2 FITA
2 Fitan Vuak Amur
E Fitar una madu fas igi isoime e ma vierafejo iji bu dab ataseme ar iror igia karioinva iji nijiain. Ijefuon Fita fu fas igi isoime vuak ju kuardiain ijefuon maiji e roin bu vuak kufui kuaivo ga vuak isema kuaime kuai Jesu fuba una ruakno kuaiv. Ijefuon Fita fu e iji ma vierafejo iji Jesuon vuak ma iji nijaidiainkin buka giriesa ireme ma vierafek. Regavo Jesu fu irerafuon tavan fuon fu una ruakfuon iji abe biom vako ijefuon maiji God fu vierafe e fok buka oi karoiga rad Jesu fuson ruak.
2 Fitan vuak kafokafo fu isoinma ijin
1:1-2 E Fita fu e iji God ma vierafejo anadiainma ijin.
1:3-15 Godri no imut bijuome kenma ijefuon fu vierafe no koiknuvuon kege una fu vajakfuon ijin.
1:16-21 E iji Godon vuak vierafene kuaivo ijigam afasor iji bu Jesusina kuainva iji buka vuak ma ijesugin kuaivo ijin.
2:1-22 E vuak kufui meoijo ijiebuon Fita fu vuak ju kuardiainma ijin.
3:1-18 Jesu fu una rokon ijin.
1
1 Na Saimon Fita afasor Jesu Kuraison ikrejo nar fas igi isoime e iji ja ma vierafejo besum igi no abenva ijekin iji ja abenva iji ja nijiav. Regavo ma vierafejo nuvuon fuka ma irerag igekin iji Jesu Kurais God nuvuon fu e karauniamo iji ga e ka maturain ga e mukor ijefuon duadok ijia abe muin. 2 Ijefuon na sirimamega ja God ko Jesu Kurais E Bomana nuvuon ijiebuon unam iji vierafega God fu tavan bog ja ma rediame mukorigia ifejdiame samuagdiaga ja afuime karikfuon.
Godri ja imut bijame kenma ijefuon ni uri unam fuon ijia keof
3 Regavo no God ma vierafenva ijefuon fu daro ijia ire fok no kege moikigia unam iji God fu oimaike no ma karivakfuon iji fun vajuin. Regavo fur no kumenmado no sanainma fuon ga unam ma iji mukoi fu fino iji fateroin abe karij. 4 Regavo sanainma fuon ijeko daro fuon ijiebuon duadok ijia fu e God ma vierafejo iji ire ma iji fu vajuokafa kuinma iji fun kege vajuin. Fu ijegrenkin e iji moikigia ise vierafeknum reoijo iji buba no kege arafiruokfuon revo bu arega no unam ma fuon iji fateroin abene vo izeg fu fino no madu ijeg kariokfuon.
5-7 Regavo God fu ijegrenma ijefuon ja giriesame fu ma vierafeknum mukorigia akai karif. Regavo madu nika God irerag fu vierafenma iji vierafef. Regavo jaka vajai jon fu oimaikro ja vierafene reoijo ijia mukorigia samuanamikfuon. Tavan ise oi fiaigin iji roga jaka giriesame ma vierafef. Regavo kaifjon bu God ma vierafejo iji oijmiaf. Regavo jaka Godon unam ma ijia karioknum e fok mukorigia oijmiaf. 8 Ja ire fok na kuardiainva iji mukorigia tavan bog mimatame rega bu oijon ijia ofrene uruvana rek. Ja ijegrekva jaiji ja E Bomana Jesu Kuraison e mukor ik rejo ijin rek. 9 Regavo e be erar ba unam iji kegoino iji fu e iji ni fuon fuka nakin vo zuriainma ijekin. Ijefuon fu izeg Kurais fu guame ise fuon somdainma iji game vierafekma bakin.
10-11 Ijefuon efnun nika giriesame Godon unam ma iji na kuainva iji vierafene mimatame reoga e bu iji giame vierafero jaiji ja e kafo Godri kumene ja karauniamga ja efuon renro bu ijeg vierafek. Regavo ja tavan bog ijegrejknum okva ja zazaime una ise kafo rekva bakin. Regavo rad ja aoikva E Bomana Jesu Kurais e iji fu e fok karauniamo ijar ja oimarknum anadiame aferdia ar fuon maiji fu samuamo iji tavan bog ijia karivako ijia uniak.
Irerag bu nijaidiainva iji tavan bog vierafekfuon ijin
12-13 Vuak igi na kuardiavo iji jan amur vierafene giriesa uruvana mimatame kegoijo na iji una kuardiav. Regavo ik iji fu nun ijefuon na vek nivek fijo ijia na giriesa ja soisoime kuardiaga ja ire ijin mukorigia vierafekfuon. 14-15 E Bomana Jesu Kurais fu na iviakma igef guakfuon iji fun samakaf nijaidien. Ijefuon na giriesame unam igi nijaidiaga ja vierafekin na guaga ja ire iji jaba rubdiakfuon.
E iji Jesu Kuraison sanainma iji gainva ijin
16 Regavo tavan iji no kuardiame kia Jesu Kurais fuka ma e darokin ga fu darokma una moikigia ruakfuon iji no vuak kufui iji kuardiainva bakin. Regavo vuak iji noka vuak ma ijin kuardiav ijefuon maiji no ni nuvuon ijia daro fuon ga ma fuon iji non giain. 17-18 Regavo tavan iji God fu Farifuon abe aroi vo sanainma fuon fu abe uruor akaij ijia mainma iji no funa ijia irekoga fu abe main. No ada nuvuon ijia Godon ir darokin iji fai fu kume, Farinun besum iji naka fuon bomana oimarvno kumen.
19 Ijefuon noka iviakma giriesame e Godon vuak vierafene kuaivo iji bu usuibe kuainva iji ma vierafekfuon. Regavo jak jaka vuak iji giriesame mukorigia vierafef. Ijefuon maiji vuak iji fu ire ikuosaij iji ar nakinma ijia sanamo ijekin. Regavo vuak ijar fu ja ifejdiaga ja unam ma ijiga ise iji giaknum karivake tavan bomana iji fu ruakfuon. Regavo Jesu Kurais fu ire mujur iji tavan afarekrega fu ajiemo ijekin. Ijefuon fur oijon ijia saname ifejdiaga ja ire fok God fu reno iji mukorigia giame vierafek. 20-21 Regavo ire iji ka ma bomana mukor iji vierafekfuon iji igin. E iji Godon vuak abe e nijaidiaoijo iji bu Godon Kaven ijar ifejdiaga bu kuaimoin. Regavo e besum be fu erar daro fuon ijia ire iji rad rekreno ijefuon ma iji nijaidiakma bakin. Regavo e iji Godon vuak abe kuaimoijo buba vuak kafo daro buon ga oibuon ijia vierafene nijaidiaoinva bakin revo fun Godon Kaven ijar bu ifejdiaga bu Godon vuak iji nijaidiaoin.