9
Pol Xa Maskalus Pana Aubina Zina Amun Judaa
1 Ga piaat a dorang faaratunaan angkari lamarana Kaarisito, xawit ga vaagit. Ma a Laklagaai a Raabu varaxai wana a maskaagu di rudaxa varaxai iaa adu a dorang kari xa vaaratunaan: 2 A maskaagu xa maravan marazaat ma xawit gat siaavus pana maskaluzang. 3 Avuna tamon nia gat faraxas, ga saxot gana xul aubina zurugu, amun paliaanugu amun Judaa, xuna Nakmai xana zaxot faulin naandi ma xana rasin a puxaaiang iwana aikilizang sin naandi wana nia ma xana kip pizin nia ziaana Kaarisito. 4 Zax 4:22Naandi amun Israael. Nakmai xa ra kalin naandi xuna balazang amun gogon faabulus sina. A marmari daxaiang sina xa iziar lawalaua naandi, ma xa ra giu a rudaxaiang faraxai wana naandi, ma xa ra lis amun Lus sin Moses sin naandi, ma xa ra vatangin sin naandi a lan iwana lotu la vaal xoxok, ma xa ra dadorin amun kalxalang sin naandi. 5 Naandi amun natnaat sin Aabaraam ma Aaisaak ma Jekop. Ma araan a Mesaaia xa balas axastunaan, naan sin naandi ma naan a Mesaaia, ma naan nanga Nakmai, ina xa ratasin a lus laaxur wana amun saan faakdul. A wisfaaruiang ka uzaa zina bulaai. Ka vaaratunaan.
A Gigiuang Sin Nakmai Wana Amun Israael
6 Singsaxai, a dorang sin Nakmai xawit na zuaai a gof pana amun Israael. Avuna xawit aubina vaakdul zin amun Israael naandi amun Israael vaaratunaan lamarana Nakmai. 7 Ma amun natnaat sin Aabaraam, kawit naandi vaakdul a funalik faaratunaan sin Aabaraam, kawit. Nakmai xa piaat sin Aabaraam naako, “Naandi be ina di balas sin Aaisaak, dina vakilaan naandi amun natnaat sunum.” (Var 21:12)
8 Kawit naandi vaakdul ina di ra balas pana a daraaia Aabaraam, di vakilaan naandi a funalik sin Nakmai, xawit. Naandi be ina di luk naandi lamaskana a xalxalang sin Nakmai, di raamin fakilaan naandi malasing amun natnaat faaratunaan sin Aabaraam. 9 A xalxalang sin Nakmai xa malasing kari, “La raan mase xa tak, gana uli wat ma Seraa xana rauxin a nalik tapti.” (Var 18:10,14)
10 Ma xawit naanaan be, Rabekaa xa luk a lua ma Aaisaak a xulmua zin dia, naan damana nandiaa, 11-12 singsaxai araan Rabekaa xawit nanga na luk nandiaa, Nakmai xa vazei Rabekaa naako, “A nalik ka balas paamua xana vaamuzas aaxan a nalik ka balas lamur.” (Var 25:23)
A dorang kanaan ka wat araan uru nalik kawit nanga di ra giu iaa ta daxaiang o ta raksaatang. Nakmai xa ra giu malasing kanaan kuna ainaxamang sina ina naa ra nol rasin kana iziar, xawit lalozang tazaan naadi ra giu iaa. 13 Ka malasing a Baar Xoxok ka piaat malasing kari, “Nia ga sasaxot Jekop, singsaxai ga maska raksaat pana Esaau.” (Maal 1:2-3)
14 Malasing ma dina piaat aze? Iaak dina piaat adu amun matmalabuk Nakmai xa giu xawit na tak aan? Kawit mase! 15 Avuna Nakmai xa piaat sin Moses naako,
“Nia gana maluf axazak ina ga saxot gana maluf naan,
ma gana lis a maskaagu zin axazak ina ga saxot gana lis sina.” (Zax 33:19)
16 Malasing ma araan Nakmai xa giu malasing kanaan, kawit naa giu wana sasaxotang sin axazak angkanaan o wana ta vaamuzazang naa ra giu, xawit. Singsaxai wana varamaaluvang sin Nakmai nanga. 17 Avuna lamaskana Baar Xoxok Nakmai xa piaat malasing kari zin Paaraao la pira Ijip naako, “Ga rasin nua ma gu balas a xalxaal xuna vatanginang a dikdikang surugu wana nua ma xuna pitfiaatang aizinugu lamun non faakdul ila pira angkari.” (Zax 9:16)
18 Malasing ma Nakmai xa maluf axazak ina naa saxot naana maluf ma xa vadikdik a maskana axazak ina naa saxot naana vadikdik a maskana.
