1 यीशु याईर ने गेराम रेन निकलीन तान गावाम आवो, एने तान चेला बी पासाण आवा। 2 विहेवणेन दिह यीशु बोक्ती केरन्या गेरा माय जाईन पारचार केरने बाज गीयो, एने तान वातु होमलीन जुलूम माणहे होमलीन बोंगलाय गीया एने केया, “ज्याह ज्यी वातु कारीन जुड़ेल हे? ज्या फाय काल्ली इकेल हे जो ताह आपेल हे? एने ज्यान आथाम रेन ओहला मोटला चोमेत्कार ने काम किहीक एतेह? 3 काय ज्यो तो हुतार नाह सुतो, जो मरीयम ने बिटोख एने याकुब, योसेस, यहुदा एने शमोन ने बाहख नाह सुतो? एने काय ज्यान बोणह्युख न्या आपणी विचीम नाह रेत्यु?” तानकेरता माणहे यीशुह नाकार देना।

4  ✡ 6:4 योहान 4:44यीशु ताह केयो, “काल्ला बी जाणकाराह तान गेर एने तान जाती माय एने तान गावाम मान पान नाह जुड़ेत, पुण दिहरी जागे ताह मान पान जुड़ने।”

5 यीशु ताहरी काल्लोस चोमेत्कार ने काम नाह केर सीकनो, पुण थोड़ास दुखाऱ्या माणहा पोर आथ मेलीन ताह हुदारेल।

6 एने यीशुह तान अविश्वासाह देखीन जुदोच लागो।

उवतो यीशु ता रेन निकलीन चार चोमखीर ने गावा माय जाईन माणहाह हिक दितेन फिरनो। 7 तेवी यीशु बारा चेलाह आहने हाद्यो, एने ताह बुतड़ा पोर आदिकार आपीन दुय दुय केरीन मुकल्यो। 8 उंजु ताह उकुम आप्यो, “वाटीन केरता डेंगा सोड़ीन दिहरो कायच मा लिहो, नाह रूटो, नाह थेयलो एने नाह पोयशा। 9 खाहड़ा पिरो, पुण दुय जोड़ डेगला मा लिहो।” 10 एने उंजु ताह केयो, “जा गेरान माणहे तुमरो स्वागत केरती, तुमू ताच गेरा माय रिवो जाह वोर काय तुमू ता रेन नाह जाते। 11  ✡ 6:11 लुका 10:4-11; प्रेरितान काम 13:51एने ज्यी जागेन माणहे तुमरी वातु नाय होमेलती ताहार ता रेन चाल दिज्यो, एने तुमरा पायाम लेटकेल रेजड़ो जिटेक दिज्यो, काय तान केरता चेतावणी रेय!”

12 केरीन चेला गावा गावा माय जाईन पारचार केरने बाज गीया काय पापाह सोड़ीन बोगवाना उगे वोली। 13  ✡ 6:13 याकुब 5:14ता जुलूम माणहा माय रेन बुतड़ा निकाल्या, एने जुलूम दुखाऱ्या माणहा पोर तेल चोपड़ीन ताह हुदाऱ्या।

14  ✡ 6:14 मत्ती 16:14; मरकुस 8:28; लुका 9:19* 6:14 हेरोदेस राजा, हेरोदेस अंतीपास, गेलील ईलाकान आदिकारीहेरोदेस राजा बी यीशुन बाराम ज्य होमल्यो, काहाकाय तान नाव आखी जागे पोसरी जायेल एतो, एने माणहे केताला, “योहान बपतीस्मा केरनार मुरेल माय रेन जीव उठेल हे! तानकेरता ज्या फाय रेन ओहला मोटला चोमेत्कार ने काम एतेह।”

15 दिहरा माणहे केया, “ज्यो एलिया हे,”

पुण थोड़ाक जाणे उंजु केया, “जुनाला जाणकारा माय रेन एक हे।”

16 ज्य होमलीन हेरोदेस राजा केयो, “जो बपतीस्मा केरनार योहान हे! जान मुंड मी काटाड़ दियेल ईतो, पुण तोच जीव उठेल हे!” 17  ✡ 6:17 लुका 3:19,20हेरोदेस राजा तान सिपायाह मोकलीन योहानाह हाकुल केरीन बांदिन जेली माय कोंडाड़ दियेल ईतो। काहाकाय तो ओहलो काहा किरेल काय राजा तान बाहख फिलीपुस ने बायकु हेरोदियाह राख लियेल ईतो। 18 बपतीस्मा केरनार योहान जाहार ताहार हेरोदेसाह कियेल ईतो, “तार बाहख ने बायकुह राखणे तार केरता हाजो नाह सोतो!”

