11
Ome akimeh milák nochi okitakeh
1 Onechmakakeh se oatl kemi se tlakotl non ika se tlatamachiwa, iwa onechilijkeh:
—Ximoketsa iwa xiktamachiwa n Weyi Tiopa de Dios iwa n artal, iwa xikimpoa kechmeh non ompa kiweyiliah. 2 Amo xiktamachiwa n atrio non kajki ik ikaltempanyo n Weyi Tiopa de Dios, ken yokinmaktilijkeh non amo judíojteh, iwa yejwah kitlajtlaksaskeh n chipawak altepetl ome póali iwa ome (42) mestli. 3 Ne nikintitlanis ome profetas. Yejwah tlakentitiaskeh ika intlakeh wapawak, para matetlapowikah de notlajtol se mil iwa ome siento iwa n eyi póali (1,260) tonatijmeh.
4 Ninteh ome profetas yejwah n ome olivos noiwa n ome kandelerojteh non moketokeh iyakapan Totajtsi Dios Akin tlanawatijtok ipan nin tlaltíkpaktli. 5 Tla aka kineki kinkojkos ninteh ome profetas, yejwah kikixtiah tletl itech inkamak, iwa kinmiktiskeh akimeh kinkokoliah. 6 Yejwah noiwa kipiah weletílistli ken kitsakuaskeh n ilwikak, iwa ijkó amo makiawi itech nonteh tonatijmeh ijkuak tetlapowijtinemiskeh itlajtol Dios. Noiwa kipiah weletílistli kenomi n atl kikopaskeh estli, iwa kenomi kitlaijyowiltiskeh n tlaltíkpaktli ika miak kokólisteh, san kech welta kinekiskeh. 7 Iwa keman yotlankeh okitematiltijkeh itlajtol Dios, n yolkatl temojti non walkisas ijtik poso sentlawejkatlantik, motekilmakas inwah, kintlanis iwa kinmiktis. 8 Inkuerpojwah wilantoskeh itlajko n sókalo kan altepetl de Jerusalén kan Toteko Cristo Jesús okikrusifikarojkeh, kan noiwa kitokayotiah Sodoma noso Egipto. 9 N tlakah itech nochteh n altepemeh, non amo san se intlachialis okipixtokah, noiwa non amo san se intlajtol okipiaya itech nochteh n tlalmeh, eyi tónati iwa n tlajko konimitoskeh ompa wilantoskeh inkuerpojwah iwa amo kitekawiliskeh makintlalpachokah. 10 Iwa akimeh chantitokeh ipan tlaltíkpaktli, pakmikiskeh iwa miak mopajpaktiskeh ijkuak kimatiskeh yomikkeh, asta kinmomamakaskeh tlatliokólilteh, porke nonteh ome iprofetajwah Dios, satlawel okintlaijyowiltiayah. 11 Satepa ijkuak yopanokeh eyi tonatijmeh iwa n tlajko, Dios okinyoliti iwa oksepa omokeketskeh, iwa nochteh non okimitakeh, satlawel omomojtijkeh. 12 San nima nonteh ome tlajtoltlatematiltijkeh okikakeh kan ilwikak se tlájtoli chikawak non okimiliaya:
—¡Xiwaltlejkokah nika tlakpak!
Iwa owaltlejkokeh ilwikak ijtik se mextli, iwa nochteh akimeh okinkokoliayah okimitakeh tlejkotiwih. 13 Ijkuakó owaltlalólinki chikaktik, iwa n májtlaktli itech se siento de nochteh n kalmeh owejwetskeh, iwa chikome mil tlakah de nin tlali omijmikeh. Iwa nochteh non amo omijmikeh satlawel omomojtijkeh, iwa opé kiweyiliah Dios non kajki ilwikak.
14 Non ipan ome tlaijyowílistli yopanok, iwa san nima ompa wits non eyi.
Non ipan chikome tlapítsali
15 Non chikome ángel okípitski itlapitsal, ijkuakó owalmokakeh sikimeh tlájtolteh kan ilwikak, non okijtoayah chikawak:
Axa nochteh n altepetlakameh non okinnawatijtokah n tekiwajkeh,
yopanokeh imak Toteko Dios iwa Cristo Jesús;
iwa Ye Akin tlanawatijtos axa iwa nochipa.
16 Ijkuakó n sempóali iwa n nawi (24) tetajtsitsinteh non oyayantitokah iyakapa n Dios, omoixtlapachojkeh iwa okiweyijkachijkeh Dios. 17 Iwa okijtojkeh:
Timotlasojkamatih monawak Toteko,
Todios weletini,
tejwatsi Akin axa timuistika,
yotimuistikatka iwa tiwalmuikas,
ken yotikonanki weyi moweletilis
iwa yopé titlanawatia.
18 Nochteh n tlaltikpaktlakah okualankeh.
Iwa yoajsiko n tonati ijkuak pewas titetlaijyowiltis,
noiwa n tonati ijkuak Tejwatsi tikintlajtlakolmakas non yomikkeh.
Tikintlaxtlawis motekitwah n profetas non okitetlapowijkeh motlajtol.
Nochteh akimeh Tejwatsi moaxkawah iwa kiweyiliah Motoka,
tsitsikitikeh iwa wejweyi,
yoajsiko n tonati ijkuak tikimpojpolos akimeh kijtlakoah n tlaltíkpaktli.
19 Ijkuakó iweyi Tiopa Dios non kajki kan ilwikak, owalmotlapo, iwa ompa okatka n kaxa non ijtik okimpixtoka n májtlakteh itlanawatilwah. Iwa opé tlapejpetlani, tlaijkuyuka, tlatejtekuini, tlalolini iwa chikaktik opé tesiwi.