19 Ma iaak taxazak sinim kana iaari zurugu naako, “Tamon ka malasing kanaan, kunaze nanga naan ka vakor aubina wana amun matmalabuk taksaat sin naandi? Avuna xawit taxazak kat faraxas kana ruxol a sasaxotang ma ainaxamang sina.” 20 Singsaxai nua axastunaan, nua nis kuna naxaamang adu guna dador zuaai Nakmai? “Araan axazak ka giu azaan, malasing faa, azaan angkanaan ina naa ra giu, xat faraxas kana piaat faulin sina ina xa ra giu naan naako, ‘Kunaze gu giu nia malasing kari?’ ” (Aais 29:16, 45:9)
21 Araan a rapti iwana gigiuang amun sopen kat faamuzas, naan nanga xat faraxas kana giu aze razaan pana a pira ina naat gigiuang amun sopen. Tamon ka saxot kana zuruk a vang pira azaxai ma xana giu a sopen azaxai xuna amun flangan laba ma aza sopen kuna amun taan palaau, naan kana los a sasaxotang sina nanga.
22 Malasing saait bani, Nakmai xa kalin fanong a raan ina naan kana vatangin a boromaazikang sina ma a dikdikang sina, singsaxai la notaan angkari naan kat simbong daxa mase wana aubina ina naan ka boromaazik pana naandi ma xa nimniman kuna vanong pizinang naandi. 23 Naan ka gigiu malasing kanaan kuna vatanginang adi marmari daxaiang sina xa bas pakluaai zin naandi ina naa ra maluf. Naa ra nimnimanin naandi waamua nanga xuna iziarang lamaskana marmari daxaiang sina. 24 Nis naandi? Dia be, ina naan ka ra viring luk saait. Kawit sin amun Judaa be singsaxai zin aubina xawit amun Judaa zaait. 25 Ka malasing a dorang sin Nakmai lalozang aubina xawit amun Judaa, ina profet Osiaa xa ra varaar naako,
“Aubina xawit surugu, gana vakilaan naandi aubina zurugu.
Aubina ina xawit ga sasaxot naandi,
gana vakilaan naandi aubina ga sasaxot naandi.” (Osi 2:23)
26 Ma Osiaa xa piaat saait naako,
“La non angkanaan mase ina waamua Nakmai xa ra piaat naako,
‘Nim kawit aubina zurugu,’
dina vakilaan naandi,
‘A funalik sin Nakmai xa roro.’ ” (Osi 1:10)
27 Singsaxai lalozang amun Israael, Aaisaaia xa viraai laba naako,
“Naapalaau amun Israael di varas marazaat malasing a xon i laxon,
Nakmai xana zaxot faulin be xawit faras.
28 Avuna a Piran kana waambazof fakdul aikilizang sina wana a pira angkari,
ma xana giu vazaus.” (Aais 10:22-23)
29 Ma Aaisaaia xa tabung piaat paamuain naako,
“A Piran A Maradikdikang,
tamon ka lek pen saxot faulin
tazanon aubina ziaana aubina zin dia,
dia vaakdul di lek milung
malasing aubina ila uru bina laba Sodom ma Gomoraa.” (Aais 1:9)
Amun Israael Xawit Di Inaxam Paazaai
30 Ma dia dina piaat aze wana amun saan angkanaan? Naandi ina xawit amun Israael, xawit di gut kuna dina tak lamarana Nakmai. Singsaxai Nakmai xa vakilaan naandi adu di tak avuna wana ainaxam paazaaiang sin naandi. 31 Amun Israael di ra gut mase xuna vatokang naandi nanga wana valozang amun Lus, singsaxai xawit nat faraxas naadina giu vabalos. 32 Aze ra vuvuna? Panaze di ra gut kuna dina tak lamarana Nakmai singsaxai xawit pana ainaxam paazaaiang. Di naxaam be adu naandi dina tak lamarana Nakmai wana gigiuang amun faamuzazang daxa. Di tuxin naandi wana axazak ina xa balas a vaat iwana tuxinang naandi. 33 Ka malasing di ra varaar vating lamaskana Baar Xoxok malasing kari,
“Naagu langar, ga rasin a vaat Zaaion,
ma xat faxalxaal aubina ma di tuxin naandi ma di zu.
Singsaxai axazak ina xa inaxam paazaai wana,
xana wen suruk a maangilang.” (Aais 8:14, 28:16)