3
Juan Bautista tlamachtia kan amaka chanti
(Mt. 3:1-12; Mr. 1:1-8; Jn. 1:19-28)
1 Ijkuak César Tiberio yokiwikaya káxtoli xiwitl kemi weyi tekiwa itech Roma, Poncio Pilato okatka gobernador de Judea, Herodes Antipas gobernador de Galilea, iwa ikni Felipe gobernador de Iturea iwa Traconite, iwa Lisanias okatka gobernador de Abilene. 2 Anás iwa n Caifás okatkah weyi tiopixkeh, yejwah otlayakantokah. Itech nonteh tonatijmeh, Dios okitlapowi n Juan ipiltsi n Zacarías, yika Juan otetlapowiaya kan amaka chanti. 3 Juan onentinemia itech nochteh altepemeh non okatkah itempa n río Jordán. Ye okinmiliaya makipatlakah innemilis iwa mamokuaatekikah para Dios makintlapojpolwi de intlajtlakolwah. 4 Ijkó omochi kemi ijkuilitok itech itlajkuilol n profeta Isaías:
Se tlájtoli mokaki chikawak kan amaka chanti:
“Xikyektlalilikah iojwiu n Toteko,
Xikmilawakah iojwiu.
5 Kan tlawewejkatla, xikixmanakah,
nochi tepemeh iwa n tepetsitsinteh noiwa nonkinmixmanaskeh,
n ojmeh nenekuiltikeh xikinmilawakah,
iwa n ojmeh kan tlalchikototolonka noiwa xikinmixmanakah.
6 Iwa nochteh n tlaltikpaktlakah kitaskeh kenomi techmakixtis Dios.” Is. 40:3-5
7 Miakeh tlakah owalayah inawak Juan, para makinkuaateki iwa ye okimiliaya:
—¡Nomejwah kemi nonkoameh! ¿Akin onomechili nonmakisaskeh imak tlaijyowílistli temojti non nomopah wits? 8 Xikchiwakah tlan kuali para mamota milák yononmoyolkopkeh inawak Dios, iwa amo xikmolikah: “Tejwah titepilwah de Abraham.” De milajka nomechilia, Totajtsi Dios weletis kinkopas ninteh temeh ipilwah n Abraham. 9 N acha kajki inakastla n kuawitl, iwa nochi kuawitl non amo kitemaka kuali itlakilo, motsontekis iwa motlamotlas ijtik tletl.
10 N tlakah okitlajtlaniayah:
—¿Tlan tikchiwaskeh?
11 Juan okinnankili:
—Akin kipia ome itlakeh makitliokoli se akin amo kipia. Iwa akin kipia tlan kikuas, makitliokoli akin amo kipia tlan kikuas.
12 Noiwa omokuaatekikoh sikimeh tominoololojkeh inawak Juan, iwa okitlajtlanijkeh:
—Tlamachti, ¿tlan moneki matikchiwakah?
13 Juan okinmili:
—Amo okachi xikinkobrarokah san tlan machotitok.
14 Noiwa sikimeh soldadojteh okitlajtlanijkeh:
—Tejwah, ¿tlan tikchiwaskeh?
Juan okinmili:
—Amaka itla xikkixtilikah, nion aka xikteilikah tla amitla okichi iwa xipakikah ika nomotlaxtlawil.
15 Kemi n tlakah sa okichixtokah mawiki n Cristo, yejwah okimoliayah chamo Juan ye n Cristo. 16 Yika Juan okinmili:
—Ne nomechkuaatekia ika atl, pero satepa wits se tlakatl Akin nomechkuaatekis ika n Espíritu Santo iwa ika tletl. Ye okachi weletini, iwa ne mach ni tlawel kuali kemi para nikaktojtomas. 17 Ye kualika itech ima tlan ika kichipawas n trigo. N trigo non yokichipa kitlaatis, iwa itlajsol n trigo kontlamotlas ijtik tletl non ayik sewis.
