8
Iesu A Pris Ka Laaup Lamaskana Rudaxaiang Faaxur
1 Saam 110:1Azaan laba ina maadi ra dador vaanong pana xari: Dia di rauxin awat pris ka laaup malasing kanaan. Naan ka iziar la mit sazaxa iwana akin siziarang sin a Xalxaal Laba ikula la lia. 2 Naan kat faamuzas aaxan a xalxaal angkanaan la non ka xoxok marazaat lamaskana vaal xoxok faaratunaan ikula la lia. A vaal xoxok angkanaan, a Piran nanga xa ra giu ma xawit aubina di giu.
3 Amun paamua zin amun pris faakdul zin amun Judaa, Nakmai xa ra lis a vaamuzazang sin naandi xuna lizang a talazang ma vaivang amun kaktalavaat malasing a talazang ka waan sina. Malasing ma azaan laba mase Iesu a pris ka laaup kana lis saait a talazang. 4 Tamon naan ka iziar la pira angkari taning, ka lek pen pris sin amun Judaa, wanaze xa rauxin fanong amun pris ina di ilis amun talazang lalozang amun Lus sin Moses. 5 A vaamuzazang iwana talazang di gigiu la vaal xoxok. A vaal angkanaan ka malasing be a laklagaaia vaal xoxok inikula la lia. Naan avuvuna xanaan Nakmai xa ra dador dikdik sin Moses, araan ka ra nimniman kuna giuang a vaal maling ina dit faif amun talazang pana. Naan ka piaat sina malasing kari, “Gu langar! Guna giu amun saan faakdul malasing nanga a laklagaaia vaal ga ra vatangin sunum ikula laaxur la waatawut.” (Zax 25:40)
6 Singsaxai Iesu xa zuruk fanong a vaamuzazang sin a pris ina xa laaup marazaat pana a vaamuzazang sin azanon pris. Malasing kanaan saait a rudaxaiang ina Iesu xa ra giu labirua wana Nakmai ma aubina, xa laba marazaat pana a rudaxaiang kabaar. Amun kalxalang ina xa vaatsiar iwana rudaxaiang faaxur, di daxa marazaat pana amun kalxalang kabaar.
7 Tamon a rudaxaiang kabaar xa lek tak faakdul, Nakmai xa lek pen inaxam pana giuang taza vaaxur. 8 Singsaxai Nakmai xa raamin adu amun matmalabuk taksaat ka ra iziar nanga zin amun Judaa ma xa piaat malasing kari,
“A Piran ka piaat naako,
‘Naagu langar, amun taan kana wat,
araan gana giu a rudaxaiang faaxur
varaxai wana amun patbung ka zangaaflu zin amun Israael
ma varaxai wana uru watbung sin amun Judaa.
9 Kana wen malasing a rudaxaiang
ga ra giu varaxai wana amun kulmua zin naandi
araan ga ra zaxot pizin naandi Ijip,
panaze xawit di valos a rudaxaiang kanaan surugu,
malasing ma ga ra lis a torugu zin naandi.’
10 A Piran ka piaat malasing kari,
‘A rudaxaiang gana giu varaxai wana amun Israael
lamuraana amun taan angkanaan kari:
Gana rasin amun lus surugu lamaskana ainaxamang sin naandi,
ma gana varaar lamaskana naandi.
Ma nia gana Nakmai zin naandi,
ma naandi dina aubina zurugu.
11 Kawit kaarik taxazak kana viraai axazak lapaarana,
ma xawit taxazak kana piaat sin axazak tawarak malasing kari,
“Guna rexaazin a Piran,”
panaze naandi vaakdul dina rexaazin nia,
xana varumara wana aubina xawit ta iza ma xa ruaas pana naandi ina di rauxin aiza laba.
12 Naandi dina rexaazin nia wanaze gana naxaam pizin amun taksaarang sin naandi,
ma gana wen naxaam kaarik amun matmalabuk taksaat sin naandi.’ ” (Jer 31:31-34)
13 Araan Nakmai xa ra vakilaan a rudaxaiang kari “a rudaxaiang faaxur,” ka maravas adu a rudaxaiang iwaamua xa xabaar ma a vaamuzazang iwana xa vaanong. Ma amun saan ina xa xabaar ma a vaamuzazang iwana xa vaanong, faasilik ka xana malik.