armachirka. 9 Alita uyawaychi. Tukuy partipi ñukamanta kushi shimita kwintanakupi kay warmimanta yuyarisa pay raskata kwintanakunka.—

10 Jesus yachachiskata chunka ishkay katikamakunamanta shuka, Queriot llaktamanta runa Judas, pakrikunapa apukunapama rirka. Paykunawa kwintarisa —ñuka Jesusta hapichisha— nirka.

11 Pay rimaskata uyasa pakrikunapa apukuna kushiyanakurka.

—Kan payta hapichipi ñukanchi kullkita kanma kurinka— rimanakurka.

Chay urasmanta Judas yuyarisa kawsarka —ima puncha, ima uras ali kanka Jesusta hapichinkapa— nisa.

12 Pan mana punkichiskata mikuna hishtapi punta puncha borreguta wañuchina uraspi Jesus yachachiskata katikamakuna payta tapunakurka:

—Maypita munanki ñukanchi Paskwa mikunata alichinkapa.—

13 Tapunakupi Jesus pay yachachiskata ishkay katikamakunata kasna nisa mantarka:

—Jerusalen llaktama richi. Chaypi shu yaku mankata apa runata tupankichimi. Payta katichi. 14 Pay yaykuraska wasipi chayllapita yaykunkichi. Chay wasi amuta ninkichi: Ñukanchita yachachikama kanta tapun: Maypita mikuna kwartu kan ñuka yachachiskata katikamakunaynti Paskwapi borreguta mikunkapa nisa. 15 Pay hawa patapi shu hatu kwartuta kankunata rikuchinkami tukuy ñukanchipa minishtiskakunawa. Chaypi mikunata alichinkichi.—

16 Chasna Jesus rimapi chay pay yachachiskata ishkay katikamakuna rinakurka. Jerusalen llaktapi paktasa tukuy Jesus rimaskashina tupanakurka. Chayllapi Paskwa mikunata alichinakurka. 17 Tutayapi Jesus pay yachachiskata chunka ishkay katikamakunaynti chayma rinakurka. 18 Paykuna mesa muyukta siririsa shu parti makiwa nitirisa mikuraskapi Jesus nirka:

—Alita uyawaychi. Kankunamanta shu ñukawa mikura ñukata hapichinkapa rahun wañuchiwankapa.—

19 Chayta uyasa pay yachachiskata katikamakuna yapa llakirinakurka. Karan shuk shuk Jesusta tapunakurka:

—Mana yuyarinki ñuka kanta hapichi kaskata, manachu— nisa.

Chupi mesapi shu kallana tiyarka. Chay kallanapi lapayachiska mikuna tiyarka paykuna mikuna panta hukuchinkapa. 20 Chasna kapi Jesus kutipasa nirka:

—Kankunamanta shukmi kan. Ñukawa parihu panta kallanapi hukuchi runa ñukata hapichimi kanka. 21 Kay Dios mantamuska runa wañuchi tukuna kani Dios ñupa uras killkachiskashina tukunkapa. Ranti ¡aylla chay ñukata hapichi runa! Yapa ñakarinkami. Ali kama karka chay runapa mama mana payta pakarichinma karka.—

22 Mikuranakupi Jesus mikuna panta hapirka. Diosta pakrachusa panta pakisa paykunama kurka:

—Hapichi, kay pan ñuka aychashinami kan— nisa rimarka.

23 Washa shu basuta hapirka. Diosta pakrachusa paykunama pasachirka. Tukuy paykuna upyanakurka. 24 Chasnapi paykunata nirka:

—Kay vinu ñuka yawarshinami. Ñuka wañupi yawar shuturinarayku achka runakuna paykunapa huchakunamanta pichay tukuska kanakunka. Chaywa Dios paktachinkami —runakunawa wankurisha— nisa rimaskata. 25 Alita uyawaychi. Vinuta ña mana kuti upyashachu kay pachapi. Ranti shu puncha ñuka Yaya mushu pachapi tukuypa apu kahuskapi kuti kankunawa parihu mushu vinuta upyashunchi.—

26 Jesus chasna rimaskawasha Paskwa mikunata kantasa tukuchinakurka. Chaywasha Olivos† 14.26 Olivos wayuyu tarpu kaspi yurakuna chay urkupi wiñaskarayku chay urkuta shutichinakurka Olivos urku. Olivos wayuta kachi yakupi churasa aceituna rimanakun. niska urkuma rinakurka.

27 Jesus pay yachachiskata katikamakunaynti Olivos urkupi paktaskapi paykunata rimarka:

—Dios ñupa uras killkachiskapi kasna riman:

Chay killkapi rimaskashina kuna tuta tukuy kankuna —yankamanta paywa sinchikuskanchi— nisa ñukata sakiwankichi.

