31
1 Lau na matagu taravadia vada na atu;
benaini, hane-ulato rami-hebou na ede baina haḡerea toma?
2 Davagu bema dahaka atai Diravana ena amo?
Ahugu bema dahaka Siahu-idoinai Diravana atai ai e nohomu ena amo?
3 Hahehisi na kara gageva-gageva taudia latadiai
bona mase danu kara havara taudia latadiai se kaumu a?
4 Egu dala na se itadiaimu
bona aegu daḡadia iboudiai se duahidiamu a?
5 Koikoi dalana ai bama raka,
aegu na koikoi gabuna bema heau henia;
6 bena hahetoho ḡauna maoromaorona ai baine hahetohogu,
bona Dirava ese egu lalo-maoromaoro baine dibaia.
7 Aegu na dala amo bema raka oho,
lalogu ese matagu bema ḡavadia,
imagu na bema mai mirodia;
8 bena dahaka baina hadoa ta ese baine ania,
bona dahaka baine vara egu na baine heraḡa oho.
9 Lalogu na hahine ta ese bema ania,
dekegu tauna ena ruma iduarana badinai bama henari;
10 bena adavagu na idau tauna ta ana uit baine riria,
bona idaudia haida ese bae eno henia.
11 Badina be una na bema kerere metau-hereana;
una na bema kara dikana, hahemaoro taudia ese bema hahemaorolaia;
12 davana na lahi, e ara e laomu ela bona dobu masemase gabuna;
egu ḡaukara anina idoinai bema araia ore.
13 Egu hesiai tauna eiava hahinena bema maumauraigu negana ai
ena hereva bama dadaraia,
14 ede baina kara toma, Dirava baine tore isi negana ai?
Baine henanadai negana ai, ede baina haere henia toma?
15 Sinagu bogana ai e karagu Diravana ese ia danu se karaia a?
bona ta ese sinamai bogadia ai se karamai a?
16 Ogoḡami tauna ena ura ḡauna ta bama rua,
eiava vabu matana bama havalahu-valahua,
17 eiava agu bama ani gunita,
ihareha na sina taina basinama henia,
18 (badina be merona negana amo na reḡua, tamana na heto,
bona e vara negana amo na hakaua);
19 ta bama itaia, asi dabuana dainai e mase,
eiava ogoḡami tauna asi ena hetaru;
20 ia ese tau-anina amo basinema hanamogu,
bona egu mamoe huidia ese tauna basiema hasiahua;
21 imagu bama abia isi ihareha ihadikana,
ikahagu na hahemaoro gabuna ai na itaia dainai;
22 bena larolarogu turiana na paḡagu amo baine moru oho,
bona imagu na paḡagu amo baine heveri oho.
23 Badina be Dirava ena amo bainema hahisina garina na gari;
ia hairaina mai siahuna ida basinama haḡerea diba.
24 Gold bama abidadama henia,
eiava gold ḡoevaḡoevana na egu helaro ḡauna ai bama halaoa;
25 bama moale egu taḡa vada e bada dainai,
eiava imagu na ḡau momo vada e haboudia dainai;
26 dina bama raraia e taramu negana ai,
eiava hua hairaina bama raraia e rahumu negana ai,
27 unu amo lalogu bema heani hehuni-hehuni,
bona udugu ese imagu bema harahua;*Ini na dina bona hua e toma henidia diho taudia edia toma-diho karadia.
28 bena ina danu na kara havara, hahemaoro taudia ese davana bae gwaurai;
badina be unu kara amo atai Diravana bama koia.
29 E inai henigu tauna ihadikana bama moalelaia,
eiava dika ese e butua tao negana ai bama heaḡi,
30 (udugu asina hakererea, heuduguirai herevana amo,
ena mauri iabi-ohona asina gwauraia);
31 egu kalaga taudia basiema toma
“Daika na ena aniani ianina ai bogana do se kunu?”
32 (Laolao tauna na ariara ai se noho,
egu iduara vada na kehoa, loaloa tauna ena);
33 egu kara dika na taunimanima edia amo bama hunidia,
egu kara havara na lalogu ai bama hunia,
34 badina be hutuma igari-henidia bona varavara edia hedadarai igari-henina dainai,
bena asi reḡereḡegu na nohova, bona asina raka lasi;
35 ta ese baine kamonai henigu be namo;
(lau toagu binai: Siahu-idoinai Diravana ese baine haere henigu);
inaigu ena hahebade revarevana baina abia be namo.
36 Momokani, paḡagu ai bama huaia,
bona kwaragu bama ḡeḡelaia, havava ḡauna na heto;
37 aegu daḡadia iboudiai sivaraidia bama gwaurai henia,
pavapava heḡereḡerena bama raka henia kahi.
38 Egu tano ese bema habadelaigu;
tano latalatadia bema taitai hebou;
39 anina bama ania asi davana,
eiava biaguna bama hamasedia;
40 bena au ginigini bae vara uit gabudia ai,
bona ava dikadia bali gabudia ai.
Iobu ena hereva na iniseni ai vada e ore.