18 Ijkí, iwa ika oksikimeh tlamachtijkeh, Juan Bautista okinmatiltiaya n kualitlájtoli.
19 Noiwa okajwak n gobernador Herodes Antipas; porke okimosiwati ikuñada Herodías. Nin Herodías okatka isiwa n Felipe, ikni n Herodes. Juan noiwa okajwak Herodes ika tlan amo kuali okichijtinemia. 20 Pero Herodes mach okinek okikak tlan okiliaya n Juan, yej okichi tlan amokuali, iwa otlanawati makitsakuakah n Juan.
Juan kikuaatekia n Jesús
(Mt. 3:13-17; Mr. 1:9-11)
21 Juan okinkuaatekiaya miakeh tlakah, iwa se tonati noiwa okikuaateki n Jesús. Ijkuak Jesús omotiotsajtsilijtoka, n ilwikak owalmotlapo, 22 iwa n Espíritu Santo owaltemok ipan Jesús kemi se palomatsi, iwa itech ilwikak owalmokak se tlájtoli non okijtoaya:
—Te Ti Nokone non saikpanoa niktlasojtla, iwa monawak niyolpaki.
Iwejkatatawah n Jesús
(Mt. 1:1-17)
23 Ijkuak Jesús okipiaya kemi sempóali iwa n májtlaktli xiwitl opé tetlapowia de itlajtol n Totajtsi Dios. N tlakah okijtoayah Jesús oyá ipiltsi n José, iwa n
José ikone n Elí,
24 Elí ikone Matat, iwa
Matat ikone n Leví,
Leví ikone Melqui, iwa
Melqui ikone n Jana,
Jana ikone n José, iwa n
25 José ikone Matatías,
Matatías ikone n Amós, iwa n
Amós ikone Nahúm,
Nahúm ikone n Eslí, iwa n
Eslí ikone n Nagai,
26 Nagai ikone Maat, iwa n
Maat ikone Matatías,
Matatías ikone n Semei, iwa n
Semei ikone Joséc,
Joséc ikone Judá, iwa n
27 Judá ikone Joanán,
Joanán ikone n Resa, iwa n
Resa ikone Zorobabel,
Zorobabel ikone n Salatiel, iwa n
Salatiel ikone Neri,
28 Neri ikone Melquí, iwa n
Melquí ikone n Adí,
Adí ikone Cosam, iwa n
Cosam ikone n Elmadam,
Elmadam ikone n Er, iwa n
29 Er ikone Josué,
Josué ikone n Eliezer, iwa n
Eliezer ikone Jorim.
Jorim ikone Matat, iwa
Matat ikone n Leví,
30 Leví ikone n Simeón, iwa n
Simeón ikone n Judá.
Judá ikone José, iwa n
José ikone n Jonán,
Jonán ikone n Eliaquim, iwa n
31 Eliaquim ikone Melea.
Melea ikone Mainán, iwa n
Mainán ikone Matata.
Matata ikone Natán, iwa n
Natán ikone n David.
32 David ikone Isaí, iwa n
Isaí ikone Obed,
Obed ikone Booz, iwa n
Booz ikone Salmón.
Salmón ikone n Naasón, iwa n
33 Naasón ikone n Aminadab.
Aminadab ikone n Admín, iwa n
Admín ikone Esrom.
Esrom ikone n Fares,
Fares ikone n Judá, iwa n
34 Judá ikone n Jacob.
Jacob ikone Isaac, iwa n
Isaac ikone n Abraham.
Abraham ikone n Taré, iwa n
Taré ikone Nacor,
35 Nacor ikone n Serug, iwa n
Serug ikone n Ragau.
Ragau ikone n Peleg, iwa n
Peleg ikone n Heber.
Heber ikone n Sala, iwa n
36 Sala ikone n Cainán.
Cainán ikone n Arfaxad, iwa n
Arfaxad ikone n Sem.
Sem ikone Noé, iwa n
Noé ikone n Lamec.
37 Lamec ikone Matusalén, iwa
Matusalén ikone n Enok.
Enok ikone n Jared, iwa n
Jared ikone n Mahalaleel.
Mahalaleel ikone n Cainán, iwa n
38 Cainán ikone n Enós.
Enós ikone n Set, iwa n
Set ikone n Adán, iwa n
Adán ikone Dios.