19 केरीन हेरोदियास योहाना हेऱ्यी दुसमोनाय केरताली एने ताह मारावणेन तीन विचार एतो। पुण हेरोदेस ने कारेण ती ओहलो नाह केर सेकी। 20 हेरोदेस योहानाह देरमी एने चोखालो एदमी जाणीन ताह बितालो, एने ताह वोचाड़ीन मील रियेल ईतो। एने हेरोदेस योहानान वातु होमलीन जुलूम गाबराय जातालो, पुण खुसी से होमेलतालो।

21 एक दिह हेरोदियाह मुको जुड़ गीयो। जेवी हेरोदेस राजान जेल्मो दिह आवो, तेवी राजा सरकारी आदिकारीह एने सेनापोती, एने गेलील देसान आखा मालदार माणहाह खाणेन केरता हादेल ईतो। 22  † 6:22 हेरोदियास ने सोरी; थोड़ाक लेख माय तान सोरी हेरोदियास लिखेल हेतुलबूखे हेरोदियास ने सोरी माय आवीन नाचनी, एने हेरोदेसाह एने ता हेऱ्या बोहणारा आखा पावणाह खुस केरी, तेवी राजा सोरीह केयो, “तुवाह जो जुवे तो माहु फाय मांग मी तुवाह आपुह।” 23 एने राजा वायदो केरीन केयो “जो काय तु माहु फाय मांगहे, तो मी तुवाह आपुह, तो मारो आदो राज काहा नाय रेय!”

24 केरीन ती बाहेर जाईन तीन आईख फुशी, “मी काय मांगु?”

तीन आहख केयी, “योहान बपतीस्मा केरनारान मुंड मांग।”

25 ती सोरी तुलेचबूखे दोवड़ीन माय आवीन राजाह केयी, “मारी मोरजी हे काय तु योहान बपतीस्मा केरनारान मुंड काटाड़ीन एक पाराती माय मेलीन मार केरता मांगाड़ दे!”

26 तेवी राजा ज्यी वात होमलीन जुलूम नाराज एय गीयो, पुण राजा तान आखा पावणान ओंगाण जो वायदो किरेल ईतो, केरीन तीन वात टाल नाह सीक्‍यो। 27 तानकेरता राजा एक सिपायाह योहानान मुंड काटीन लावणेन केरता उकुम आपीन मुकल्यो। सिपाय गीयो, एने योहानान मुंड काट दिनो; 28 एने एक पाराती माय मेलीन लावो एने सोरीह आप दिनो, एने सोरी तीन आईख आप देनी। 29 ज्यी खुबेर योहानान चेला फाय पोचनी, तेवी योहानान चेला आवीन तान देड़ाह ली गीया, एने माहणा माय ठिकाणे लागाड़ देना।

30 तेवी प्रेरित वोलीन यीशुन जागे टोलवाना, एने जो काय ता किरेल एने जो काय हिकाड़ेल तो आखो ताह केय देना। 31 तेवी यीशु ताह केयो, “तुमू ओलास आखा मार पासाण हुनाला जागाम चालो एने एकताल आराम किरो।” काहाकाय जुलूम माणहे आवती जाते रेताला एने ताह रूटो खाणेन बी टेम नाह जुड़तालो। 32 तानकेरता ता आखा डोंडह्या माय बोहीन आंगेच हुनाला जागाम जात रेना।

33 मोकतास माणहे ताह जाताला देख लेदा एने ज्य बी ओलखी लेदा काय ता कुण हेते; केरीन आस पास ने गावान आखा माणहे एकठा एन ताहरी पायेच दोवड़ना, एने यीशु एने तान चेलाह रेन पेल जाय पोचना। 34  ✡ 6:34 मत्ती 9:36जेवी यीशु डोंडह्या माय रेन उतरनो, तो माणहान एक होवटाली गेरदी दिख्यो, ते ता माणहा पोर किव आवी, काहाकाय ता बिगेर गोवाल ने मेंड्रान गेत एता। केरीन तो ताह जुलूम वातु हिकाड़ने बाज गीयो।

35 जेवी दिह डेल गीयो, तेवी तान चेला आहने आवीन केया, “ज्यो हुनालो जागो हे, एने दिह जुलूम डेल जायेल हे। 36 एवी न्या माणहाह मुकेल दे, एने ज्या आस पास ने गावा माय एने वोहती माय जाईन तान केरता काह खाणेन लेती।”

37  ‡ 6:37 चांदीन सिक्‍का, चांदीन एक सिक्को मतलब गावा माय एक मोंजऱ्यान मोंजरी हे। देखी मत्ती 20:2पुण यीशु ताह जापाप आप्यो, “तुमूच न्याह खाणेन आपो।”

चेला यीशुह फुशा, “ओला माणहाह खावड़ावणेन केरता कोम से कोम दुय होव दिह्यान मोंजरीन पोयशा लागती। तार काय मोरजी हे काय आमु जाईन न्यान केरता रोटा ली आवज्यो?”

