2 JON
2 Jonon Vuak Amur
No vierafe Jon e iji fu fas amur isoinma ijar una fas igi isoin. Regavo fas iji fu isoime bara ijiga afijaf iji nijiain. Regavo vuak iji no vierafe fu isoim e sos fok nijiame ijeg kuain. Regavo vuak fu isoinma ijefuon anej iji Jesu fu ruainma fu e kaven rene ruainma bakin revo fu ma God ga ma ema ijar ruain. Ijefuon e iji eraneb ba vuak igi ma vierafenva iji bu God ma vierafejo bakin.
Jonon vuak kafokafo fu isoinma ijin
1:1-3 Fu e ma vierafejo iji anadiainma ijin.
1:4-6 Oijmanamivo ijefuon vuak ijin.
1:7-11 E vuak kufui nijaidiaoijo ijiebuon vuak ju kuainva ijin.
1:12-13 Vuak radkma ijin.
1
1-2 Fas igi e sos samuamo ijar isoin. Fas igi na isoime bara be ijiga afijaf na mukoi oijmiavo iji nijiain. Na nunkua ja oijmiavo bagavo e kafo bu God mukoi vierafejo iji buk ja oijmiav. Ijefuon no vierafe Godon vuak ma iji fu oinuvuon ijia namo iji fuka tavan bog nona navak.
3 Ijefuon no una God Asoij ijiga Farifuon Jesu kiaga bu ise iji no reoijo iji guome areknum vo ma reduome ifejduoga no afuime karik. Regavo bur tavan bog no ifejduoga no unam ma iji vierafeknum e oijmiak.
Unam ma ijiga oijmanamivo ijiebuon vuak ijin
4 Naka uruvana oimadiem ijefuon maiji afon roin buka Asoinuvuon fu kuarduinma ijeg buka unam ma ijia karioij. 5 Ijefuon bara maigure na a kuav. Noka nakikmazak uri kaifnuvuon oijmiak. Regavo vuak igi na isoim nijavo iji fu iviamkor bakin revo vuak iji non usuibe faime ruain. 6 Regavo oijmanamivo ijefuon anej ma iji irerag? Oijmanamivo ijefuon anej ma iji no vuak fok God fu kuarduomo no iji faim igiak. Regavo Godon vuak iji no ik anej ijia fainva iji fu ijeg kuai, Ni tavan bog oijmanamiknum karifno kuain.
7 Regavo e uruvana bu moikigia e roin biesia ruain. Regavo e iji bu ruainva iji bu usem e roin kia Jesu fu ma ema bano kuain. E iji ijeg kuaimja ruainva iji bu e roin biesiamoij ijefuon buiji bu Jesu uzav. 8 Ijefuon ni koikjon mukorigia samuanamiknum of. Regavo irerag ma iji ja Godon renva iji mukoi vierafekin God fuson rad unam ma iji jon rekfuon.
9 Erar fu Jesu Kuraison vuak iji faimvo una vuak kufui kafo faime reoinon e iji God fu oifuon ijia fino bakin. Regavo erar fu Jesuon vuak iji faime mukorigia reoinon e iji God ko Farifuon Jesu bun oifuon ijia kariknum vo tavan bog funa oij. 10 Regavo e kafo bu Jesuon vuak iji bu bakin revo bu vuak kafo nijaidiakva jab karine vuak buon mukoi faik. Regavo bu ar on ijia ajiekva ni kuriairemne revo ab anadiaknum bu aferdiak. 11 E iji bu ise reoijo ijefuon erar fu bu anadiame aferdia ar fuon ijia ajiemo e iji fun unam ise iji bu reoijo iji ifejdiame reoin.
Vuak radkma ijin
12-13 Na vuak fok kuardiakafie vierafen revo vuak iji na fas igia naba isoim nijiak. Nason koiknu vua ja karinva ijia kekome jana vuak iji kuaim oimarek. Vuak nun nan igia durev revo uviaifnun ijiebuon afijaf iji bu ja anadiav. Fun ijin.