28 Ranti ñuka wañuskawasha Dios kawsachiwankami. Kawsachi tukusa ñuka kankunata ñupasa Galilea allpama risha.—

29 Pedro chayta uyasa nirka:

—Tukuykuna kanta sakinakupipas ñuka kanta katishami.—

30 Jesus payta nirka:

—Alita uyaway. Kuna tuta kari wallpa chayra ishkay kuti manara kantapi kan ñukamanta kinsa kuti rimanki: —Payta mana riksinichu— nisa.—

31 Pedro kuti rimarka:

—Kanwa parihu ñuka wañuna kapipas kanta hichusa mana sakiskankichu.—

Tukuy shu katikamakunapas chasnallata rimanakurka.

32 Jesus pay yachachiskata katikamakunawa kwintarisa riranakuskapi tarpuska wayu kaspi yurakuna kaskama paktanakurka, Getsemani niskama. Jesus pay yachachiskata katikamakunata nirka:

—Kaypi tiyaraychi, ñuka Dioswa kwintarikrinkapa rahuni.—

33 Chasna nisa Pedrota, Santiagota, Juantapas pushasa chaynishtuma rirka. Shunku chukchukta llakirisa sinchi manchay Jesusta hapirka. 34 Chasna tukusa nirka:

—Shunku llakiriskawa sinchiyanayapi wañunkapa rahuskashina tukuskani. Kankuna kayllapi Diosta mañasa sakirichi. Ama puñunkichichu.—

35-36 Jesus chaynima risa allpama shitarisa Diosta mañarka usharipi sinchi ñakarina paktamunkapa rahuskamanta payta kishpichinkapa. Kasna nisa mañarka:

—Yaya, kan tukuyta ushanki. Ñuka sinchi ñakarinkapa rahuskamanta kishpichiwanki. Ranti ama ñuka munaskashina rurarichu, kan munaskashina tukuchu.—

37 Chasna mañaskawasha kuti kinsa sakiska pay yachachiskata katikamakunapama risa puñuraskata tuparka. Chasnapi Pedrota ñupa shuti kaskawa rimarka:

—Ay Simonlla, puñurankichu. Manachu usharkanki shu urallapas Diosta mañasa chapawankapa. 38 Mana puñusa Diosta mañaychi huchata ranayaskata mana rankapa. Kankuna ali munaywa kasapas mana huchalinkapa yapa sampa kankichi chay munaskata paktachinkapa.—

39 Chasna nisa Jesus kutillata Diosta mañankapa rirka. Ñupa mañaskashina kuti mañarka. 40 Kuti mañaskawasha chay kinsa pay yachachiskata katikamakuna kaskama paktasa paykunata kuti puñuraskata tuparka. Yapa puñunayaywa kanakusa kuti puñuska kanakurka. Jesus paktapi kawsarisa imata rimankapa mana yachanakurkachu. 41 Kinsa kuti risa kinsa kuti paykunapama shamusa pay yachachiskata katikamakunata nirka:

—Chayra puñurankichi. Chaykamalla karka. Ura ña paktariskami Dios mantamuska runa hapi tukunkapa. Huchasapa runakunapapi kuy tukushami. 42 Hatarichi. Hakuychi. Ñukata hapichikama runa ña shamuran.—

43 Jesus rimaraskapi Judas shamurka. Pay chunka ishkay Jesus yachachiskata katikamakunamanta shu karka. Paywa parihu shu runa bula kaspikunawa ishkay partimanta filuyu sawlikunawa shamunakurka. Pakrikunapa apukuna, Dios ñupa uras killkachiska killkata kutillata killkakamakuna, ñukanchi Israel runakunapa kamachi rukukunapas chay runa bulata mantanakuska karka. 44 Manara paktapi Judas paykunata rimaska karka:

—Ñuka muchana runa kankuna maskaska runami. Payta hapisa alita watasa pushankichi.—

45 Chasna kapi Judas Jesusma mayayarisa —Yachachikama— nisa payta mucharka.

46 Judas chasna muchaskawa Jesus kaskata riksichipi chay runa bula Jesusta hapisa pushanakurka. 47 Jesuswa kaskakunamanta shu runaka ishkay partimanta filuyu sawlita hapisa pakrikunapa hatun aputa yanapa runata kishpilla kuchusa paypa nikrillata pitirka. 48 Jesus chay runa bulata nirka:

—Shuwa runachu kani, kankuna kaspikunawa, ishkay partimanta filuyu sawlikunawa ñukata hapi shamuwankapa. 49 Karan puncha kankunata yachachisa Diosta mañana wasipi kankunawa parihu karkanimi. Chaypi kaskapi mana hapiwarkankichi. Kuna chasna hapi tukunimi Dios ñupa uras killkachiskashina tukunkapa.—

50 Chasna rimapi Jesuswa parihu kaskakuna payta sakisa kallpasa mitikunakurka. 51 Shu malta runa katanawa pilluriska Jesusta katisa rirarka. Paytapas hapinakurka. 52 Chasnapi katanata sakisa llushpirisa llata kara kallpasa mitikurka.

