19
1 Ie facaise monamo eo ailluena comɨnɨ ado lluana cacadɨcue. Jusiñamuimo llotɨmacɨ:
Ona caɨ iobitajasa. Caɨna jai jillotatɨo.
O uai ebirede. Odɨ siño jitodɨo.
2 O anamo itɨnona raise uiñuamona, uanaicɨnona o uiñuamona, naimacɨna duere jai fɨnodɨo.
Naie jearede rafuena fɨnode rɨñona jai duere fɨnodɨo.
Naie rɨño ailluena comɨnɨna jearede rafuena fɨnotate.
Ailluena o facaina maɨjɨdɨnona jai meinetade;
iadedɨ ɨba jai otɨo.
3 Iemei dane llotɨmacɨ:
—Ona caɨ iobitajasa. Duere sefuillena, naie naɨraɨ jaca boode. Naimacɨ jaca duere sefuitɨmacɨ —llotɨmacɨ.
4 Naie veinticuatro einamacɨ, naie cuatro cajedɨno dɨga, Jusiñamui ecɨmo ana bɨtadajanona, naimɨena sedadɨmacɨ. Llotɨmacɨ:
—Omoɨ lluacɨno mare. Ie isoi jɨaɨ lloiacadɨcaɨ. Jusiñamuina caɨ iobitajasa.
5 Jusiñamui illanomona damɨe llote:
Nana caɨ Jusiñamuina facaina maɨjɨdɨno iobitajasa.
Nana naimɨena ɨɨnotɨno naimɨena iobitajasa.
Jamai bue isoidɨno naimɨena iobitajasa.
Jamai bue isoiñedɨno naimɨena iobitajasa.
Juan Toɨca Llauda isoidɨmɨe aɨna ua rafuena cacade
6 Naie facaise monamo eo ailluena comɨnɨ lluana cacadɨcue. Ailluena jɨnui surua isoi fɨcɨrede. Eo gurucabilla isoi fɨcɨrede. Llotɨmacɨ:
Caɨ Nama Jusiñamuina caɨ iobitajasa.
Naimɨe siño jito. Nana comɨnɨna birui jai sedade.
7 Eo iobidɨcaɨ. Naimɨemo iobillacɨnona eo caɨ fecajasa.
Llauda isoidɨmɨe ie aɨna ua rafue facaise jai suide.
Naiñaiño jai fɨnobide.
8 Mare ɨniroi naiñaiñomo jai ite. Eo userede. Quenirede. Jeanide
llotɨmacɨ. Iese ɨniroina llotɨmacɨ; ia Cristo, ie comɨnɨ dɨga, jaca illena ñaɨtɨmacɨ. Ie aɨ dɨga, ɨni ie rɨño jaca caɨmare illa isoi, nana naimɨe comɨnɨ dɨga, naimɨe caɨmare jaca iite. Naie mare ɨniroidɨ, Jusiñamui jitaillacɨnona fɨnuamona, naimɨe ɨɨnotɨno imacɨ mare fɨnoca rafue isoide.
9 Jaɨenicɨ cuemo llote:
—Biena cueno: “Llauda isoidɨmɨe aɨna ua rafue dɨne uaidoganodɨ caɨmare iitɨmacɨ”. —Iemei llote:
—Jusiñamui iena llua jira, uanaicɨnona omo llotɨcue.
10 Jaɨenicɨ uicomo eɨllɨmo ana bɨtadatɨcue, naimɨena sedallena; ia cuemo llote:
—Dama ite. Cuena sedañeno; ia dama Jusiñamuina seda. Jesús ie dɨbeimo itɨnona uanaicɨnona jai uiñotade. Ie jira naga o dɨga naimɨena ɨɨnotɨno isoi, Jusiñamui facaina jɨaɨ maɨjɨdɨcue. Naga Jusiñamui facaina maɨjɨdɨmɨe Jusúna llocabite. Ie muidona dama Jusiñamuina seda.
