1 Tio, goio, isa tegiteu la angelo ivitu ale igoie egite ababi la kei ivitu, eia goio veiagu mago “Gomai, eau ge vahilo leme la kiloli la iruru te la tavile la gauru ale uru.* La vulovulo la iligo la iruru oio te la tavile, eia mai la vikarara la tilovo te la iruru mai la lotu tavu la puigolo. La tavile ale, eia la irovilala te la mautu ale kama kokora, egite ilia kabili te la lalu usu. 2 Egite la mulugaluga tomi te la maututula, egite igoti la iruru oio tetala, la vulovulola eia igo paua la valalua mai la lalu ale vagarigari, egite tomi liu paua la vaen tetalale.” 3 Goio, e angelole eia vahari taro la kalulugu soata la hohoi. Oio vola eau hilo isa uru la tavile eia oio pou sae oata te la poke la bolo isa uru eia magegese, la vovola volu seseleti la merera ale kama kokora, egite kekesia eia vikara barea La Uru. La gahola ivitu, la komola savulu sasa.† La bolo alele, etato rovitia, la vuhula etato pogea oio te 13:1-10, eia La Bolo Ale Uru, mai la merera la tilovo te la mulugaluga ale uru, eia ge vaubi soio te Kraist, ale egiteu la tahalo la mari isahari kaua veia eia soioge e King Nero. 4 La tavile alele, eia kisi la lavalava ale magegese oio te la kabilila, mai la irovilala te la mulugaluga, eia tokoromo tataho pasi mai la tokoromola tomi te la tahalo me la tavile la vuliti. Oio te la limala eia ababi la kakabi, eia volu seseleti la vaen ale kama kokora mai la vulovulola tomi tetala ale kama kokora viruru ale eia vigi la gauru. 5 Oio te la varula la kekesi oio, la merera la pigiveila moli, egite kekesi maie:

6 Goio, eau hiloa veia eia liliu, eau pauati la iliu la kasoso giteu la valalua me hatavivile tomi te La Tahalo Uru ale egite la gima biliti egiteu, mai egiteu tomi ale sau tola vagari moli la isale Iesus, egite poga la viluala mai ele. Tio, eau hilo la tavile uru mai ele, eau karutu sesele, eau taga pepeho, eia soukama ge igo gegeru eau.

7 Goio, e angelole, eia goio tahiau mago “Ilava eme karutu? Eau ge lubeamu la masova la irovilala iluale, mai la tavile uru alele, egira me la bolo eia pou sae oata te la pokela, la gahola ivitu, la komola savulu sasa. 8 La bolo alele, eia pala mahuli, eia igoie kati mahuli, eala moli eia ge hiliti lou lotalo la lulu ale malau sotalo, la igagala ouka, eia ge gali soio, eia ge poga la viluala. La valalua me hatavivile te la maututula, egiteu ale la isaisa giteu kama oio te la buk la mahulila pala te la siloko la vipoupoula, kara igoie, egiteu ge hilo La Bolo, egite ge karutu sesele, la vuhula eia pehoti, eala moli eia sibitalati lou.

9 “Goio, la merera isa lou koramulia veia la tahalo moli ale la gabutatalala tetala malau ge rovi la masovala. La gaho la bolo ale ivitu, egite tovo muli la popoiti ivitu ale la tavile eia pou ovola, mai la mautu egite ilia ovola. Eala moli egite tovo muli tai la mulugaluga ivitu. 10 Ilima boruti, eala moli isa soloio, me isa lou tai soukama hiliti. Eia ge sibitala, eia ge pou tabaa moli bakisi. 11 Eala moli La Bolo ale pala mahuli, eia igoie kati mahuli, eia isa tegiteu la ivitu giteu, eala moli eia ge hiliti lou mai la la iualu giteu ele, eia tai ge poga tavu la viluala.

12 “Eala moli la komo la bolo savulu sasao, eme hiloa, egite mai la uru savulu sasa, egite soukama abi la pulolou la mulugaluga tegiteu, eala moli La Tahalo Uru ge abia giteu bakisi la baa, koramuli egite ge pou golo muga bakisi, egite ge muga la maututula vikapopo La Bolo, eala moli eia kama ge tabaa, eia ge mata mai la mata la haro isa moli egite ge pou la mulugaluga te la galegale isahari mai ele. 13 Egiteu la igogolu isa moliti, veia egite ge sugu taro soio te La Bolo la vagagari giteu tomi ele veia egite ge vikapopo moli leia. 14 Egite ge vaubi soio te Latu La Sip, eala moli eia ge bolehoho egiteu, la vuhula eia la mulugaluga ale uru sesele, eia muga egiteu la ururu tomi. Egiteu la valalua me hatavivile te La Uru ge vaubi vikapopo le Kraist, egiteu ale eia tola egiteu soio tetala, eia visati legiteu mai ele veia egite ge la valalua me hatavivile tetala sesele.”

15 Goio, e angelole, eia vei taiagu la merera isa lou mago “Egiteu la lalu ale la tavile eia pou kabili tegiteu, egite la irovilala ale tovo muli egiteu la maratatila tomi, la mererera tomi, la valalua me hatavivile tomi tai te la maututula oio la galegale tomi. 16 Eala moli La Bolo, vikapopo me egiteu la mulugaluga savulu sasa mai la komola savulu sasale, egite ge vulo la gabutatalala tegiteu, egite ge vile la tavile uru ele, egite ge sile taro la tokoromola tomi tetala, eia ge tabuli bulalahu moli la lavalava ouka, egite ge ali la mailila goio egite ge selu taro la tatuhala. 17 La vuhula, La Tahalo Uru eia ge vagoiloa te la gabutatalala tegiteu ele la gabutatalala tetala, veia egite ge tilimuli la masasagala tetala, eala egiteu la mulugaluga tomi ge sugu taro la vagagari giteu soio te La Bolo veia eia ge muga la maututula, kara la merera tomi te La Tahalo Uru ge puru sesele. 18 Eala moli la tavile ale eme hilotia, eia la mautu ale uru, eia muga la mulugaluga tomi otalo te la magasa.”‡ Eala, la mautu alele, eia mata mai la mautu e Rom, ale egite ilia te la popoiti ivitu. Eala moli eia magiri tai mai la tovomulila te la mautu uru tai ale pala muga te Rom ele, e Babilon. Eala eia mai la vikarara la tilovo te la mari papaila tomi tegatou la valalua me hatavivile.