53 Jesusta pakrikunapa shuklla hatun apupama pushanakurka. Chaypi pakrikunapa apukuna, ñukanchi Israel runakunapa kamachi rukukuna, Dios ñupa uras killkachiska killkata kutillata killkakamakunapas munturisa chapanakurka. 54 Pedro karumanta katisa pakrikunapa hatun apupa wasikunawa muyukta kaska chusha pampapi yaykurka. Chaypi kuyrakamakunawa parihu nina mayapi tiyarikrirka kununkapa. 55 Pakrikunapa apukuna tukuy shu apukunaynti ñukanchi Israel runakunapa apukuna munturina bulamanta, Jesusta wañuchinata munasa maykan payta hawachisa rima runata maskanakurka. Ranti mana tupanakurkachu. 56 Achka runakuna llullasa Jesusmanta rimanakupipas mana parihumanta rimanakurka. Paykuna rimaska karan laya karka. 57 Puchkaypi mayka runakuna llullasa paymanta kasna rimanakurka:

—Ñukanchi uyarkanchi pay kasna niskata: 58 —Ñuka tulachishami kay runa raska Diosta mañana wasita. Kinsa punchapi Diosta mañana wasita rurashami, mana runa raska laya wasita— nisa.—

59 Chasna rimanakusapas paykuna kwintaskakuna chikan laya kanakurka.

60 Chasna kapi pakrikunapa hatun apu tukuykuna ñupapi shayarisa Jesusta tapurka:

—Kanta hawachisa rimaskata uyasa manachu imata rimanki.—

61 Ranti Jesus chunlla uyarka. Pakrikunapa hatun apu kutillata payta tapurka:

—Kanka ñukanchi chaparaska Dios mantamuska kishpichi runachu kanki. Diospa Churichu kanki.—

62 Jesus kutipasa nirka:

—Ari, ñukami kani. Shu puncha ñukata, kay Dios mantamuska runata kuti rikuwankichi. Yapa ushayu Diospa yacha maki partima tiyaraskata rikuwankichi. Puyukunawa shamurata rikuwankichi.—

63 Chayta uyasa pakrikunapa hatun apu yapa piñarisa paypa hawa churariskata likirka piñariskata rikuchinkapa. Chasna rasa nirka:

—Kuna shuti ña mana shukta minishtinchichu pay mana ali raskata rimakamata. 64 Kankunalla pay Dioswa parihu kanayasa Diosta piñachina rimaskata uyarkankichi. Imatata ninkichi.—

Tukuykuna shu yuyayllawa rimanakurka:

—Pay wañuchi tukuna kan.—

65 Mayka runakuna payta tyukankapa kallarinakurka. Paypa ñawita tapasa payta makasa rimanakurka:

—Rimay, pita kanta makaran.—

Chaypi kuyrakamakunapas payta makaranakurka.

66 Jesus makay tukuskapi Pedro wasikunawa muyukta kaska chusha pampapi tiyararka. Chasnapi pakrikunapa hatun aputa shu yanapa warmi shamurka. 67 Pedro nina mayapi kunuraskata rikusa alipacha paypama rikurka. Washa payta nirka:

—Kanpas chay Nazaret llaktamanta Jesuswa purira karkanki.—

68 Pedro nirka:

—Chay runata mana riksinichu. Imamantachari kan rimawanki mana yachanichu.—

Chasna nisa wasikunawa muyukta kaska chusha pampamanta llukshinama riska, wasikuna mayapura kaska chupi chupima. Yaykuna chimpapura punkukuna chupipi shayarikrirka. Chasnapi kari wallpa kantarka.

69 Chay yanapa warmi Pedrota kuti rikusa shu chaypi tiyakunata rimarka:

—Kay runa chay hapi tukuska runawa purikunamantami kan.—

70 Pedro nirka:

—Mana paywa purikunamantachu kani.—

Shukratuwasha chaypi kaskakuna Pedrota rimanakurka:

—Shutipacha kan Jesuswa purikunamantami kanki, Galileamanta runa kaskarayku.—

71 Pedro piñarisa rimankapa kallarirka:

—Ñuka llullasa rimapi Dios kastigawachu. Shutipacha mana riksinichu chay runata, maykamantami kankuna rimarawankichi.—

72 Chay urasllapita kari wallpa kutillata kantarka. Chayta uyasa Pedro Jesus rimaskata yuyarirka: “Kari wallpa ishkay kuti chayra manara kantapi kan ñukamanta kinsa kuti rimanki —payta mana riksinichu— nisa.” Chayta yuyarisa Pedro yapa wakankapa kallarirka.