Juan userede caballo emodomo itɨmɨena cɨode
11 Naie facaise mona ecorillana cɨodɨcue. Nainomo userede caballona cɨodɨcue. Naie emodomo itɨmɨemo mena mamecɨ ite. Ɨɨnogamɨena mamecɨrede. Uanaicɨnona Llocabitɨmɨena jɨaɨ mamecɨrede. Naimacɨna raise uiñuamona, naimɨe dɨbeimo iñedɨnona duere fɨnollena, naimacɨ dɨga jobairite. 12 Naimɨe uisɨdɨ irai isoide. Illaɨmana jira, naimɨe ɨfogɨmo ailluena nuicɨraɨ ite. Naimɨemo cuega mamecɨna buna uiñoñede. Dama naimɨe iena uiñote. 13 Naimɨe jɨtaca ɨniroi ie dɨbeimo iñedɨno dɨruemo mutaca. Jusiñamuina naimɨe uiñotaja jira, Jusiñamui Uairedɨmɨena mamecɨrede. Naimɨedɨ Jesucristo. 14 Naimɨe jɨnafona soldaduaɨ isoi Jusiñamui facaina itɨno monamona billana jɨaɨ cɨodɨcue. Eo mare userede jeanide ɨniroina jɨtadɨmacɨ. Userede caballuaɨ emodomo itɨmacɨ. 15 Enɨruemo ite naɨraɨaɨna emodofillena, naimɨe fuemo jairede lloebɨ ite. Naimacɨna emodofilla mei, naimacɨna naimɨe jitaillacɨnona fɨnotallena, naimacɨna eo rɨire sedaite. Jusiñamui siño jitona jira, naimɨe rɨicaillɨfue anamo itɨnona eo duere fɨnoite. 16 Naimɨe ɨniroimo, naimɨe ɨdaɨmo jai cuega: “Nanoca Illaɨma. Nanoca Nama”.
17 Naie facaise jaɨenicɨ jitoma llɨgaiñuanomo cɨodɨcue. Nana inonɨaɨna uaidote:
—Llɨcɨsina mai rɨaɨbi. Jusiñamuidɨ ailluena comɨnɨna ja meiniamona rɨlle eo iite. 18 Naimacɨna emodofillamona, ailluena llɨcɨsi ja iite. Ailluena comɨnɨna ja meineite. Illaɨcomɨnɨ itɨmacɨ. Soldaduaɨ illaɨcomɨnɨ itɨmacɨ. Caballuaɨ itɨmacɨ. Caballuaɨ emodomo jaicabidɨno itɨmacɨ. Dɨga comɨnɨ ite. Jamai bue isoidɨno itɨmacɨ. Jamai bue isoiñedɨno itɨmacɨ. Patrones anamo itɨno itɨmacɨ. Patrones anamo iñedɨno itɨmacɨ. Naimacɨ llɨcɨsi mai rɨaɨbi —llote.
19 Naie facaise monaillaimona bite rɨirede ocainadɨ enɨrue illaɨcomɨnɨ dɨga ofide. Naimacɨ soldaduaɨ jɨaɨ ofidɨmacɨ. Userede caballo emodomo itɨmɨe dɨga, naimɨe dɨbeimo itɨno dɨga jobairiacadɨmacɨ. 20 Userede caballo emodomo itɨmɨe ie dɨbeimo itɨno dɨga naimacɨna emodofide. Ocainana gaɨtadɨmacɨ. Naimɨe facaina taɨnona lloraɨmana jɨaɨ gaɨtadɨmacɨ. Naie lloraɨma ocaina uai dɨga comɨnɨna jɨfuecabite. Siño rafuena fɨnuamona, ocaina cuetataga ra itɨnona, ie joreñona sedadɨnona jɨfuecabite. Naie iaɨmaiaɨna gaɨtaja mei, eo boode iraimo iaɨmaiaɨna cajena dotadɨmacɨ. Azufre boa isoi irai boode. 21 Caballo emodomo itɨmɨedɨ ie fuemo ite lloebɨ dɨga iaɨmaiaɨ soldaduaɨna meinete. Jaɨenicɨ llua isoi, inonɨaɨ naimacɨ llɨcɨsina rɨtɨmacɨ. Iemona eo monidɨmacɨ.