38 यीशु ताह फुशो, “कोलाक रोटा हेते न्या? जावो एने दिखो।”

ता मालुम केरीन केया, “पाच रोटा एने दुय मासा हेते।”

39 तेवी यीशु चेलाह उकुम आप्यो काय आखा माणहाह निल्ला खेड़ा पोर पोंगेत पोंगेत बोहाड़ दिवो। 40 ता माणहे होव होव, एने पाचाह पाचाह केरीन पोंगेत माय बोह गीया। 41 यीशु ता पाच रोटा एने दुय मासाह आथाम देरीन हेरगान उगे देख्यो, एने बोगवानान दन्यवाद किऱ्यो। तो रोटा मुड़ीन चेलाह आपते गीयो काय माणहाह वाटती। एने ता दुय मासा बी तिहेस केरीन वाट देना। 42 जेवी आखा माणहे खाईन आफरी गीया। 43 तेवी चेला उगरेल रोटान टुकड़ा बारा टोपला बोरीन विशा, एने थोड़ाक मासा बी। 44 एने रोटा खाणारा माय पाच एजार एदमीच एता।

45 तेवी यीशु चेलाह डोंडह्या पोर चेड़ीन बोहणेन केरता मोजबुर किऱ्यो काय तान पेल ती पार बेतसेदा गावा माय जात रेती, जाह वोर काय तो माणहाह मोकलेत नाह। 46 यीशु माणहाह मोकली देन बोयड़ा पोर विन्ता केरनेन केरता गीयो। 47 जेवी हांज एय गियी तेवी डोंडह्यो देरीयान विचीम एतो, एने यीशु एखालोच बुई पोर ईतो। 48 यीशु दिख्यो काय चेला जुलूम मेहनेत केरीन डोंडह्यो चालाड़ने बाजरेनाह एने जुलूम गाबराय जायेल हेते, काहाकाय वादोण वारो तान हुम्बो एतो, तेवी यीशु उजालो एणेन पेल पाण्या पोर चालतेन तान आहने आवो। तो ताह रेन ओंगाण जाणेन होदतालो,§ 6:48 तान आहने रेन जाणे बाजरियेल ईतो, नाहते ता हिऱ्यो जाणे बाजरियेल ईतो। 49 पुण ता यीशुह पाण्या पोर चालतालो देखीन सोमेजना काय “ज्‍यु बुत हे!” एने आयेड़ने बाज गीया। 50 काहाकाय ता आखा यीशुह देखीन बिय जायेल एता।

पुण यीशु ता हिऱ्यो वातु केरीन केयो, “ईमोत किरो, मी हे, बिवो मा!” 51 तेवी यीशु ता हिऱ्यो डोंडह्या माय आवो, एने वादोण वारो थोब गीयो। ज्य देखीन चेला जुलूम बोंगलाय गीया, 52 एने ता पाच एजार माणहा खावड़ायेल तान बाराम चेला नाह सोमजेल एता; काहाकाय तान मोन ता वातड़ो केर लियेल एता।

53 ओवता ता देरीयाह पार केरीन गन्नेसरत गावा माय पोचना, एने मीरे उतरीन डोंडह्याह बांद देना। 54 जेवी ता डोंडह्या माय रेन उतेरना, तेवी माणहे ताह चालोच ओलखी लेदा। 55 एने ता माणहे आहने पाहने वाला आखा गावा माय दोवेड़ते फिरना; एने दुखाऱ्या माणहाह खाटला पोर उखलीन जा जा यीशु हे, ओहली वात होमलानी ता ली फिरना। 56 एने यीशु काल्ला बी गाव एने वोहती जातालो, माणहे दुखाऱ्याह बाजारा माय मेलीन यीशुह विन्ता केरताला काय दुखाऱ्याह तान फाड़काह सापेलने देय; एने जोला बी दुखाऱ्या माणहे तान फाड़काह सापेलताला ता आखा हुदेर जाताला।