1 Una negana ai guba basileiana na ulato gwauta na heheto, edia lamepa e abi kau, headava matamata tauna ida bae hedavari eto. 2 Laima na mai aonegadia, a laima na kakavakava. 3 Badina be kavakavadia ese edia lamepa e abi kau, to diaranu asie abia kau; 4 a aonega ulatodia ese edia lamepa e abi kau bona diaranu danu kavabu ai e abia kau.

5 Headava matamata tauna e halahe dainai, mahuta ese matadia e gara, bena iboudiai e mahuta. 6 Malokihi ai ta e lolo, eto, Headava matamata tauna vada e maimu: a raka lasi, ia ida ba hedavari. 7 Bena hari ulato iboudiai e tata isi, edia lamepa e haḡoeva. 8 Ulato kavakavadia ese aonega ulatodia e hereva ulatodia, eto, Emui diaranu taina a henimai, badina be emai lamepa vada be bodomu. 9 A aonega ulatodia e haere, eto, Lasi; ai bona umui na basine davana garina. Namona binai, hoihoi taudia dekedia baola, sibomui emui ba ha hoi. 10 Hoihoi totona e raka laova ai, headava matamata tauna ema, bena e noho heḡaeḡae ulatodia na ia ida headava ariana ai e raka vareai. Bena iduara e koua ahu. 11 Gabeamo ulato oredia na ema, eto, Ḡauka e, ḡauka e, emai iduara ame kehoa. 12 A ia na e haere, eto, Na hamaoromui momokanimu, lau na asi dibagu umui.

13 Taunabunai, ba gima: badina be dina bona hora na asi dibamui.

14 Iniheto: tau ta gabu daudau bainela eto, bena ena hesiai taudia e boiridia, ena kohu na imadia ai e rakatani. 15 Bena ia ese ta talent ima e henia, ma ta talent*Talent na moni badana ta, reana $1000 heḡereḡerena. rua, ma ta talent tamona, ta ta ena diba ena diba heḡereḡeredia. Bena eha laolao. 16 Bena talent ima e abi tauna na vada ela, eha hoihoilai, talent ima ma e abilai. 17 Unuhetomana danu talent rua tauna ese talent rua ma e abilai. 18 A talent tamona e abia tauna na vada ela, tano eha geia, biaguna ena moni e ḡuria.

19 Nega vada e daudau, bena unu hesiai taudia biagudia vada e lou mai, bona ena kohu herevadia e nanadailaidia. 20 Bena talent ima e abi tauna na vada ema, talent idaudia ima ma e mailai, eto, Ḡauka e, talent ima o henigu; a ita, talent idaudia ima ma na davari. 21 Biaguna e haere, eto, Namo herea! Oi na hesiai taumu namona, kara maoromaoro taumu. Ḡau dia hoho o reḡu namonamova, Ḡau momo biagudia ai do baina halaomu. Biagumu ida baita moale hebou.

22 Bena talent rua e abi tauna danu ma ema, eto, Ḡauka e, talent rua o henigu; a ita, ini talent idaudia rua ma na davari. 23 Biaguna e haere, eto, Namo herea! Oi na hcsiai taumu namona, kara maoromaoro taumu. Ḡau dia hoho o reḡu namonamova, ḡau momo biagudia ai do baina halaomu. Biagumu ida baita moale hebou.

24 Talent tamona e abia tauna vada ema, eto, Ḡauka e, vada name diba oi na gwau-tora taumu; to hado ḡaudia na o utumu, bona to ḡiḡi rohoroho ḡaudia na o haboumu. 25 Taunabunai na gari, nala, emu talent tano ai na ḡuria: a itaia, vada emu avabia. 26 Biaguna e haere, eto, Oi na hesiai taumu dikana, lahedo taumu. Vada dibamu asina hado ḡaudia na utumu bona asina ḡiḡi rohoroho ḡaudia na haboumu; 27 matona, egu moni na bank taudia dekedia boma laohaia, bena bama lou mai, bama abia lou mai atokauna ida. 28 Benaini, ena talent avabia oho, talent gwauta tauna na ba henia. 29 Badina be mai ena ḡau tauna na ḡau momo baine abi, to asi ena ḡau tauna na ienai miana ḡauna do bae abia oho. 30 Bona hesiai tauna dikana be murimuri diburana ai ba doria lasi; unuseni ai bae tai, gadigadidia bae hahedai.

31 Taunimanima Natuna na hairaina ai do bainema, ena aneru helaḡadia ida, ena terono herea-daena latanai baine helai. 32 Bena bese iboudiai ia vairanai bae haheboudia; bona ia ese baine hapararadia, mamoe ireḡudia tauna ese mamoe bona nani e hapararadiamu na heto; 33 mamoe na idibana kahana ai nani na laurina kahana ai baine hididia.

34 Bena Ḡaubada ese idibana kahana taudia baine hamaorodia, baineto, Aoma, Tamagu ese e hanamomuimu taumui e, basileia na avabia, tanobada e karaia negana ai vada e seua umui emui. 35 Badina be e hitologuva, o ubuguva; ranu e maseguva, ranu o heniguva, lau na idau taugu, o abigu dae; 36 asi egu dabua, o hadabualaigu; e goreregu, o igogu ita; dibura rumana ai na nohova, dekegu o raka vareaiva. 37 Bena kara maoromaoro taudia ese bae haere henia, baeto, Lohiabada e, edena nega ai a itamu, o hitolova, a ubumu? Eiava o ranu maseva, ranu a henimu? 38 Edena nega ai a itamu, oi na idau taumu, a abimu dae; eiava asi emu dabua, a hadabualaimu? 39 Edena nega ai a itamu, o gorereva eiava dibura rumana ai o nohova, a igomu ita? 40 Bena Ḡaubada ese baine haere henidia, baineto, Na hamaoromui momokanimu, tadikakagu maraḡi-maraḡidia bini, maraḡi-maraḡi-hereana unu o karaia toma heḡereḡerena, lau danu unu o karagu toma.

41 Bena laurina kahana taudia baine hamaorodia, baineto, Dika taumui, egu amo ba raka oho, basine bodo lahina lalonai baola, vada e ara hegaegae, Satana mai ena aneru ida edia. 42 Badina be e hitologuva, asio ubugu; ranu e maseguva, ranu asio henigu; 43 lau na idau taugu, asio abigu dae; asi egu dabua, asio hadabualaigu; e gorereguva, dibura rumana ai na nohova, asio igogu ita. 44 Bena idia danu bae haere henia, baeto, Lohiabada e, edena nega ai a Itamu, o hitolova, eiava o ranu maseva, eiava idau taumu, eiava asi emu dabua, eiava o gorereva, eiava dibura rumana ai o nohova, bena isiaimu asia lao heniva? 45 Bena ia ese baine haere henidia, baineto, Nahamaoromui momokanimu, maraḡi-maraḡidia bini, maraḡi-maraḡi-hereana unu asio karaia toma heḡereḡerena lau danu unu asio karagu toma.

46 Taunabunai, idia na dava dika hanaihanai gabuna baela; a kara maoromaoro taudia na mauri hanaihanai gabuna baela.